【愛情實況系列】曬靚樣又曬富二代男友,會有乜結果?

 

 

女仔生得靚,又有富二代男友,人生勝利組喎,一定令人羨慕啦。不過羨慕還羨慕,如果唔知檢點,羨慕就好容易引起身邊其他女仔妒忌,搞到自己去到邊都成為針對嘅對象。呢種招人羨慕、妒忌、攻擊,但又勁幸福嘅女仔,我見過一個。

話說我好多年前喺一間公司做SENIOR,手下有幾個JUNIOR,都係女仔。佢哋大多數樣貌普通,感情上未有著落。不過其中一個,剛畢業,身型高挑,二十出頭,好識打扮,見親佢嘅,不分男女,個個都覺得佢好靚。當然,只係個心咁諗,唔會隨口講出嚟。除咗靚,佢仲係叻女一名,做嘢好得,潛質無限,而且唔會搞辦公室政治,係難得嘅人才。

咁靚嘅女仔,當然唔憂冇人追。難得嘅係,呢個女仔品格好好,唔會乘機周圍收兵扮娘娘。佢大學讀書時,就已經有一個男朋友。佢對男朋友好專一。可惜,畢業冇幾耐,唔知點解個男朋友飛咗佢。靚女好傷心,大喊咗一場,佢仲用「歇斯底里」嚟形容自己喊嘅情景。不過令人更感興趣嘅問題係:「咁靚又咁專一嘅女朋友,點解個男仔會唔要?」

靚女幾鍾意影相,失戀之後,為咗醫治情傷,報名參加咗個攝影課程。冇幾耐,攝影興趣班入面,有個男仔追佢。個男仔係個好人,影相好叻,各種攝影器材應有盡有,又有車,屬於富二代。男仔經常揸車載靚女去影靚相,靚女好快就接受咗佢嘅追求。有錢有車識影相,係追女仔嘅絕佳武器。

靚女喺攝影班度搵倒個真心對佢好嘅有錢男朋友,自然春風得意,仲開始有啲忘形。一次上堂嘅時候,教模特兒攝影,但一時間搵唔倒適合人選,於是有人提議,請靚女做住臨時模特兒先。靚女個人冇乜點,本身亦鍾意俾人影,見好多人贊成,就答應做。佢按各人要求,擺出各種好靚嘅姿態俾人影。不過佢事後透露話:「唔知點解,嚟影嘅都係男學員,女學員全部企埋一邊,一個都冇埋去影。」我心諗:「我一向唔明女仔個心,都估倒點解啲女學員唔埋嚟影你啦,你咁都仲唔醒水?」

我後來因為唔妥公司新嘅仆街管理層,就唔撈。我離職去咗第二度做之後,班女仔當中,有一個好衰格嘅,為咗升職加薪,就用奸計令三個同佢同期嘅女仔俾間無良公司炒魷,咁就冇人夠佢資歷深。靚女當然亦在被炒名單之中。佢哋三個女仔一齊出嚟搵我,我答應佢哋一有空缺就通知佢哋。佢哋亦同時向我訴苦,將自己被炒前後所受嘅苛刻對待講出嚟。講到被炒當日嘅慘情,大家都好唔開心,有一個仲好似想喊。呢個時候,靚女突然彈咗一句:「俾人炒嗰日,我要執好多嘢,攞唔晒,好在我男朋友車我咋。」另外兩個女仔望住佢,冇出聲,佢亦好似知道人哋對呢句話有唔係幾好嘅反應,即時收聲,一時間有幾秒鐘DEAD AIR,氣氛有啲尷尬。我心諗:「阿靚女,你話好在男朋友車你,你知唔知你面前另外兩個同你有相同遭遇嘅女仔,一個嘅男朋友冇乜錢更加冇車,另一個就連男朋友都冇呀?我知你唔係有意傷人,但你咁樣講,叫佢哋情何以堪呢?」幸好始終佢哋嗰陣時係同病相憐,加上已經唔係日日見面嘅同事,就冇事。不過嗰一刻我就感覺倒,靚女喺攝影班識咗富二代男朋友之後,已經變咗,會不知不覺間喺其他女仔面前曬命。

攝影班都只係隔好耐上一堂,就算其他女仔唔老LIKE靚女,問題都唔大,但如果係日日對住嘅公司同事,就唔同講法。冇幾耐,我新做嘢間公司終於有空缺,我即刻搵佢哋。冇男朋友嗰個話唔嚟,男朋友冇乜錢嗰個話嚟。至於靚女,就話佢已經有份新工做緊,唔需要我幫佢,咁就幾好啦。

