【愛情實況系列】咁嘅CHEAP 男都有女神死心塌地！呢個世界公平咩？

（圖文不符。無番號）

近年成日聽到一種意見，認為香港女仔又貪錢又花心，仲要超級MK冇厘貴格，一遇到有錢又靚仔嘅，即刻飛咗拍緊拖嘅男朋友另結新歡，「港女」是也。不過總有例外。今次我講嘅，就係一個百分百香港極品好女仔嘅愛情故事，喺呢度就叫佢做「好好姑娘」。可惜佢嘅情路有啲坎坷，你哋睇嘅時候可能嬲到想掟爛手機，所以敬請控制情緒，尤其女士們。

要講呢個好好姑娘，要先由外表講起。佢絕對係女神一名，靚得嚟，眼神同面部輪廓，比一般香港女仔深，有少少混血鬼妹仔FEEL，加上長髮披肩，嗰種靚法，大家可以用自己嘅想像力去欣賞。

講完外在美，講內在美。呢個女仔，溫柔、斯文，唔出口你唔知，一出口，把聲靚到好似天籟之音。佢嘅儀態、談吐、一舉手、一投足，都好自然咁流露出一種貴氣，呢種貴氣仲係天生，從來冇人教。

對於愛情，佢好專一，亦從冇想過利用自己嘅天賦條件釣金龜，亦冇要求靚仔有型，只希望同自已所愛嘅人一齊，拍拖、結婚、生兒育女，直至白頭偕老。

咁好嘅女仔，真係上帝嘅藝術傑作。邊個娶倒佢，都肯定會係世界上其中一個最幸福嘅男人。

講完好好姑娘有幾好，就開始講下佢嘅感情生活。佢有一個拍咗幾年拖嘅男朋友。好可惜，呢個男仔對好好姑娘真係唔多好，或者應該話非常之差。

香港人日日話要增值，佢哋兩個都唔例外，要一邊做一邊進修。好好姑娘非常勤力，又做又讀好認真，日夜辛勞，但同時依然好體貼男朋友，冇話因為工作同讀書而忽略對方。佢男朋友就唔同，冇咁認真之餘，仲一啲都唔體恤女朋友，竟然要女朋友幫埋佢做功課。喂！功課大家都要做，而且係你份內事，有乜理由要女朋友幫你做埋？咁樣既係作弊，亦大大加重女朋友嘅負擔，真係好唔合理。不過，好好姑娘為咗唔想男朋友唔高興，只好頂硬上，幫佢做埋。

對好好姑娘嚟講，做多一份功課，令男朋友開心，辛苦啲都唔緊要。但問題係，幫男朋友做功課，條友多謝冇句不特止，仲因為時間多咗而出嚟攪三攪四。有一次，好好姑娘喺唔為意嘅情況下，睇倒男朋友嘅日記，內容講自己去泰國嘅一段經歷──叫雞。

我可以肯定，以好好姑娘嘅為人，絕對唔會特登偷睇男朋友既日記，即使意外睇倒，亦會當冇件事。但係男朋友竟然自己走去泰國叫雞，正常女仔都冇可能唔出聲。不過好好姑娘冇話大興問罪之師，而係用佢發自內心既溫柔，問男朋友係咪有件咁嘅事。男朋友冇得唔認。好好姑娘當然好嬲好傷心，但都只係好溫柔咁回應一句：「乜你咁CHEAP架！」之後就仍然繼續同呢個佢口中好CHEAP嘅男朋友一齊。

面對叫雞嘅CHEAP男，好好姑娘默默忍受，亦默默接受。可惜，個所謂男朋友仍然唔愛惜呢個咁好嘅女仔，做出另一件令好好姑娘更加傷心嘅事──嗌分手。聽倒深愛嘅男朋友嗌分手，好好姑娘當堂成個人唔單止冇晒目標，連嘢都唔食，急速消瘦，餓到皮包骨，終日以淚洗面。再咁落去，真係唔餓死都餓到厭食症。除咗好好姑娘之外，好好姑娘嘅父母都係受害者。我見過佢嘅父母，係一對有涵養而且樸素老實嘅慈祥長者，係值得尊敬嘅人。佢哋見倒個女咁樣，又傷心又擔心，同時亦好嬲個男人。

