Malena 的偽術

一首《人妻的偽術》唱出了一眾為人內子嘅心聲，不論是猶沉醉在新婚之喜當中，抑或是歷經七年之癢，同樣覺得感觸。為一個男人委曲求全可是值得？現今人視婚姻為一紙證書還是一輩子承諾，各位心中自有公論，但結婚亦不是代表關係穩固的標誌，周慕雲講過──「邊有咁多一生一世」，點樣維繫長久嘅婚姻，其實取決個人方法。

不過這首歌反倒令我想起早排一齣電視劇「短暫的婚姻」，倒轉頭看，這首歌就好似林夕為Malena度身而做一樣。

「寧願和氣那面盡量被看得見
成為賢內助令大家都滿意」

從旁人眼中所見，Malena的確是個幸福的「人妻」。老公事業有成、有個可愛嘅小朋友、無所不談隨意分享心事嘅閏蜜、搬到大部分港人都想住嘅何文田中產區，聽起來是一個很完美的生活。

「如你愛笑我對大事並沒有主見
要軟弱笨拙亦熟練」

Eric Kwok經常笑Mal大頭蝦，不懂一心二用照顧自己同小朋友，就連駕車都會將車衝上路壆。其實Mal並不笨拙內心亦不軟弱，要成就大男人的性格早已學懂把自己真本性全部收藏在以前做設計師時的Studio。

誰知道世界就係如此殘酷，好人往往早死一點；好心不代表有好下場，任Mal如何演練出持家有道嘅「賢內助」，事業有成嘅男人總逃不過野花的親近，Eric Kwok以為自己能夠瞞天過海藉應酬為故偷腥為實，其實Mal早已洞悉一切，只係不忍揭發留有一絲希望Eric Kwok只為逢場作戲。

「但願在浴缸中赤裸的我
就是做回真得似假的我」

感情不似沙中線般，唔係灌漿就可以填補裂縫；裂縫填補水會停止滲入；但心中隙縫會不斷流血，呢個時候出現Galen就似打開Mal心底嗰把鎖嘅鑰匙──「其實小朋友始終都會長大，我哋做父母嘅唔應該為佢哋放棄太多」。Galen一字一句都似刀鋒將Mal的真面目挖出來。

「清官難審家庭事」，男女關係好多時亦很難分誰對誰錯，Mal為Galen放棄一切最後都落得心酸下場，結局不知Mal同Eric Kwok有否再次走到一起，不過如果Mal當時聽到這首歌的話，對二人關係又會否有另一種看法呢？

「講真只懂率性只與任性相差一線
真心跟假意 也只差一線你便難入眠
圓滑到 能並肩 感激你 能合演 能受騙」

如果當初Mal選擇繼續扮無知，哄哄騙騙過一世又會點樣呢？套用Galen的一句歌詞：
「一起這種藝術　若果只是漫長忍讓　應感激忠心的伴侶」

作者：陸玥醉

閱讀後覺得好，請多多讚好及分享～：）