（韓劇《我的大叔》）
最近有部好好睇嘅電影《逆流大叔》，入面其中一個大叔對又後生又靚女嘅教練有所傾慕，令我想起曾經見過嘅一個類似個案。不過呢個個案，除咗背景同電影唔同之外，個女主角仲比電影入面嘅女教練更加後生。
喺N年前，我考A LEVEL一敗塗地，入唔倒U，出到社會又搵唔倒野做，更加買唔起樓，變成失業又失學嘅雙失廢青，幸好連拖都冇得拍，所以無戀可失，不致於三失咁慘。後來偶然機會下搵倒一份政府臨時工，為期三個月，已經喜出望外。由於時值暑假，翻工之後，識倒一班將政府臨時工當暑期工做嘅學生，佢哋有啲剛考完A LEVEL等放榜，有啲就已經讀緊大專或大學。大家年紀差唔多，又係臨時工，自然就柴譁譁走埋一齊。主管為免我哋嘈嘈閉，就分散我哋去唔同組別做嘢，我哋就只能夠喺食LUNCH嘅時候聚埋一齊。
有一次我哋喺LUNCH嘅時候，大家分享自己所屬組別嘅事同人。所講嘅，多數係呢個組有人好衰、嗰個組啲人好悶等等，志在笑下。我哋班後生臨時工當中，有一個二十出頭嘅學生妹，喺某間大專讀緊HIGH DIP，剛讀完YEAR 1。輪到呢個HIGH DIP學生妹分享，佢同我哋講：「我嗰組啲人好好架。」當時我哋冇乜為意，後來先知所謂「嗰組啲人好好」，其實只係得一個人對佢好好，而且仲係非一般嘅特別勁好。
一班後生臨時工，平日有講有笑，都幾開心。不過，做咗唔夠一個月，HIGH DIP學生妹屋企突然發生一件大事，令佢非常擔心同傷心。原來，佢阿媽證實患上末期癌症，可能過唔倒一年。對HIGH DIP學生妹嚟講，真係晴天霹靂。佢係家中獨女，年幼喪父，同阿媽相依維命，人生經驗又淺，一時間真係唔知點算好，就四圍同人講，希望得到支持同幫助。我哋班後生，雖然好同情，但實在唔知可以做乜。呢個時候，「嗰組啲人好好」嘅嗰個人，就挺身而出。
HIGH DIP學生妹口中嘅呢個好好嘅人，係一個四十幾歲嘅未婚中年大叔，佢喺政府入面做CO II，即係二級文員。佢同好多做咗好多年政府寫字樓工嘅人一樣，老油條冇乜生氣。不過自從HIGH DIP學生妹入咗佢個組之後，佢就有生氣咗好多，平日指導HIGH DIP學生妹做嘢，特別積極同細心。相反，我哋其他臨時工，喺其他組入面，就得唔倒相同對待，有時仲會俾啲變變地態嘅大嬸彈我哋做嘢唔得，難怪HIGH DIP學生妹會覺得呢位大叔特別好。
屋企出大事，不知所措嘅HIGH DIP學生妹當然有向呢位佢心目中好好嘅大叔講。大叔就非常非常非常咁關心同非常非常非常咁着緊，加強噓寒問暖、幫手揾醫療偏方等等，不在話下。不過，大叔對一個只係識咗冇耐嘅女仔好成咁，又似乎俾人一種「有點兒那個」嘅感覺。
平日，大叔經常買嘢食俾HIGH DIP學生妹，而且仲係送到口邊咁滯。例如買橙請個學生妹食，大叔會主動幫個女仔搣埋橙皮，然後好溫柔咁送到個女仔面前俾佢食，只係爭在未餵埋入口。同時，大叔亦幾常送呢樣送嗰樣俾個女仔，其中有一次令人印象特別深刻。當時我哋一班後生喺LUNCH TIME坐埋一齊傾計，大叔突然攞住一袋嘢行過嚟，同個女仔講：「阿XX，呢啲燕窩俾你阿媽補身。」HIGH DIP學生妹話唔好意思收，但見大叔咁有心，最後都收咗。我哋見到，個個目瞪口呆。我哋雖然後生，但亦未至於完全唔識嘢，只覺得大叔嘅舉動好似為咗追女仔而「孝敬伯母」咁。我哋原本講得興高采烈，見倒咁嘅情形，即時一句聲都出唔倒，場面變成DEAD AIR。
其他人覺得有啲嘢，但HIGH DIP學生妹因為家事問題，就仲未察覺，直至一件事發生。話說大叔太過關心HIGH DIP學生妹，特登幫佢安排約見社工，個女仔覺得或者可以幫倒自己面對屋企嘅問題，就同意見社工。見面當日，大叔帶住個女仔入去社工間房。由於社工要保護CLIENT嘅私隱，其他人唔可以在場，所以大叔行出去，閂埋門，間房入面只得HIGH DIP學生妹同個女社工兩個人。
