【外賣仔日記】偉大嘅港女客人：「啲熱飲變咗凍飲，凍飲變咗熱飲，你叫我點飲啊？」

（珍珠奶茶示意圖，非事主）

接到張台式飲品店嘅單，全部都係嘢飲嚟，佢寫住嗰個送貨地址係一個有商場同埋寫字樓嘅商場嚟，但係佢嗰地址淨係寫咗嗰商場名，嗰商場係唔只一幢寫字樓，有幾幢寫字樓都係響商場上面，去到嗰商場要去邊幢大廈又無寫，商場店舖號碼又無。

諗住一路行就一路call嗰客問下啦。當然啦，偉大嘅客人又點會聽你嗰電話呢，咁就唯有將所有嘢講返俾公司聽，然後就繼續行去嗰個商場，因為如果嗰客隨時call返嚟，咁就可以即刻送俾嗰客啦。到最後去到嗰商場跟住公司嘅指引等咗10分鐘，公司又試過call嗰客，而我哋有試過call嗰客，到最後都無人聯絡返我哋任何一方，因為本身啲食物已經出過街，要比返餐廳俾第二個客都唔太可能，咁公司唯有就最後話送餐員自行處理啦，而呢啲情況就梗係自己嗰胃處理架啦，咁就絕對唔會浪費食物阿。

嗰度有幾杯嘢飲，而我哋就嚟食lunch，咁就諗住我哋同事幾個人一人一杯啦，咁做完佢嗰單之後就無再入單，咁就響嗰嗰商場入面搵咗張公眾座椅坐低等夠鐘就offline去食lunch啦。本身渣住啲嘢飲諗住係轉頭lunch嗰陣先去飲，點知過咗20分鐘之後公司send咗嗰訊息過嚟問。

公司：「同事，我想問下啲嘢飲仲響唔響度？」
我：「響度，咩事？」
公司：「嗰客啱啱搵返我哋吖，你要送去1xx-xx 鋪位嗰度阿，佢哋嗌架」
我：「OK」

咁就我嗰人仲響商場，咁就好快去到姐，但係去到嗰客度之後
客：「點解頭先你唔打俾我啊？
」
我：「頭先有call過你架，有紀錄架。」
客：「咁我頭先鋪頭入面收唔到電話啊。」

啊小姐你玩嘢啊？你都識得講話你鋪頭入面收唔到電話啦，咁我call你點會聽到啊

？
我：「咁呢度係你啲嘢飲啊。」
客：「想問你哋可唔可以重新送過啊？」
我：「點解啊？」
客：「因為啲熱飲變咗凍飲，凍飲變咗熱飲，你叫我點飲啊？」
我：。。。。。。
客：「咁杯凍珍珠奶茶熱咗點飲啊？
」

我望一望啲飲品，全部都非常正常，無倒瀉，非常正常，係你自己唔聽電話，咁啲嘢飲放咗響度30分鐘，咁一定會係咁架喎，好正常吖，但係經過一輪拉鋸之後，嗰客仍然堅持要重新送過，咁就唯有要同公司講返啦，咁當然啦，公司最後梗係話無啦，我哋搵你唔到，關我哋咩事。正常如果我哋對啲食物無興趣，晨早去咗垃圾桶添啦，你仲會收到啲食物，你有得食算你好彩啦。

最後公司通知我，話叫嗰客call上去處理，我哋響度等，經過一輪嗰客自行同公司拉鋸之後，我收到嗰來自公司，仲要係好嬲嘅訊息同我講，你自行處理啦。

雖然唔會知嗰客同公司講過咩，但係睇嚟嗰客真係好勁，連office都可以激到嘅
！

專題：【外賣仔日記】

作者：外賣仔

閱讀後覺得好，請多多讚好及分享～：）