女生睇戲溝仔攻略

 

 

溝仔/女其實都離唔開行街食飯同睇戲。三個活動之中,睇戲係最多可能性,話哂戲院黑媽媽,個個又專心望住螢幕睇戲,對於姣婆同脂粉客黎講絕對係一個可以發生好多野嘅地方。

最常聽d人叫仔仔帶女女去睇d恐怖片,咁女女驚嘅時候就會撲入你懷中啦!咁正常都萬試萬靈嘅,因為當仔仔約去睇恐怖片時,女女其實都已經大概估到你想點,一到d緊張位就算唔驚都會交戲捉實你手臂,俾機會你安慰下佢、攬下佢。不過我就試過睇套一d都唔驚嘅辣殺片,搞到我戲都交唔到(或者係我d戲太屎,my bad);又試過個仔仔仲驚過我,可能只係影住個黑房有d緊張音樂,佢就驚到捉住我隻手,再緊張d時仲想匿喺我身後,諗返都幾搞笑😂

另外有人會建議d女女唔好帶褸,借d依話凍就叫個男仔借件褸褸下。呢d屎橋我梗有用過啦!但而家有幾可d仔仔會帶褸出街呀~好彩嘅仔仔咪順手攬住你,唔好彩仔仔怕醜/唔識做咪成場戲喺度凍到震囉!

我有個幾有趣嘅經驗。話說我約左新仔仔去睇戲,一坐低未開場佢就話凍,我心諗反客為主咁新穎?!咩玩法?!但老娘行走江湖幾十年係唔會俾仔仔大到我嘅!我就問佢咁洗唔洗我俾d温暖你?然後就一下撓住佢再拖住佢,再雙手好温柔咁搓暖佢隻手。咁既然都橋住隻手,就好順便咁埃埋落佢個手臂度。諗住舒舒服服挨着睇戲,點知呢個時候佢居然縮開隻手隻手,我當堂嚇一嚇。

但原來佢縮起隻手,係想搭住我膊頭,佢隻手搭落嚟嘅時候仲輕輕攬一攬我埋佢度,我地嘅距離又近左,我個頭就好自然咁挨左落佢個胸肌度,仲聽到佢啲心跳聲。我話:「你個心跳得好快喎!」佢話:「見到你緊張呀嘛~」咁套戲都未開始我地就熱哂身,咁之後當然無乜專心睇戲啦🤣

其實我就唔建議大家一黎就好似我咁浮誇嘅,尤其係男性。因為女人就算做得進取d都唔會驚對方叫非禮先啦😂男性同初次約會嘅女性有任何身體接觸之前,請先確定對方係對你有一定嘅好感先至有所行動。嗱!唔好以為對方應約就一定係對你有好感,有時有d女純粹貪小便宜,見有得免費睇戲所以就出嚟。我個人就唔會有呢個取態,因為我覺得最貴嘅cost唔係錢,而係時間,如果同冇興趣嘅人去睇戲,就係浪費左時間又浪費左套戲。其實我覺得最好就AA制,或者我請你睇戲,你請我食飯咁。

講返正題,雙方嘅身體接觸應該要循序漸進,例如先係挨近啲佢等大家膊頭貼膊頭試下水温先,之後再試搭膊頭,成功左先再諗攬攬錫錫啦~仲有個溫馨提示俾啲小毒撚,雖然毒撚切忌有自信,但又唔好驚到下下都要得對方同意先有所行動,唔洗問人「我可唔可以搭你膊頭呀?」咁嫁,總之睇準時機一手搭落去就得㗎啦!