呢個時候，嗌分手嘅男人出現翻，仲變成世界上唯一能夠救翻好好姑娘嘅人。佢氹好好姑娘嘅方法勁簡單──親手餵好好姑娘食嘢。起初好好姑娘唔肯食，但係嗌分手男人又用好簡單嘅方式化解。佢好關心好溫柔咁對眼前餓到骨瘦如柴嘅EX講：「嗱！你唔食，我都唔食架！」呢一句威力無窮，好好姑娘即刻徹底融化，食翻嘢，仲同翻埋佢一齊。

再過一排，佢哋終於宣佈結婚。大定睇到呢度，可能都會講一聲：「有冇搞錯？咁嘅人都嫁俾佢！」有冇搞錯我唔講，但好好姑娘最終嫁俾佢，就千真萬確。婚禮當日，我都有出席，只見身穿婚紗嘅好好姑娘好靚好純潔，笑得好幸福。嗰日係我第一次見倒佢嘅新郎哥，內心好為好好姑娘擔心，亦想學許文彪講一句：「呢個世界公平咩？」

結婚之後，兩個人嘅愛情結晶品出咗嚟，係一個好可愛嘅BB女。我去探過好好姑娘，見佢哋一家三口，好幸福。好好姑娘手抱愛女，開心到不得了，完全係一個超級賢妻良母。

寫到呢度，或者大家會覺得故事已到尾聲。的確，我當時都以為故事以經有完美嘅結局，點知冇幾耐之後，先知原來又有下文，而且仲係更加大鑊。

當個女已經開始識得諗嘢講嘢嘅時候，呢個老公突然離家出走，去同一個只有19歲嘅女仔同居。咁仲不特止，佢身為老豆，仲猛話自己好憎個女。個女雖然細，但都開始懂事，對自己個老豆亦表露出唔鍾意嘅情緒。好好姑娘就最慘，老公婚外情離家出走，個女細細個成日唔開心，真係雙重打擊，只好經常抱住個女，以淚洗面。嗰段日子，真係唔知佢點過。不過我相信，個女係佢堅強面對嘅最大力量來源。

過咗唔知幾個月定一年，個老公終於同個19歲情婦分手，跟住就翻到好好姑娘身邊。好好姑娘仍然深愛老公，加上為咗個女，當然又再接納翻呢個一再背叛佢嘅男人。不過好彩嘅係，之後都再冇聽到呢個男人喺外面攪三攪四嘅消息。後來，佢哋又生多個仔，而家係一個幸福家庭。當然，過去嘅烙印，係會長期存在，需要多啲時間去沖刷。

每當想起好好姑娘對所愛嘅男人死心塌地到呢個地步，我都唔知可以講乜，既唔想做任何道德批判，更加唔想話呢個蠢嗰個痴。「問世間，情為何物？」感情嘅嘢，真係講唔埋。不過我一直都奉勸啲女仔：「做女仔，除咗要經濟獨立之外，仲需要感情獨立。總之無論經濟上定係感情上，都唔需要依賴男人。」不過，有一次，一個失戀之後就一直搵唔倒另一段新感情嘅寂寞芳心聽倒我咁講，覺得我「講呢啲」，就一句將我KO：「唔！你太唔明白女人個心啦！」從此，我唔敢再喺女仔面前講呢啲。

【愛情實況系列】

老夫少妻？公司總有個八婆會幫你棒打鴛鴦……
姐弟戀，你 / 妳接受到相差幾多歲？
如果女人要俾帽你戴，買埋層樓俾佢都無用！
一對閨密好姊妹，同時鍾意一個男神，點收科？
寂寞妹妹主動搵大叔，真係會有好結果咩？
曬靚樣又曬富二代男友，會有乜結果？
大叔戀上學生妹，結果係？

作者：問世間

不善談情，但求懂愛；不作失實，但求寫實。

閱讀後覺得好，請多多讚好及分享～：）