點知幾日後,靚女突然打電話俾我,話想嚟我度做。我答應佢,亦問佢點解。原來佢嘅女阿HEAD對佢勁差。靚女對我講,當佢一行埋個女阿HEAD度問嘢,女阿HEAD就會鬧佢:「你唔識自己諗嘅咩?做乜嚟問我呀?」等於喝佢走開。不過女阿HEAD嘅男阿HEAD就對靚女極好。幾日後靚女到我做嘢間公司開工,同我講:「我辭職嗰日,個女阿HEAD即刻收咗我封信,但女阿HEAD嘅男阿HEAD就花咗好多時間叫我留低。」我相信大家都知道係乜原因,不過靚女話唔知。我相信佢真係唔知,因為好聽啲講,佢的確係一個冇心計嘅人;但講得難聽啲,佢其實變蠢咗。

靚女第二次到我旗下做嘢之後,我發覺佢嘅變化比以前大咗好多。做嘢唔單止冇咁上心,工作質素差咗不特止,仲越嚟越自以為是。有時指出佢工作上嘅錯,佢仲要駁咀同堅持己見,但其實佢諗嘅一套根本好幼稚,完全唔WORK。有一次我忍唔住同佢講:「你唔好咁公主病!」佢仲唔醒水,以為我同佢講笑。之後又一次,我幾乎忍唔住要鬧佢,但我唔想鬧伙記,就夾硬將自己嘅火壓住。佢見倒我個樣好似好嬲,向後退咗半呎,似乎俾我嚇親,因為我從來冇用咁嘅樣對伙記。

喺其他女仔面前,靚女照樣講嘢唔檢點。有一次,佢對住其他女仔講:「我諗住靠晒我未來老公架啦。」其他女仔聽咗之後都唔出聲,我當然知道乜事。喂!靚女!就算你未來老公點樣有錢點樣錫你點樣照顧你一世,都唔好喺其他女仔面前咁樣曬命丫。另一方面,靚女亦多咗唔覺唔覺曬自己點靚,咁真係勁容易得罪其他女人。而佢一旦得罪嘅係女人兼小人,就搵著我呢個所謂阿HEAD嚟搞。

公司裡面有一個又八卦又黑心嘅人事部肥婆副經理,一向專責監視其他伙記一舉一動,然後向老闆嘅弄權老婆打小報告。有一次,肥婆副經理向我投訴,話我手下呢個靚女衣著唔檢點,叫我話吓佢。今次仆街鳥!喂!肥婆!個靚女著嘅衫,同其他女同事冇乜大分別,你咁即係明玩針對。同埋女仔衣著嘅嘢,我根本唔識,男人老狗亦唔方便對一個女仔嘅衣著指手畫腳,叫我點同靚女講喎?不過我又擔心,如果我唔理呢條肥婆,佢會打我啲伙記嘅小報告,於是就勉強答應。我去同靚女講,話有件咁嘅事。我冇教佢點樣著衫,只係語重深長咁話:「你好容易得罪其他女人,要小心啲。」後來個肥婆副經理俾公司用完即棄炒鬼咗,總算有報應。

幾個月之後,靚女話要結婚,唔做啦。咁又係,有個富二代老公,的確可以唔使做。不過,靚女嘅言談舉止,真係越嚟越幼稚,相信都係一種完全享樂而毫無鍛鍊嘅心態所造成。佢LAST DAY嗰日,我請佢食飯,仲間接咁勸咗佢一句:「記住,一定要令自己不斷進步。」佢話好,當然只係禮貌上。

結婚後,靚女當然好幸福,但成日都只係諗食嘢。可以話,佢只係表面智力正常,其實已經由原本嘅聰明,退化到非常冇腦。反觀同佢一齊俾前公司無理炒魷嘅另一個女仔,待人接物處事,以及對世情嘅認識,都提升到另一個高度。

有靚樣又情場得意釣到金龜,係上天嘅恩賜。但如果恃住有呢啲恩賜,就將自己退化到低低BB,即使幸福,都只係浪費人生。希望天下間享受緊愛情幸福嘅靚女,好好珍惜寶貴嘅人生!

 

【愛情實況系列】

老夫少妻?公司總有個八婆會幫你棒打鴛鴦……
姐弟戀,你 / 妳接受到相差幾多歲?
如果女人要俾帽你戴,買埋層樓俾佢都無用!
一對閨密好姊妹,同時鍾意一個男神,點收科?
寂寞妹妹主動搵大叔,真係會有好結果咩?

 

作者:問世間

問世間
不善談情,但求懂愛;不作失實,但求寫實。

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 183839
Date: 2018-08-12 19:30:57
Generated at: 2019-10-20 01:37:05
Permalink: https://www.vjmedia.com.hk/articles/2018/08/12/183839/【愛情實況系列】曬靚樣又曬富二代男友,會有乜