【香港文化質素隕落】喜茶都排長龍,茶客爭相呃Like

 

近幾年,我發覺香港人越發鐘意排隊。由以前「邊間野好食就去排隊」到到「演唱會撲飛又去排隊」、連買個月餅都排一餐隊,而今年喜茶的登陸,成功讓呢種排隊風潮發揮到了極致。

自從今年由自由工作者身份轉為全職工作(即使我已工作多年…哈),我尤其感受到時間的寶貴——即使我幾準時收工都好,香港地一星期44粒鐘工作都是最低消費。放工之後無耐就天黑,時間根本就不等人地一分一秒的溜走—可以的話,我幾想每日都放假,做自己鐘意做的野。但,大家時間咁寶貴之下,卻竟然有一大班笨蛋、為左跟風、排隊排一兩粒鐘都在所不惜。即係咁,排隊還排隊,都睇下果樣野既價值,值唔值得你排啦。為左杯二三十蚊的野飲,居然有大把人甘願排一兩粒鐘。雖則話杯嘢飲唔係好貴,但係你嘅時間一樣係金錢;喜茶要人等咁耐,同樣嘥緊我地嘅錢,咁點解大家又願意畀佢「嘥錢」呢?好明顯大家都係跟風啫。

利申,本人都飲過一次喜茶,當時在強國等左大半粒鐘到,試過亦唔覺得好味到曉飛——咁點解我飲?因為老公想試囉,結果相都無影張,卡都無打。其實我都知喜茶要等好耐,但我總是覺得成件事好有問題,既然要人等咁耐,點解唔開D分店、或者在沖泡方面加快速度?商人總是唔想得罪顧客,賺更多的錢,點解佢仍然要人等咁耐?

而出現呢一種預咗要飲一杯茶、動輒排隊一個鐘以上,然後重點是打卡呃Like的風潮,已經完全感受到香港人的文化劣質化——香港人曾被英國統治,接受的那種英式文化素養與Dignity仿如蕩然無存(但我亦絕非祟英,只是就事論事,英國文化素養總比起強國後文革時代的禮崩樂壞好吧?!),剩下的只是一班港女(甚至港男)狗衝排隊,為的只是一杯無無謂謂的野飲。

當我哋喺度鬧啲香港廢老對香港民主冇付出,我真係想問,新嘅一代呢種生活態度又有幾可以令到社會改變?當社會問題多到仆街,土地大辯論、沙中線沉降、中國假疫苗風暴等等在在影響民生需要,呢啲嘢卻完全提唔起公共關注,反倒係一杯完全無公共性可言的「黑糖珍珠鮮奶」,一間「喜茶」,就竟然可以令到新一代狗衝,成為網絡熱話,呢啲又係咩質素?(而我曾經寫過文章,談及Why Not Both的問題。即係點解我地唔可以既追捧喜茶,又關注時事呢?最後我得出的結論是,很簡單,因為人的時間很有限,你追捧喜茶,排隊排一兩粒鐘,呢件事已經Consume你好多精神時間,咁你仲邊有時間理其他更有價值(Sorry 我真係覺得關注社會議題的價值比起排一杯野飲的價值高…)的野?)

其實,飲喜茶本身呢件事是中性的,甚至即使它是強國品牌,我唔認為呢樣野就影響差左香港飲食文化。反倒是香港人呢種盲目追捧認威、以為自己排到隊好叻叻豬、打卡呃Like,表面風光實際膚淺嘅心態與態度,呢個先係有問題。無架啦,香港人真係無得救架啦。

 

 

作者:殷琦

殷琦
港大表達藝術治療碩士生、教院音樂教育碩士、港大主修中文中史。一舊蕃薯般的孤獨文青。做YouTuber、專欄作家(稿費...)、鋼琴老師、合唱團、作曲卻不懂用電腦編曲。總活在迷霧之中,怨氣太多,希望太少;與你和我一樣,在小小的香港同受壓抑、同唱悲歌、每天僅為生活掙扎求存。興趣在表達藝術治療、哲學、心理學、生活、音樂、藝術、政治、宗教等。小妹專頁:https://www.facebook.com/pages/YanKi/1002326119779241

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 184762
Date: 2018-09-04 05:27:20
Generated at: 2022-09-28 14:22:28
Permalink: https://www.vjmedia.com.hk/articles/2018/09/04/184762/【香港文化質素隕落】喜茶都排長龍,茶客爭相呃li