【塔羅個案】有位想投身藝能界嘅女子同我講「紅咗我會提攜你架啦」

文教 / 最新文章綜覽

 

客人種類繁多,黎自各行各業嘅都有,當中亦包括從事娛樂業界,或想要投身幕前嘅人。

咁,無野嘅,業內中人大多友善,有時仲會同我講下行內花生,不過牽涉人事複雜,文章中就不多詳述了;倒是我遇過不少想要投身娛樂圈的客人,自信滿滿,言談間不斷流露出自己深信自己能夠超越某某、能夠青出於藍等等想法。

又,有自信固然是好,畢竟將自己面對公眾,少點自信、少點 EQ⋯⋯或者阿 Q,相信都成不了事。不過,我只能輕勸一句,自信,以及未紅先驕,是兩碼子的事。

近日好多選美才藝明星比賽,無論你有無睇,利申無睇,但相信你就算無睇,但喺 Facebook 點都會見到呢啲活動。

以下人士,Maple 是化名,佢同樣參加左以上某個比賽。我係庸俗人,你話要入娛樂圈,我會期待見到啲好有氣質、或者好靚好有吸引力、或者,好有個人特色(in a good way or bad way)嘅人。

Maple 就咁睇,又唔算中左以上任何一項,或者佢肺容量好好,或者唱歌好好聽,擁有可以用京劇腔唱「蘋果加玫瑰 令你更嬌麗」呢啲才藝啦,總無理由叫個客即刻才藝表演比我睇嘅,《America’s got talent》都有好多一鳴驚人嘅藝人啦,係咪先?

不過自信到好似 Maple 咁自信嘅,又真係少見呀。

「我贏到架可?」Maple 戴住一副墨鏡,「我為呢一刻等待左好耐。」

贏唔贏到,我就睇牌架啫,咁當然,我寫得呢篇文,用啲咁嘅八婆 Tone,佢副牌就當然唔靚得去邊架啦。比賽嘅野,參加左就一定唔會有損失嘅,係就可能會有啲樣衰,但係點都叫會增廣見聞嘅。

我就好直接咁同 Maple 講,「目前睇唔到你會贏噃,因為⋯」

「但佢亦都無話我會輸吖嘛 right?」Maple 並無聽哂我嘅說話,「佢無話我會輸,我就有可能贏。」

我打左個突。首先比人打斷我解牌我有啲灰,二來,Maple 姐嘅 Logic 我又唔可以話佢錯,但係兜口兜面聽到有條友咁自信又中二地肯定自己嘅能力,我真係除咗「啱呀」之外就唔知要比咩反應。

但最爆嘅,係佢問完牌之後嘅事。

話說 Maple 姐言談間透露,自己將 Facebook IG 上面嘅 Friends List 同埋舊 Post 不斷 Delete 緊,「紅左就會開始有狗仔隊起我底,所以我做好準備先。」

見到佢行事咁⋯未雨綢繆,我心諗⋯⋯

而佢當日離開舖頭之前,煞有其事咁樣戴返好副黑超,「你放心。」Maple 撥一撥頭髮,「我紅左都會記得你,我可以帶協你入行識人 if 你想。」

嘩,我嗰下嘅心情,真係難以用筆墨黎形容,我應該講「多謝」定應該講「有心」呢?我唔知呀,我好迷惘,結果我淨係有少少 Kai 咁微微笑 Maple 就走左。

咁⋯我唔知佢最後有無真係去參加選明星,因為我喺 Facebook 啲報導上面並無見過呢個人出現,可能我睇漏眼,或者佢後來都係決定參考副牌嘅建議啦。

不過,如果佢仲係想入行嘅,我⋯⋯都會祝福佢嘅!

 

【塔羅牌個案分享】

你話想生仔我咪唔避孕囉,我家下有咗你就叫我落?
名校老師婚外情的故事
女人就黎三十歲仲係 A0 係咪就叫有問題?
中女不諱言「我有 SP,但我唔會同我老公離婚」
老師的成功要訣:識人、埋堆,攀附權貴;作育英才已經行唔通。
邊個講出「分手」兩個字,邊個就係萬劫不復嘅千古罪人
女性客戶開口埋口「我認為」,咁你有無理過對方點諗先?
我以為個客擔心病母健康,原來佢只係想快啲分身家
分左手後一方面當前男友係兵,一方面上網開 Post 唱對方,咁樣做真係好咩?

 

 

作者:神婆

神婆
非典型占卜師,唔神秘,無形象,除了鐘意聽客人講故事,夜間興趣係打機睇動漫同撚貓。https://www.facebook.com/FortunaMessage

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 184935
Date: 2018-09-09 05:49:53
Generated at: 2020-02-19 17:57:53
Permalink: https://www.vjmedia.com.hk/articles/2018/09/09/184935/【塔羅個案】有位想投身藝能界嘅女子同我講「紅