妳把聲好好聽

時間 19:04，他剛剛收工，啱啱登上歸家那巴士，人好很多，放工人潮狠又多，他幾經辛苦歷盡艱難，終於有個他心儀的上層右排樓梯吉位坐。這位置是他最喜歡的雙層巴士座位，從前這裏有塊專播巴士廣告的螢光幕，既吵又煩，討厭到不得了，現在那間廣告公司似乎執笠了，感謝上帝，還佢安靜車廂。

收工就是爽，不必再管他媽的公事，我行我素，唔扮嘢做自己，此時此刻他通常會戴上耳筒，聆聽自己揀的音樂，話知耳筒外世界任何嘈音，畢竟這個城市太多膠人膠音膠聲浪，他寧願自我隔離，讓耳根重拾清靜。

正當他拿出手機，打開 Player App，點了第一首歌，聽了三十秒，佢老味邊個敗佢雅興？某個三字頭冧吧來電，作為一位常識合格的香港人，聾嘅都知道這九成九是電話推銷來電，正常人都會直接掛掉，聽都費時，不過他心地較好——搵食啫，犯法呀？佢通常都會花一分鐘聽聽推銷員對白，然後禮貌地拒絕收線。

「喂？」
「請問你係唔係X先生？」
（阿妹醒目呀，冇讀錯我個姓。）
「有何貴幹？」
「我係XX銀行嘅 Yvonne，職員編號 xxxxxx，如果你日後有其他查詢可致電 xxxx-xxxx，我哋而家有個免息貸款計劃⋯⋯」

他當然對這些「計劃」沒有計劃，但電話對面呢把聲實在太動聽，聽這女子講嘢係人生一大樂事，她聲線清脆，咬字清晰，懶音厥如，雖稱不上天籟，也算是人籟，聽靚聲女講嘢係人生享受，彼此隔着螢光幕萍水相逢，呢個來電可能已經係他倆此生唯一一次交流，好歹也是緣份。

他按捺不住，開口了。

「Yvonne 呀可？」
「係。」
「妳把聲好好聽呀。」
（！！！！！）

看來 Yvonne 首次遇上那麼有趣的客人。

「其實我對貴公司嘅產品一啲興趣都冇，但係妳把聲太好聽，所以我先會聽妳講咁耐。」

佢明白 Yvonne 跑江湖是為了開單搵食，唔係聽呢個傻佬口惠實不至的空讚。

「好啦，唔阻妳搵食啦，多謝妳嘅來電，拜拜。」

這通電話掛了，音樂回復正常，他繼續享受他的人生，那位聲線很美的 Yvonne 亦重回彼此不再交叉的平衡線。

作者：爽健

不求聞達於諸侯，只願笑傲賞江湖。

閱讀後覺得好，請多多讚好及分享～：）