獨遊南美遭性侵殺害——冇腦、冇準備、自己攞嚟

見到一D人對受害嘅落井下石，真係O咗嘴。
好多人出PO或回應，話受害人自己攞嚟，又話佢唔用腦，冇準備bla bla bla…最好笑係有男性話佢唔會俾女性親人自己旅行，除非佢都去，因為佢識殺人（係殺過定點？有冇咁中二病？）

雖然我係唔同意背包客老奉乜都唔帶唔準備，然後期望喺路上遇到好心人，可以搭順風車或住人哋屋企，但係一單還一單，今次呢單嘢係當事人嘅錯嗎？佢唔係搭緊人哋順風車或跟人返屋企，出事時，佢唔係一個人，而係有同行者。出事的地點唔係乜嘢貧民區或冷巷，係一個好受歡迎嘅遊客區。我睇唔到有乜嘢係受害者需要受指責嘅地方。就算好好準備嘅人，都一樣有機會遇到意外遇到壞人，咁唔係受害者嘅錯。

唯一解釋係haters見到有女性背包客，已經預設人哋係「冇腦」、「冇準備」，所以係「自己攞嚟」。又有人話佢做乜去嗰D國家bla bla bla，南美國家治安唔好啊…但其實個女仔本身都係墨西哥人，佢唔係由一個治安極好嘅地方去一個混亂之地，而且呢程只係佢第一站，佢都冇離墨西哥有多遠。而家個感覺似係香港人去泰國玩，俾人打刧了，之後仲好多人怪你話你抵死，做乜去治安比香港差嘅地方。

但用呢個Logic去生活，就幾乎邊度都唔使去。港島人唔好去九龍啊！唔係出咗事都係自己攞嚟，中產人唔好行過公屋邨啊！唔係俾人打刧係抵死架！

而最O嘴都係話一個女仔唔好自己去旅行，唔係有事就係自己攞嚟賤。其實講風險，一個男仔去旅行都有風險，你估個個都係中二病話「我識殺人」咩？根本旅行本身就伴隨風險，所以獨遊者係要小心同警覺。我討厭有人以「冇乜嘢」嘅口吻去叫人諗都唔諗就出發，旅行者本身應有一定嘅危機管理能力。但亦不是因為咁，而認為某些人(尤其是女性)不應出門旅行，或一定要有男士陪同。我覺得只要自我評估過，有危機意識，亦知道旅程伴隨風險，不論男女都可以做單獨旅行者。所謂伴隨風險，就即係可能會有事發生，如果認為去到worse case都可以承受到，或有能力處理，就可以go on。

旅行者平安，可以係佢幸運，或佢有危機管理能力。相反，旅行者遇不幸，可能係佢危機意識薄弱，或純粹唔好彩。我哋唔應該一見到女背包客出事，就斷定係佢嘅問題，有時可能真係唔好彩，正如佢同行嘅英國女子走得甩，亦可能唔係因為佢好勁，「識殺人」，可能只係好彩而已。

香港人好容易陷入一個心理陷阱：別人失敗是自找的，成功則是幸運；自己成功是憑實力，失敗則是不幸。用呢個雙重標準去量度世事，睇乜嘢都會係人哋問題，自己啱晒。多D意識到呢一點，你會接近真實更多。

作者：夏目貝

閱讀後覺得好，請多多讚好及分享～：）