開堂 Training 教寫辭職信

小編成日都講一句，合則來不合則去，覺得唔適合的話，走唔係問題，但係辭職唔好搞著大家啦。如果你係第一次辭職嘅， OK Fine，當你唔識寫辭職信，但係如果你轉過一兩份工，或者有返少少 Sense 嘅，麻煩上網搵搵，到底咩先叫一封正正常常嘅辭職信。大家睇睇平日 HR 收收埋埋點樣嘅辭職信……

1. 用公司信封 + 公司信紙

經常有同事走上黎遞信，真係齋遞信，又唔講咩事。未打開封信，剩係見到個信封，小編已經心諗咩料？唔通之前出嗰封 Bonus 信打錯左？喂呀！打開左封信發現係辭職信黎嘅……先唔講公司信封同信紙係代表公司出嘅正式嘅書信呀、合約等等，你自己辭職可唔可以用返自己嘅紙？一張白紙已經好足夠架啦，如果你想慳，可以唔駛信封都可以，但最低限度唔好用公司嘅信封或者信紙去做私人野。

2. 色香味俱全

上面講到用白紙，無錯，用一張純白嘅紙張，或者用環保紙張（唔係講緊背頁寫左野嘅環保紙，係用環保物料整出黎嗰啲紙），但係唔知點解成日小編收收埋埋嘅信都係色香味俱全，試過有茶漬、油漬、水漬；又試過真係用環保紙，後面畫到花哂嘅；亦都試過摺左幾廿摺，摺到連啲字都好似睇唔到咁。

3. 上款寫上司名但交俾 HR

睇真啲封信，上款寫上司個名。嗯，無咩問題丫……咪住？咦，點解係個同事自己親手交上黎小編到嘅？問多兩問，發現原來個同事無俾上司，直接交左上黎俾 HR，仲要話封信交俾 HR 都係一樣姐……唔該，一唔一樣唔係你講，既然你上款寫俾上司嘅，你就好自己交俾上司啦，當小編係咩？你 Personal Assistant 呀？幫你交哂俾相關嘅人士？

4. 今日寫信跟住今日 Effective

再睇落去，寫到 Effective Date 係今日……咦？即日通知？要賠錢喎……再問下，原來同事知啲唔知啲咁，以為 Effective Date 係寫寫信嘅日子，搞到變左今日寫信今日 Effective……

5. 唔簽名

去到最後，唔簽名！唔簽名代表咩？代表任何人都可以被辭職，小編求其寫一封信去幫求其一個同事辭職都得，甚至幫你直接今日辭職，等你賠錢都得？唔簽名嘅辭職信你話有無用啦……

老老豆豆，到底幾時先可以唔收千奇百趣嘅辭職信？唔該唔識寫辭職信嘅朋友仔，睇下下面到底一封正正常常辭職信最基本有啲咩。

1. 用白紙寫 / 用電腦打（用唔用信封入住都無所謂）

2. 上款寫上司 / HR 經理（封信直接俾上司得架啦，佢自己識交上黎 HR）

3. 基本辭職理由（可以唔講理由係咩，但最低限度寫句「因私人理由」都好）

4. Last Day / Effective Date（哩個係好多人都會錯，所謂 Effective Date 姐係講緊你辭去職位到底係幾時開始生效，姐係 Last Employment Day 之後嘅一日，或者簡單啲，直接寫到底你想返到幾時。）

5. 寫全名 + 簽名（記住寫清楚自己咩名，同埋簽返自己個大名落去先有效）

希望各位朋友仔都可以寫到正常嘅辭職信……謝謝。

Hea 爆冷知識：

講開 Effective Date，離唔開都要講下 Last Employment Date，而講到 Last Employment Date，就不得不提通知期。大部分過左試用期嘅朋友仔都最低限度要一個月通知期，但係點樣先數到一個月出黎呢？ 30 日？下個月同一日？根據返 Cap 57 《僱傭條例》第 6 條 (4)：「月 (month) 指由發出終止僱傭合約通知之日起計，或由僱傭開始之日起計(視屬何情況而定)，至下個月份同一日的前一日終結時的一段期間，如下個月份並無同一日，或如發出通知或僱傭開始之日為一個月的最後一日，則至下個月份最後一日終結時的一段期間。」

簡單啲，總結為以下嘅 3 個例子，假設全部都係 1 個月通知期。

例子 1（下月同日的前一日）： 如果 2 月 15 日遞信，最後工作日就係 3 月 14 日。

例子 2（月尾最後一日）：如果 2 月 29 日遞信，最後工作日就係 3 月 31 日。

例子 3 （月尾最後一日）：如果 1 月 31 日遞信，最後工作日就係 2 月 28 或 29 日（視乎潤年與否）

【職場膠事】

作者：HR 扮工週記

HEA 到核爆、哩埋係枱底畫下圈圈直至 2046 退休既 HR，同大家分享一下每一日 HR 平淡既生活。

閱讀後覺得好，請多多讚好及分享～：）