偉大嘅醫學研究,背後未必好道德——從前有個醫生,將佢園丁個仔當係實驗品

 

 

《鋼之鍊金術師》其中一個最令人心碎嘅場面,相信就係妮娜被老豆將佢同隻狗融合成基米拉(音譯Chimera,意即合成獸),然後仲對愛德華講左句:「哥哥陪我玩」。呢個場面,次次「說好了不提」,但成日都會講,人生就係咁。

喺現實世界,其實出現過類似嘅場面,只不過橋段就無咁恐怖,結果呢?暫時唔講住,逼你地睇下故仔先:

曾經,天花(唔係天花板)係非常咁致命嘅疾病,30%嘅感染者會死亡,喺細路仔嘅致命率更高,就算好番都成身疤痕,好多仲會盲住過埋呢一世,所以自古以來,世界各文明各族群,為左醫治和預防呢隻病,都無所不用其極,中國人古時會刮取天花患者嘅焦同膿,俾健康嘅人用鼻吸入,呢啲人就會輕微感染天花,康復者會終身免疫,呢個做法死亡率雖然高達1-2%,但總好過30%。

18世紀嘅歐洲,每年大約有40萬人死於天花。正所謂,死一個人係悲劇,死一堆人只係一個數字,留返喺文獻同埋統計。當時嘅人都流傳,「渣牛奶嘅靚女,係唔會染上天花嘅」,咁迷信都有嘅?又話西方好文明嘅?嗰陣英國有一個醫生,就信到十足十。

佢嘅信,唔係順口開河,佢係有觀察嘅。佢留意到,喺牛場工作嘅人,好容易感染牛痘,即係牛出疹,惹到人,人就會出埋一份,不過通常唔會致命,感染嘅地方爛一排,發幾日燒就無嘢咁,阿醫生將呢樣嘢,同「渣牛奶嘅靚女,係唔會染上天花」連結起來,佢心諗,呢兩樣嘢會唔會有關呢?

然後佢做左一樣,聽落人神共憤嘅事……我諗就咁聽個過程,仆街程度就係妮娜老豆嘅級數。

佢將感染牛痘前來求醫嘅患者嘅膿,刮取並注入佢一個園丁嘅八歲兒子身上,令到嗰個細路出牛痘。睇到呢度,你會覺得無咩嘢丫,梗係啦,牛痘無事架嘛,佢會好番架嘛。而種牛痘試下防止天花呢樣嘢,佢之前好多人都試過做,但之後嗰樣嘢就無咩人夠膽…

當個細路好番,呢個醫生,就將天花患者嘅新鮮滾熱辣膿漿,注入個細路嘅身上……

即係話,個醫生試圖令個細路直接感染天花。而個細路只係23個「實驗品」嘅其中一個。

同鋼鍊唔同嘅,呢個故事係happy ending。個細路,同醫生嘅估計一樣,感染過牛痘,就會對天花免疫。細路無事。

阿醫生個名都係叫愛德華,姓珍納(Edward Jenner, 1749 – 1823),佢就係人稱「疫苗之父」嘅珍納。阿細路叫James Phipps,後來珍納為左答謝佢「肯」做實驗品,俾左個莊園佢打理,一世免租,頤養天年,Phipps 死後仲髒埋喺同珍納同一間教會,阿醫生都算有情有義(好似係)。

幾十年後英國更加利用佢嘅研究成果,化為公共衛生政策,免費為國民種牛痘防止天花。

剩番嘅都係歷史。

 

Edward Jenner. Photograph of a sculpture by Giulio Monteverd Wellcome V0028722.jpg

(個故仔被誤傳成為佢打嘢落自己個仔度)

1873 sculpture of Jenner vaccinating his own son against smallpox by Italian sculptor Giulio Monteverde, Galleria Nazionale d’Arte Moderna, Rome
By https://wellcomeimages.org/indexplus/obf_images/14/2d/c2fb0a8c38259ac53fac12e6eba2.jpg
Gallery: https://wellcomeimages.org/indexplus/image/V0028722.html
Wellcome Collection gallery (2018-03-29): https://wellcomecollection.org/works/y6cfssp7 CC-BY-4.0, CC BY 4.0, Link

 

醫學研究,要應對嘅往往係千千萬萬嘅人嘅生死,為左呢個成果,科學家願意犧牲幾多?如果你係珍納,會唔會願意咁樣搞個健康嘅細路?如果你係個細路,係嬲佢一世定係多謝佢救左全人類?

近年嘅醫學研究,包括各類「人羊混合」、「人豬混合」胚胎研究,已經係講緊利用人類幹細胞培植人類器官,所謂嘅人類幹細胞,就係可以發育成唔同人體細胞嘅最原始細胞,呢類研究,往往就會帶出「人造人」、「基米拉」等等嘅猜想,亦會因此帶來「科技與道德」、「人類應否僭越神」之類嘅激辯。

21世紀醫學昌明,我哋未必會明白日日都有人喺隔離死嘅感覺,身為享受科技成果嘅屁民,我只會感謝先賢嘅不懈努力,多謝佢哋為左人類嘅文明奉獻佢哋嘅智慧同汗水,甚至係自己嘅名利。

 

作者:容樂其

我覺得總編輯都有得出文係常識囉!

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 184679
Date: 2018-09-01 18:43:21
Generated at: 2019-03-22 15:09:00
Permalink: https://www.vjmedia.com.hk/articles/2018/09/01/184679/偉大嘅醫學研究,背後未必好道德-從前有個醫