有關情緒病……

文教 / 最新文章綜覽

 

情緒病患係一種病,就像感冒一樣不是你選擇的,負面想法、情緒低落、情緒失控都不是選擇,是腦部一些零件出了問題,就如鐘錶內的其中有些齒輪不平,雖然像其他鐘錶一樣運作,實際上就是轉動得不順暢,而人腦這個鐘錶的零件不能換掉,看醫生、食藥、親人朋友不離棄的陪伴只是落油一般,讓它繼續轉動,不讓它生銹,甚至停止運作吧了。

盧凱彤說過「伴陪情緒病患者係好難嘅事」,的確是,要相當深入嘅同理心,對病患嘅深入了解,先能夠做好一個陪伴者,說該說的、做該做的、避免一些造成傷害嘅言行。相信好多人見到身邊認識嘅人受到情緒困擾或有情緒病,都出自真心的前去慰解、陪伴,可惜好心做壞事,不夠了解病者需要,說了不該說的、做了不該做的,將患者推向更深嘅谷底,不適當嘅關心變成了傷人武器。

但是,每個人都是獨立嘅個體,有獨立嘅思想及感受,有自己嘅生活,有自己嘅責任。我身為一個抑鬱症患者好清楚了解到,人地對自己嘅關心係出於善心或感情,但並不是係佢地嘅責任,人地願意花心機及時間係自己身上,肯去聆聽自己嘅想法同感受、肯去嘗試慰藉自己,有這樣嘅有心人係好奢侈嘅人生禮物。所以就算身邊有唔識講嘢嘅人,甚至佢句句如利刀插入我心,只要感覺到對方係對自己真心,我都會原諒,甚至去親近佢地。

不過以依家嘅網絡發達,如果你真係有心去陪伴、幫助情緒病患者,花一點時間去了解患者嘅感受同需要,做一點資料搜集,其實去不難。就如之前契媽因高血壓兩個月內進出醫院多次,我都會去Google一下有咩對高血壓係好、有咩係唔好,做多少少減少傷害唔係更好咩?因為做得唔好,「關心」唔係變成「利刀」咁簡單,係變成致命嘅「機關槍」一粒粒子彈射入患者心臟,將佢地推落樓………………

網絡嘅發達,係令人容易接觸不同嘅知識,對於情緒病這回事早就有各樣報導及講解,亦都因為咁有人會利用呢樣嘢作借口。試過有個美國朋友,佢嚟香港玩幾個月,由於佢無咩朋友,佢又話無咩女性朋友所以成日搵我,我仲同佢去咗一個星期台灣旅行。呢幾個月深深感受到公主病係咩一回事,完全想用盡我,我又要返工又要照顧佢根本累到殘晒,但佢就自私地幫我計算我係有休息時間,但無計算我有個人生活。詳細就唔係道多講,總之佢之後再嚟香港搵我,我直頭又嬲又恐懼到唔回應佢任何訊息。其中一個訊息但佢竟然話因為depress所以咁…………原來公主病等於depress,我真係眼界大開。就呢件事,一樣米養百樣人,相信有好多人將情緒病當成借口去行兇囉………………

有人說過「一個人係仆街,就算佢有情緒病都係一個有情緒病嘅仆街。」就係呢個時代開始多咗人認知情緒病係咩一回事,所以就有一啲有情緒病嘅仆街將情緒病當工具去情緒勒索人,利用關心佢嘅人去得到利益。又有一啲會以情緒病之名要全世界去就晒佢,總之有情緒病就好似全世界要圍住佢地轉一樣。你講嘢唔啱聽咩?就係你無同理心囉~再唔係你唔順我,我死俾你睇,做一啲尋死、自殘嘅行為,指責你無同理心又唔識遷就,就係要你有罪疚感。只能說,以我這個抑鬱病患者之名,就算任何一個有情緒病,個世界運作係唔會就你而改變運作模式,唔順心係永恆嘅運作mode,你想係哩個社會生存就必須了解個社會運作、了解人性嘅殘酷。情緒病係病,唔係工具,人地嘅關愛係要珍惜,而唔係攞嚟利用,唔係話掛住情緒病呢個身份就可以橫行霸道。

講到尾,能夠互相理解、互相包容,無任何利用、情緒勒索,主動關心、耐心聆聽等等個社會咁運作真係好正,可是發夢就有你份!但求憑呢篇文章叫更多人主動認知情緒是怎樣一回事,做多點搜集。另外有情緒嘅,勿以情緒病作為工具用去利用人。

完。

 

作者:紫玥

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 184026
Date: 2018-08-16 05:49:36
Generated at: 2019-04-19 13:29:00
Permalink: https://www.vjmedia.com.hk/articles/2018/08/16/184026/有關情緒病