小丸子呆望雨. . . . . .

 

 

經典漫畫小丸子原作者櫻桃子於本月離世, 終年53。

提起小丸子,你會先諗到小玉,小丸子媽媽,爺爺,花輪,但唔止係咁,好快你會諗起埋閃電傳真機,諗起叮噹,諗起藤子 F 不二雄,諗起林保全,諗起娟姐。。。

每個人都有佢既童年,有啲比較平淡乏味,有啲比較多姿多采。但你同我既童年,都係一整個 package ,可能或多或少有以上佢地既影像係腦海同心頭掠過,有啲比較重要,有啲已經唔記得左。而你同我既童年亦都一樣,黎到今時今日,早已永遠地一去不回。正如佢地一樣,亦不可能成為永恆。

故事入面小丸子性格麻煩,多管閒事,諸事八卦,甚至貪小便宜,好吃懶做,為左掩飾錯誤甚至會講大話,推卸責任。但係點解大家都係鍾意睇住佢?因為童真就係千金不換,小朋友一時做錯,只需要知錯能改,斷唔會俾人聯想到佢會係梁六八九咁,死不認錯仲要狂發律師信告人。天真,貴在無邪。

小丸子可愛而不造作,所有小朋友其實都會有佢既倒影。有邊個試問唔會偶爾百厭搗蛋?等於大雄最懶,一樣得到眾人包括叮噹既原諒。抄功課自己唔駛做,睇在眼裡,自己都做過,自然會會心微笑。共鳴就係咁黎。小丸子做咁耐都係 2D,但係果種共鳴感係好強烈。同家姐嗌交,偷食,詐病,扭爺爺錫作威作福,個個橋段都描寫得好入肉。

咁多年後,進入職場深似海。然後結婚,生仔,慢慢老去,我的青春小鳥一去不回來。為左年終花紅,要生要死,OT 當食飯,老屈當揼骨,負擔一件比一件沉重,已經連笑既閒暇都無,遑論再去睇一集卡通片。我地由一枝鋼筆,到成套西裝依家都要講係咪名牌全外國手造進口,遠遠已經唔記得過往如獲至寶既,只係史路比鉛筆,叮噹筆袋,又或者就係小丸子既貼紙同拍子簿。

小丸子呆望雨。今晚這樣雨,大概會繼續落一晚吧。

 

作者:鵝鑾鼻燈塔

鵝鑾鼻燈塔
前高登講故人。現為廢中。努力抵抗中年危機中。FB PAGE:https://www.facebook.com/Ellan.Ou/

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 184468
Date: 2018-08-27 22:21:49
Generated at: 2021-10-24 10:12:10
Permalink: https://www.vjmedia.com.hk/articles/2018/08/27/184468/小丸子呆望雨