香港，好一個沒有未來的「生捱規劃」

生涯規劃這個字眼，大概是這數十年間的產物。不少社工進學校，就教學生「規劃未來」Bla Bla Bla；但我覺得諷刺的是，在香港地，我們有未來架咩？

第一部分的生涯規劃，就是一出世就開始的競爭。由細個辛辛苦苦入名校與人競爭、鬥到大學入三大。讀得成書的，又睇下出黎搵工人工待遇如何、同行如敵國鬥個你死我活。讀唔成書嘛，就成為社會中不上不下的廢青，每日捱生捱死，返工等放假、放假再等放假…

所以第二部分的生涯規劃，叫做「工作後旅行」。讀得成大學的竟然只能搵萬幾蚊，同未讀過書的洗碗工人一樣咁高；然後社會就同你講，俾心機捱三五七年啦，到時就可以買樓娶老婆－咪住先，買樓？！原來生涯規劃的最終目標，就是用幾百萬買一個百幾呎的劏房單位住？以前班廢老由生捱到死就是為一層樓，但而家樓價已經完全同薪金脫勾，一般打工仔不吃不喝十幾二十年，都儲不到首期，咁點解仲要買樓？！

於是，「工作後旅行」成為新一代的生涯規劃：反正錢又儲唔好、樓又買唔到，你估真是返少幾次鄉下就買到樓咩！點解唔索性去多幾個唔同的地方，打下卡厄下like俾身邊的人羨慕下仲好啦！

又或者，愛情的生涯規劃就是十幾歲守身如玉、廿幾歲卻一定要拍拖（？！）、三字頭結婚生仔湊細路，到到四十幾五十仔大囡大，遲下再抱孫？

呢D就是人生的意義？

呢個，就是香港人的未來？！

我頂你個肺啦！

原來生涯規劃，是社會「規劃」左我的「生涯」、而唔係我去做「生涯規劃」！呢種，是「生」下來就要「捱」的「規劃」，而唔係「我」做的「生涯規劃」呀！

我直頭覺得，呢個社會、政府、人民，個腦根本就裝左屎。唯有個腦裝屎，政府先會容許一個個年輕的生命對社會絕望而輕生，而覺得全無問題、亦無心解決任何問題；而更加食屎的卻是人民，因為我們竟然會為一個咁食屎的社會簽上賣身契，甘願為奴一輩子。其實成為社會的奴隸，就是我們最終極的生涯規劃呀，點解仲要在學校教呢？委實奇栽怪也；但，為左生計，明日的我們，又繼續為「生」而「捱」，繼續日復一日的為奴下去…

香港的未來，真的是「一片光明」呢。

作者：殷琦

港大表達藝術治療碩士生、教院音樂教育碩士、港大主修中文中史。一舊蕃薯般的孤獨文青。做YouTuber、專欄作家（稿費...）、鋼琴老師、合唱團、作曲卻不懂用電腦編曲。總活在迷霧之中，怨氣太多，希望太少；與你和我一樣，在小小的香港同受壓抑、同唱悲歌、每天僅為生活掙扎求存。興趣在表達藝術治療、哲學、心理學、生活、音樂、藝術、政治、宗教等。小妹專頁：https://www.facebook.com/pages/YanKi/1002326119779241

閱讀後覺得好，請多多讚好及分享～：）