約女去睇戲仔仔有幾樣簡單基本野可以做。第一,帶一件外套,如果女女真係凍嘅時候,就擺出黎輕輕咁幫佢披着件外套,咁就可以順便搭埋佢膊頭啦!第二,一入場記住要清除你地之間最大嘅障礙,就係位同位之間嘅手柄!你哋中間有個手柄嘅話你又點攬住佢睇戲呢?所以記住一坐低就好拉起佢,如果唔係對方一挨住個手柄,你就好難郁到佢。第三,如果對方冇特別要求要買爆谷,就唔好買,因為嗰桶爆谷會成為咗你同佢拉近距離之前要清除嘅障礙,如果係大炮谷嘅話,可能真係食咗半場,你先真正可以開始向對方埋手。

入戲院睇戲絕對係一場進可攻退可守嘅攻防戰。一方想攻陷,另一方都有機會想防守,尤其係約網友出黎見,見到先知中伏又甩唔到身嘅時候。防守嘅一方只要將上面嘅溫馨提示調轉黎做就得啦!首先當然就係自己外套自己帶啦!另外入場前買一桶大嘅爆谷,入到場就塞比對方攞住,由得佢慢慢食,咁佢對手就唔得閒搞鳩你啦!仲有一入到場記住要拉低你地中間個手柄,然後擺支飲品放喺個飲品位,再用手踭頂住,咁佢就點都越過唔到條防線啦!咁我諗你嗰個幾兩個鐘應該可以平安過渡嘅~如果真係好唔掂,梗係借尿遁啦!

講咗咁耐,可能有啲人話我入戲院睇戲就真係專心睇戲㗎喎!咁你咁專心,點解唔一個人去睇戲,要叫多個人陪你?有條女響隔離都專心睇戲,一係就條女唔掂,一係就你on9啦!無補充!

 

 

作者:何夢

何夢
大學畢業後無業幾年,自稱專業廢青。而家塭到正職,決定疊埋心水全力邁向廢中之路。

閱讀後覺得好,請多多讚好及分享~:)

其他熱門文章

  • 【遊戲新聞】最強多人喪屍遊戲 《Left 4 Dead 2》相隔十年推出最後大改版 by 五木
    經典遊戲《Left 4 Dead 2》推出超過十年,話佢係最強多人喪屍遊戲應該都無乜異議(雖然我覺得一代正啲) […]…
  • 攝灶罅 by MT Mabel
    現今女性愈來愈多單身、拍散拖、遲婚、甚至係再婚又再分,問題在哪?先不談外表,皆因樣貌和身材絕對可以用錢解決。抽脂、隆胸、削臉、拉皮、開眼角、下巴增新…揮一揮荷包,一頭半個月就變成馬蹄露咁靚啦,完全不是問題!但有兩種特徵,分別叫「大鼻」和「避…
  • 失戀時,朋友講嘅野,聽下好喇! by 壞孩子
    佢地唔係你,唔知你個心有幾多掙扎,唔知你同個ex嘅經歷同佢俾你嘅感覺,就算你講左,佢地都係當故仔咁聽。而且,朋友為免你傻落去,通常都會叫你放手,話個人唔值得你等或者挽留。但你聽完,就算心知肚明,你鬼做到咁灑脫,如果你得,朋友就唔洗成日睇住你…
  • 中同聚會——一直未解開的心結 by P's虐心者
    那是歇斯底里的遺憾,我常夢到自己能夠回到中學,改變這一個事實,「和班裡的同學打成一片」可惜再也不能,一生人只有一次就讀中學的機會......…
  • 暖男養成記 by 三個水
    暖男好似太陽咁,俾人溫暖,體貼,顧家,更甚者鍾意貓貓狗狗。囡囡抱怨同學hea做project、教授openbook考試難或者補習辛苦,普通毒L淨係識合埋把口,或者同囡囡講道理,「係咁架啦,讀書(做野)係咁辛苦啦」。囡囡即刻收聲。而暖男就會好…
  • 【真人真事】小表妹的胎前記憶 by 表姐
    「你仲記唔記得喺媽咪個肚果陣係點架?」 「唔記得啦」 「再之前呢?未去媽咪個肚之前你喺邊架?」 「喺個天度」…
歡迎讚好我們的facebook page,免費資訊源源送上。

文章資訊

ID: 184709
Date: 2018-09-03 05:25:38
Generated at: 2020-09-24 09:48:00
Permalink: https://www.vjmedia.com.hk/articles/2018/09/03/184709/女生睇戲溝仔攻略