【愛情實況系列】想由異性知己變情人，情關闖唔闖得過？

唔知大家記唔記得，好多年前，葉倩文有一首歌，叫《情人知己》？首歌講一個女仔，有一個異性知己，兩個人互相關心同了解。突然有一日，異性知己向歌曲中嘅女主角示愛，女主角好驚訝咁發現眼前嘅知己「其實你對我癡情，藏在暗裡已多年，在這天終於要說一遍」。呢首歌，令人想起一個問題：「男女之間可唔可以單純咁做知己？」而呢個問題，就令我想起以下嘅故事。

我曾經識得一個女仔同一個男仔，當時兩個都好年輕，都冇拍拖。佢哋係同事，男仔入職稍為早過個女仔幾日。由於大家年紀差唔多，而且都係新仔新女，入職初期，經常一齊食LUNCH，而且會互相分享工作上面對嘅問題。職場新人類互相支持，係好自然嘅事。

好多時，當熟識咗新工作、適應咗新環境、同其他同事熟絡咗之後，一般職場新仔新女都會另有天地，未必再同原先同期入職嘅同事行得咁埋，但係呢對新仔新女，似乎越嚟越熟絡，行得越嚟越埋。佢哋起初座位距離比較遠，工作期間接觸冇咁多，後來調咗位，坐得好近，平日交流嘅機會就多咗好多，慢慢仲出雙入對。

而事實上，呢對新仔新女啲偈，真係傾得越嚟越多，亦因為咁，佢哋都覺得日常工作幾開心，時間好快過，名副其實快樂不知時日過。其他同事見倒，都覺得佢哋有啲似拍拖，有一個男同事問個新仔：「乜你哋咁多密偈傾嘅？」新仔冇回應。

冇幾耐之後，新女喺工作上同屋企都發生咗啲事，好唔開心，亦好擔心。順理成章，新仔就成為佢傾吐嘅對象。佢哋冇話特登約出嚟，但好多時放工之後嘅夜晚，或者星期六日，都會通電話，有時一傾就兩三個鐘頭。兩個人乜都講，除咗工作同家事之外，亦會講好多自己嘅內心世界。新女對新仔講：「同你傾偈好舒服呀！」新仔聽咗，好開心，佢何嘗唔係好舒服吖？到咗呢個階段，兩個人都覺得，對方好了解自己內心世界，關係已經唔再係普通朋友，而係可遇不可求嘅知己。

所謂人非草木，一對後生男女去到呢個階段，難免會有「再進一步」嘅想法。問題係：「再進一步」，係兩個人都咁諗？定係只得其中一方咁諗？如果係前者，就皆大歡喜。但如果係後者，就真係好大問題。

過咗幾個月，新仔感覺倒，自己已經鍾意咗新女，好希望新女能夠由知己變成情人。但新女鍾唔鍾意自己？唔知！因為即使好知心，兩個人之間，從來都唔會講一個話題──愛情。無論點知心都好，愛情，似乎係佢兩個眾多話題之中，一個神秘嘅禁區。

內心嘅愛火越燒越烈，新仔真係好想向新女表白，但又唔知新女會有乜反應。呢個新仔，非常重視友情，佢好擔心，一旦講出嚟，如果新女接受唔倒，會即時影響大家嘅知己關係。所以，平日同新女相處嘅時候，新仔表面冇嘢，其實內心好忐忑。「我應唔應該話俾佢知我好鍾意佢呢？」新仔一直俾呢個問題困擾住。可惜，佢唔可以向自己身邊嘅知己分享呢方面嘅感受。

有一次，新女打電話俾新仔。當時新女好唔開心，一路講一路喊。作為知己，新仔知道嗰排新女有啲情緒不穩，家下一路講電話一路喊，唔知會唔會出事，就即刻趕去新女屋企。入咗屋，當時新女屋企冇其他人，只有佢哋兩個。兩人好自然咁談天說地，大約一個鐘頭之後，新女情緒平伏翻，冇再喊。當時已經係夜晚，新女煮咗碗麵，遞到新仔面前，仲話：「今晚就等我服侍你啦。」

