歐鎧淳份聲明，唔通係想講泳總委員吳旭光戴左綠帽？

星期日OT完打開Facebook，就見到歐鎧淳個page有份署名香港亞運游泳代表隊嘅聲明，係咁講嘅：

「就近日有香港本地媒體針對個別香港游泳運動員入選資格的報道，我們都一致認為該報道斷章取義，未能反映事實之全部並導有誤導之嫌……」云云，仲話會保留追究權利。

首先我唔研究點解係「報道」先啦，都唔理咩叫「導有誤導」先啦，亦都唔考究香港幾時搞緊亞運先啦。最近講嚟講去同泳手入選資格，應該都係得一單，就係泳總委員吳旭光個仔吳欣鍵取代郭姓泳手入選亞運港隊呢單嘢。歐鎧淳為首嘅「香港亞運游泳代表隊」（我都係唔明點解唔係「亞運會香港代表隊」，不過是但）可能係話同吳欣鍵有關嘅報導係不實，咁本於善意原則，我又唔會話歐鎧淳一開口就錯嘅，不過咁就要分析下囉。

翻睇有關報導一輪，其實生果報就講緊呢幾點：

1. 吳欣鍵本身連初選提名都冇；
2. 吳欣鍵係吳旭光個仔；
3. 吳欣鍵最後代表香港出賽印尼；
4. 郭姓泳手冇得去印尼比賽。

逐點睇，第一項泳總本身8月1日有聲明講咗佢哋提名咗一位楊姓泳手一位郭姓泳手，咁呢係呢一點冇問題啦；吳欣鍵最後代表香港出賽同埋郭姓泳手冇去到都冇問題啦，因為吳欣鍵直程輸埋返嚟添啦。

既然係咁，不實嘅部分可能就係「吳欣鍵係吳旭光個仔」呢一點喇。如果話呢句嘢不實，咁樣泳隊份聲明係咪想講，吳旭光頂綠帽戴咗好多年，所以生果報推測話吳欣鍵係因為佢係吳旭光個仔所以可以出賽呢一點係失實呢？咁搞法呢粒花生真係好食過金龜嘜喎！

當然啦，其實我都係估下，因為「香港亞運游泳代表隊」份聲明又冇講邊份報紙、又冇講邊個泳手，話唔定係講緊唔知邊份香港小型網上親共報指摘歐鎧淳同隊友贏4×100之後抱住新加坡隊慶祝係手指拗出唔拗入唔應該入選港隊呢？話唔定佢想澄清嗰時佢係捉住啲新加坡人係咁講粗口屌人老母唔係慶祝呢？點知啫～

作者：薰華

塵世中一件無名廢青，除咗偏見同口水就冇嘢多。

閱讀後覺得好，請多多讚好及分享～：）