咁大間公司嘅頂頭腦細，竟然信問米？！

究竟一個人要去到幾絕望，才會依賴神鬼之說到這個地步？

腦細縱橫商界廿年，每年都會約風水師傅上來公司『覆診』，蘇師傅、李師傅、麥師傅、黃師傅等等，每隔幾年就會見到，至於邊年配邊位師傅，聽聞是看緣份的。

兩年前，腦細認識了一位印尼師傅，師傅可以按你的中文名字，講出你的性格與前半生遭遇，公司大部份高層都被邀請與這位師傅見面，見過面的，都話好靈、好神奇。

自此，腦細改了名；另外，公司亦多了很多『法器』，話對生意及和諧有幫助喎！我睇數嘅，淨係睇到對師傅生意有幫助，所謂的『已開光法器』，差不多七位數字！七位數字！七位數字！

之後兩年，公司轉型，生意一落千丈，有一天我忍不住問腦細：有無諗過改返個名？

腦細：「師傅話好彩改咗名，否則已死無疑！」

我心諗：「（咁都得？）」

上星期，跟腦細開完例會，佢神神秘秘話我知識咗個神醫，神醫好勁，問你中文名之後望你一眼，就知你咩事。

我：「又係中文名？望一眼就知？佢係唔係養鬼仔呀？」

腦細：「總之佢講得出我呢兩年事業好辛苦，又講得出我心臟有事，最厲害係講得出阿仔今年會結婚，我都無同佢提過！」

（腦細，令公子結婚呢單嘢，你高調到樓下看更都知喎！）

我：「咁佢有無話點幫到你生意？」

腦細：「佢話幫唔到，不過介紹咗九叔比我，九叔可以請神仙上嚟問下公司發生咩事？」

我：「咁你見咗九叔未？收幾錢？」

腦細：「九叔尋晚上咗嚟，好似做戲咁，佢對住個窗開壇，沈咗啲米、灑咗啲水、唸咗啲咒，然後就請咗個神仙上嚟。。。佢話我哋公司有個好唔 loyal 嘅同事！」

我：「神仙講英文？」

腦細：「唔係，九叔吟吟沉沉，我唔識聽，係神醫翻譯嘅。」

我：「咁我哋咁多同事，係邊個？」

腦細：「佢話係觀塘嗰邊 office。」

我：「咁即係 PR、Admin、IT、Finance、R & D、Operations 啦！」

腦細：「我都唔知係邊個，你話呢？」

（腦細，好明顯你跣緊我喎！）

我：「你真係唔知？」

腦細：「真係唔知，可能係已經走咗嘅同事啦！」

（哦！明啦，走咗得 COO 一個啫！）

我：「咁佢收幾錢？」

腦細：「一萬。」

唉。。。究竟一個人要去到幾絕望，才會依賴神鬼之說到這個地步呢？

此刻我不期然想起小甜甜與陳先生的故事，腦細，我應該提一提醒你嗎？

我身邊那位智者答：扮瞓的人是叫不醒的。

作者：沒有句號

在職媽媽，出來社會工作超過20年，見證了人性的可愛與可恨，很想把這些故事寫下來。

閱讀後覺得好，請多多讚好及分享～：）