【愛情實況系列】同從未見過面嘅人發展電話情緣,純情乖乖女會有乜結果?

 

 

近年時興網上情緣,有冇成功例子就唔知,不過最多人聽倒嘅,都係情緣係假,情騙先至係真。網上情緣騙案,受害者多數係女性,佢哋大部分都係喺素未謀面嘅情況下,同佢哋覺得係「男人」嘅網友,建立網上情人關係,之後就變成人肉提款機。最令人驚奇嘅一單,係最近有個地產富婆俾個自稱係「工程師」嘅網上情人呃咗一億八千萬,令人冇辦法唔去重新認識網上情緣嘅威力,尤其係對女人嘅威力。呢單同地產有關嘅網上情緣騙案,令我想起識得嘅一個女仔,當佢仲係做地產經紀嘅時候,所遇到嘅一次難忘經歷──電話情緣。

講到呢個女仔,真係超級純品純情純真嘅乖乖女。連埋佢自己,一共七兄弟姊妹,但除咗佢之外,其餘六個畢業之後走鬼晒,冇人理老豆老母。所以,照顧老豆老母嘅重擔,就由佢一個人揹晒。不過佢真係一個不折不扣嘅純情乖乖女,從來冇一句怨言。

純情乖乖女雖然唔係大美人,但亦都生得唔錯。佢對愛情非常專一,家庭觀念又重,娶着佢嘅話,一定係有福氣嘅男人。但唔知乜原因,到咗廿幾歲,佢都從來未拍過拖。相比於而家好多劣質港女有成班兵跟頭跟尾,呢個世界真係好唔公平。

廿幾歲都從來未拍過拖,純情乖乖女覺得有啲心急,係好自然嘅。不過佢嘅傳統觀念幾犀利,好鬼矜持,要佢主動追男仔,根本冇可能。所以,就只有等,而無言地等所得倒嘅,一直都只係寂寞到夜深。不過後來曙光似乎有出現嘅跡象。

話說純情乖乖女中學畢業後,第一份工係地產經紀。當時仲未流行手機,更加冇而家嘅智能電話,聯絡客人,主要係靠公司嘅直線電話。有一次,有一個疑似客人打電話嚟,同純情乖乖女傾樓盤嘅嘢,純情乖乖女對住個客,當然要耐心聆聽同回應。一般幫襯地產經紀行嘅客人,都唔會只係打一次電話,呢個疑似客人當然唔會例外。不過,打多幾次之後,個疑似客人就逐漸顯露出佢醉翁之意不在酒嘅真正目的──想追純情乖乖女。

有一次喺電話度,疑似客人終於向純情乖乖女表明心跡,話對佢有意思,講得好有誠意。純情乖乖女從來未有過男朋友,情荳初開嘅佢,對戀愛嘅企盼越嚟越強烈,當然即時意馬心猿。

從常理推測,由於地產經紀行對外中門大開,個男人應該係從街外見倒純情乖乖女,產生愛意,然後就扮客人追女仔。個男人之後亦繼續有打電話去經紀行俾佢,令純情乖乖女有一種墮入愛河嘅感覺。雖然只係電話情緣,但純情乖乖女好認真,每日翻工,都望住自己檯頭個電話,希望呢個素未謀面但又話鍾意佢嘅人,會主動約佢出嚟見面。

可以肯定,如果個男人肯約純情乖乖女出嚟,正式向佢求愛,純情乖乖女一定會馬上接受佢。但問題係,個男人一直冇浦頭,亦冇同純情乖乖女交換私人電話號碼,一路都只係打經紀行個電話同個女仔聯絡。冇幾耐,就連電話都冇打,連交代一聲講拜拜都冇。

可憐純情乖乖女,日日等住自己個電話情人打電話嚟,但係就唔知乜原因,等極都等唔倒。過咗一段日子,佢終於接受咗呢段電話情緣已經無聲無色咁結束嘅事實。個男人雖然冇呃佢啲乜,但多少都令佢有一種失戀嘅感覺。為咗呢件事,純情乖乖女好唔開心,但冇乜嘢做得倒,唯有向一啲比較傾得埋嘅女性朋友傾吐。

之後冇幾耐,純情乖乖女轉行做幼稚園教師。比起地產經紀,呢份工更加適合佢嘅性格。但問題係,幼稚園教師呢行,全部都係女性,佢又唔係社交活躍嘅人,平日連接觸異性嘅機會都好少,要拍拖就真係難上加難,結果入職幾年,感情生活仍舊一片空白。

純情乖乖女有個中學時期嘅女同學,好關心佢,好明白佢嘅感受,又見佢已經年近三十,都要趁後生搵個好歸宿,就向佢建議:「你不如報讀一啲興趣班啦,可以識多啲人嘛。」純情乖乖女真係又純情又乖,聽咗之後即刻照做。幾個月之後,女同學問佢有冇進展,但佢話連一個男仔都識唔倒,更莫講話拍拖。女同學覺得奇怪:「冇拖拍都唔出奇,但點解會連一個男仔都識唔倒呢?」再深入咁問多佢幾句,先至知道原因。原來純情乖乖女報嘅,係一個好純情好乖嘅興趣班──插花,全斑都係女學員,一個男人都冇!女同學見倒咁嘅情況,都唔知仲可以講乜。

又過多幾年,有一日,純情乖乖女向當年為佢獻計嘅女同學講:「我打算去影婚紗相。」女同學聽咗,以為佢已經搵倒好歸宿,當然為佢開心。點知純情乖乖女話:「我一直都冇拍拖,睇嚟都冇乜機會,而家都已經三十幾歲,要趁青春留倩影,所以自己一個人走去影一輯婚紗相,留翻俾自己留念。」原來,影婚紗相除咗表示結得成婚,亦係表示放棄拍拖同結婚嘅希望。婚紗背後,原來有兩個完全唔同嘅愛情狀況。

純情乖乖女嘅故事,話俾冚世界嘅男人聽:「你哋如果唔認真去追一個女仔,就唔好隨便向個女仔示愛,更加唔好把口話愛但個人就龜縮,咁唔單只唔係有勇氣男人嘅應有表現,而且仲係會傷害倒女仔嘅芳心。」呢個故事亦話俾冚世界嘅女仔知:「如果想拍拖,真係要擴闊自己嘅生活圈子,同埋不妨多啲做主動。今時今日嘅戀愛態度,太傳統太含蓄太矜持太乖乖女,係唔得架。」

今日,純情乖乖女仍然單身,不過生活充實,有自己精彩嘅人生。喺呢度祝呢個好女仔幸福愉快!

 

【愛情實況系列】

老夫少妻?公司總有個八婆會幫你棒打鴛鴦……
姐弟戀,你 / 妳接受到相差幾多歲?
如果女人要俾帽你戴,買埋層樓俾佢都無用!
一對閨密好姊妹,同時鍾意一個男神,點收科?
寂寞妹妹主動搵大叔,真係會有好結果咩?
曬靚樣又曬富二代男友,會有乜結果?
大叔戀上學生妹,結果係?
咁嘅CHEAP 男都有女神死心塌地!呢個世界公平咩?
想由異性知己變情人,情關闖唔闖得過?

 

作者:問世間

問世間
不善談情,但求懂愛;不作失實,但求寫實。

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 184946
Date: 2018-09-09 22:19:37
Generated at: 2019-10-16 19:02:08
Permalink: https://www.vjmedia.com.hk/articles/2018/09/09/184946/【愛情實況系列】同從未見過面嘅人發展電話情緣