今日半個香港的話題，相信都離不開騰訊業績。結果一出，夜期隨即閃崩，期貨日市夜市加埋一日跌夠1000點波幅，周圍怨聲在道，同去年慢牛市老散高漲氣氛相比，真是好壯觀，其中最令娟姐嘆為觀止，就係有財經記者態度急轉變，由騰訊信眾，突然話驚執笠。
在過去一個股市周期，騰訊就好似一個宗教咁，就算港女同大媽幾大分歧，個撚個都識講話買騰訊。隨著大行同基金落力吹奏，QQ股價不停急速破頂，大家都深信股王係有買貴無買錯的選擇，啲股佬同財經行家仲每日叫人入貨（最囧係有文章叫啲老坑將退休金買騰訊話收息，真係咪話唔on9），仲有不少行家自己都重倉QQ牛，結果今年初股價由歷史高位476.6元，瀉落407元，個排去記者會真係見到個個閪哂面。
當時有個行家N同娟姐好有信心咁講，「騰訊咁急一個月升一舊水上嚟，回調係好正常，應該要逢低買。」接著兩星期他寫文章的確偏向唱好QQ，不時又聽到他「教」其他新認識的行家入QQ，因為他深信大行目標可以變啡底，QQ PE較美股其他大型科技股仍然很低。
之後二月三月上旬，港股回升，炒股氣氛再次升溫，又是周街股佬叫人入貨的時候。有一日，娟家又係PC見到行家N，閒談之間娟姐講左句：「風高浪急呀，小心唔好咁搏。」就換來行家N 串柒柒的嘲笑，話騰訊龍頭呀壟斷呀盈利能力勁呀之類，然後跨下海口話：「價值投資，如果跌返落300蚊頭我即入貨，放十幾年！」他當時講到拍哂枱，娟姐仲瀝瀝在目。
結果四月初股王又落難，穿哂鑽石底跌到397元，已經好多網民話要去IFC排隊，氣氛明顯差左好多。這個月，行家N約了娟姐食飯，講完公關同採主壞話之後，他竟然又同娟姐傳教：「而家騰訊八折大平賣，真係好抵。」娟姐係炒股方面一直都係自己炒，有時最多講下自己炒過咩，但好少比意見人，因為股市輪贏難料，最好自己對自己負責，不過這次真是忍唔住講句「睇個圖似要繼續落」，再換來他一句「擺十年唔怕蝕啦」（os：屌你老味，擺夠到入棺材好未？）
然後我問他是咪咁勇撈左底，他竟然答「跌到頂唔順，放左。」（os：屌咩，開始覺得呢條友有啲仆街，自己平倉，然後叫人入貨。）當然娟姐就廢事八他輸幾多。
如是者，接下來三四個月，他仍然不停宣揚騰訊的福音，又寫好成個科技板塊，在高位叫人開騰牛…有一刻娟姐在想，其實是咪有好路數，要幫大戶出貨？直至他有次讓娟姐看股票倉，原來他向屋企人借錢炒，仲入左2382及2018，他是真心相信科技股的神話。
直至今日，QQ公布第二季純利178.67億元人民幣，按年跌2%，全地球個個喊撚哂驚，這時娟姐震一震，原來係行家N whatsapp，話要將wechat pay啲錢同牛牛啲錢清倉，我仲心諗，「做咩忽然戒賭？」原來，他驚騰訊會執笠，娟姐即刻呆左，諗都無諗過呢句說話會出自一個財經記者。
之前仲同人講擺十年唔撚怕，一個月之後就因為人地純利倒退2%驚人執柒左。一個每日寫新聞寫股評的人，原來都係好受大市氣氛同股佬影響，同以前啲香港大媽驚恒生會收皮要擠提無咩分別。喂阿哥，唔通人地富可敵國的企業，營運會一個月之內突然大倒退咩，想到這點娟姐反一反白眼，再問返他：「聽朝開始好可能310～320左右，到哂你願望目標價，打左六五折夠抵啦，可以再擺十年。」這次換來他一句「擺你條命。」
在大牛市，股神？周街都係。氣氛好，同人討論當然大家都可以有進步，但最忌無料扮有料，害讀者排隊上IFC就唔好啦。因為工作需要，娟姐每日都會睇哂主要報章同周刊，邊個行家邊個股評推過咩股都有印象，當然好多好好的意見，但大家睇專欄同財演真係要小心，自己都要做功課。
股價既野，其實同公司的實際盈利可以唔成正比，升跌都係睇大戶心情，佢解讀話差，咁咪差囉，但係客觀啲講，盈利輕微倒退左少少，但實際收益仍然係好龐大架喎，即刻要擔心人執笠，係唔係即刻太極端呢？同埋，港股真係好撚多老千，好似一個合法的大型賭場，當全個地球都可以不停破頂，唯獨港女西到可以唔跟升，淨跟跌，一句講哂，眾地莫企。
利申：娟姐無持有上述股份或衍生工具，亦不構成任何投資建議
為何今天好像剩下Mirror 一個偶團？
我去到2021年先唔再睇TVB——正向聯想 (Positive Association)
分手咪分手囉，三口六面講清楚好難咩？
【遊戲介紹】做個中世紀領主 《Going Medieval》極多玩法暗藏食人肉滿足饑餓度
薛定諤人生最尷尬的恥笑——薛定諤的貓實驗
寫於與舊單位分手之前——習慣化 (Habituation)
2018年8月16日