睇到呢度，看官可能會以為，呢句係好明顯嘅暗示。當晚喺新女屋企，得倒一句咁嘅說話，仲只係得佢哋兩個，新仔今鋪一定得米啦。咁樣諗就實在太樂觀。佢哋都係好純情嘅青年。新女所講嘅「服侍」，就真係只限於「煮碗麵」。新仔係佢知己，當然亦好明白「服侍」只係等於「煮碗麵俾我食」，就係咁簡單。不過對新仔嚟講，嗰碗麵真係天下間最大嘅美味。當時佢一路食麵，一路諗：「我係咪應該向佢表白呢？」雖然個心好想，不過新仔覺得暫時未係適當時候，就忍咗落嚟。食完碗麵，見倒新女情緒已經完全冇事，新仔就離開，內心有千億個唔捨得。

又過多幾個月，新仔覺得時機成熟，多少都有啲把握，決定做一次大膽嘗試──向新女表露愛意。不過，當佢正準備表白之際，新女向新仔講咗一個好大嘅私隱：「我鍾意咗一個男仔。」新仔諗：「會唔會係我呢？」即時好緊張但又勉強平靜咁問：「個男仔係邊個？」新女話：「係我教會入面一個男仔，不過佢仲未知。」新仔個心，即刻由天堂跌落地獄。

希望幻滅，已成事實，問題係，出師未捷身先死仲好啲，起碼都叫做出咗師，嘗試過。而家係未出師就玩完，新仔覺得自己身為男子漢，冇理由連「我愛你」咁簡單都唔敢講。何況，即使個女仔已經鍾意另一個，都只係暗戀，未成事，點可以輕易放棄咁鵪鶉？終於，有一晚，佢鼓起咗最大嘅勇氣，約新女出嚟，到一間餐廳，準備講佢當時認為係佢人生最重要嘅一句說話。而賭注就係一段得來不易嘅知己關係。

食飯嘅時候，新仔由始至終神不守舍，新女先係問：「你做乜事呀？」新仔話：「冇事。」新女再話：「你今晚好唔妥喎！」呢個時候，新仔終於忍唔住，講出佢一直好想講，但又唔敢講嘅說話：「我鍾意咗你！」

雖然係知己，但新女都估唔到新仔會講呢一句，好愣然，一時間DEAD AIR咗大約十秒。然後新女強作鎮定咁話：「喂，咪玩啦。」新仔好肯定咁講：「我好認真架。」結果，一啲都唔令人意外──新女好肯定咁拒絕咗新仔。

食完飯，兩人坐車翻屋企。分別前，佢哋各自向對方講咗一句話。新仔好堅定咁話：「無論你接唔接受我，我永遠都唔會忘記你。」新女亦好唔開心咁講咗作為知己嘅最後一句：「多謝。」

新仔呢鋪賭輸咗，仲輸得好徹底。一段時間內，佢情緒勁低落，每日都想住新女，好掛住佢，但知道唔應該再搵佢。不過新仔從來冇後悔，因為佢覺得自己起碼努力過、嘗試過、面對過，冇逃避。自己仲後生，仲可以重新再嚟。唯一遺憾嘅，係一段難得嘅知己關係，就咁一去不返。

至於新女，後來亦係出師不利。佢鍾情嘅嗰個男仔，原來已經心有所屬，仲要係一個大過個男仔四年嘅熟女。新女亦係用情好深嘅人，知道之後，非常傷心，大喊咗一場。佢好坦白咁同人講：「我後生咁多，唔明點解我會輸俾嗰個女人！」

新仔新女後來就冇再聯絡，你有你嘅生活，我又繼續我嘅忙碌。一段知己友誼，情關始終闖不過，冇辦法維持落去。

按道理，異性知己之間，係可以有愛情以外嘅純友誼，不過又係嗰句──人非草木。想由知己變做情人，係人之常情。問題係：「由知己變情人，呢個情關闖唔闖得過？」如果你問我，我會認同新仔嘅做法：「WHY NOT?」

人生苦短，青春有限，唔理知己唔知己，大膽追求心中所愛，無負青春，先至對等得住自己嘅人生。

【愛情實況系列】

老夫少妻？公司總有個八婆會幫你棒打鴛鴦……
姐弟戀，你 / 妳接受到相差幾多歲？
如果女人要俾帽你戴，買埋層樓俾佢都無用！
一對閨密好姊妹，同時鍾意一個男神，點收科？
寂寞妹妹主動搵大叔，真係會有好結果咩？
曬靚樣又曬富二代男友，會有乜結果？
大叔戀上學生妹，結果係？
咁嘅CHEAP 男都有女神死心塌地！呢個世界公平咩？

作者：問世間

不善談情，但求懂愛；不作失實，但求寫實。

閱讀後覺得好，請多多讚好及分享～：）