連我哋班入世未深嘅後生仔都感覺到有嘢，社工呢類專業人士又點會睇唔出。個女社工非常有經驗，佢見咗大叔唔夠半分鐘，就已經從大叔對個女仔嘅動作、說話、眼神，睇倒啲嘢，亦覺得有啲嘢唔係咁自然，作為社工唔可以唔出聲。
社工劈頭第一句，唔係關於個女仔屋企嘅問題，而係問：「嗰個係你男朋友呀？」HIGH DIP學生妹好愣然，定咗一定，回應話：「唔係，佢話只係當我係佢妹妹。」社工跟住嗰句，係一個短問題，只得五個字，但係就最攞命：「佢講你就信？」
「佢講你就信？」呢句擺明係個社工刻意提醒眼前嘅純品學生妹，可以話係當頭棒喝，亦可以話係一言驚醒。HIGH DIP學生妹雖然好後生，但都明白當中用意，亦令佢只記得呢句，之後社工同佢討論關於屋企嘅事，已經入唔倒腦。
見完社工之後，HIGH DIP學生妹對大叔嘅態度完全變晒。以前係乜都同佢講，而家就好想有咁遠離咁遠。其實，大叔咁大個人，應該都知道發生咗乜事，亦應該知難而退，否則只會對自己同對個女仔造成更大傷害，可惜大叔唔識分寸，繼續不斷獻殷勤，個女仔當然一再拒絕。有一次，大叔又送小禮物，個女仔唔肯收，大叔話：「係送俾你架，你唔鍾意就掉咗佢啦。」事後個女仔同我哋講：「我覺得好滋擾呀。」
屋企啱啱出大事，身邊又出現個咁嘅大叔，個女仔覺得好煩好滋擾，係好正常。另一邊廂，大叔情況都好差，我哋見佢神情越嚟越呆滯，有時會用個面貼住張檯，然後猛咁用兩隻手搲個頭，一睇就知佢有幾痛苦。
三個月臨時工好快完。個女仔離開前，好有禮貌咁寫封信俾大叔，多謝佢嘅關心，亦委婉咁表明唔想再聯絡。最後一句係：「Thank you very much for your kindly help.」大叔終於認清事實，從此就冇再搵呢個女仔。大叔之後點樣就唔知，但相信佢會喺政府裡面做到退休。
至於個女仔，由於母親冇幾耐之後過咗身，傷心咗一排。過咗一年，另一間佢鍾意嘅大學收佢讀DEGREE，佢好開心咁轉校，三年之後畢業，繼續佢嘅人生。至於佢往後嘅情路係點，由於冇再聯絡，就唔清楚嘞。
而家回想起呢個故事，覺得嗰位大叔其實都幾慘。佢唔係壞人，鍾意一個人亦絕對唔係錯，但係明知有啲嘢唔可以勉強，就應該好似名曲《天各一方》話齋，將激情「藏喺心底」，等呢份激情可以「歷久常新」，而唔應該夾硬去馬，何況仲係喺人哋屋企有事呢種唔適當嘅時候添。呢方面真係值得所有大叔引以為鑑。
講到呢度，故事亦都到咗尾聲。喺結束前，我諗起一件同呢位學生妹有關嘅一件小事，想補充一下。話說我哋當年做嘢嘅地方，隔離就係法院，平時都會遇到律師衣着嘅人。有一次我哋幾個臨時工一齊食LUNCH，隔幾張檯有個三四十歲嘅律師食緊飯，呢位學生妹眼定定咁望住個律師，眼神充滿仰慕，又用輕歎嘅語氣發自內心咁講咗一句：「律師喎……」而家我諗翻：「如果當年向佢大獻殷勤嘅，係一個中年律師，而唔係中年CO II，故事會唔會有另一個版本同結局呢？」
老夫少妻？公司總有個八婆會幫你棒打鴛鴦……
姐弟戀，你 / 妳接受到相差幾多歲？
如果女人要俾帽你戴，買埋層樓俾佢都無用！
一對閨密好姊妹，同時鍾意一個男神，點收科？
寂寞妹妹主動搵大叔，真係會有好結果咩？
曬靚樣又曬富二代男友，會有乜結果？
為何今天好像剩下Mirror 一個偶團？
我去到2021年先唔再睇TVB——正向聯想 (Positive Association)
分手咪分手囉，三口六面講清楚好難咩？
【遊戲介紹】做個中世紀領主 《Going Medieval》極多玩法暗藏食人肉滿足饑餓度
薛定諤人生最尷尬的恥笑——薛定諤的貓實驗
寫於與舊單位分手之前——習慣化 (Habituation)
2018年8月19日
