《大師兄》:王晶難得有高質片出品

書文歌影 / 最新文章綜覽

 

最初睇trailer個陣見到王晶呢個名係真係卻步,儘管覺得trailer好正,一嚟覺得宇宙最強近年來不停嘗試新嘅角色絕對係好好嘅一個突破,二嚟成套戲畀我嘅感覺好GTO,好想睇下到底可以拍成點。

最後都係去咗睇。而且值得一讚。

欣賞佢套路簡單,直接,條中路葉師傅入得幾好。有時電影就係要返璞歸真,你有再多嘅星級演員,再勁嘅特技,故事爛又或者多犯駁就冇意思。所以《賭城風雲》系列真係……(係呀又係王晶呀)。近期嘅《逆流大叔》都有異曲同工之妙,不過嗰套相信好多人自己都睇咗亦都有自己嘅一套想法,我就唔多講了。

我更欣賞嘅係呢套電影唔係單純睇甄子丹演一個好好打可以打十個嘅老師,而係睇對今日教育制度嘅批判。

 

 

等我嘗試唔劇透地去講下其中一幕。(大約係咁)佢對住啲高官講:「2014年有十幾個學生自殺,2015年就有三十幾個,而今年2016年過咗一半,已經接近三十個。係學生嘅問題?老師?家長?定根本係成個香港嘅體制出咗問題呀?我哋係唔係應該討論下點樣去制止再有咁嘅情況發生,而唔係只係喺到指責邊個有錯呢?」

呢句真係精粹中嘅精粹,因為今日我哋去討論教育嘅問題,只係不斷講梗邊啲人做得唔好,從來冇人真真正正講個制度使唔使改善。一直以嚟嘅填鴨法、DSE一試定生死、無限補習同操練、甚至乎小三已經要TSA、贏在起跑點or even射精前,呢一切一切,個個都有責任。而最有趣嘅係大部分人都用咗『係咁嫁啦』做理由嚟融入去呢個唔合理嘅制度入面!

 

 

以佢嘅題材同上映時間,我presume套劇係唔會入到班問責高官s嘅眼中,所以佢target嘅觀眾群其實係一班家長。暑假丫嘛,帶啲仔女入戲院睇甄子丹打壞人簡直係一流節目啦!原來係用套戲嚟鬧醒你班怪獸其實已經淪為政府同制度下嘅打手不停操你哋嘅寶貝仔女。對小朋友/青少年而言,朋友老師都係其次,家長先係影響得最深嘅人。而戲入面幾位所謂壞學生正正係畀屋企影響所以先有甄子丹出嚟幫佢哋,仲有反派成為反派亦同屋企有關。

我衷心希望各位家長都可以喺開學之初睇下呢套戲(利申:非打手)。最起碼係見到入面啲角色嘅掙扎,去睇番自己係點。要識得批判思考唔好人云亦云,好好了解自己仔女真正需要啲乜嘢。

 

 

ps. 好可惜,睇完套戲嗰日開學前唔夠一星期,又有學童自殺⋯⋯
ps2. 王晶拍多啲高質戲就好
ps3. 個置入廣告去sell電影公司令我好出戲,好彩只係一開始出現
ps4. 套戲嘥咗陳喬恩,求其搵啲晶女郎show樣同身材仲好,片酬又可以平啲將主軸放番喺主線/深入啲去講師生情都好過格硬整條感情線

 

關於作者:cm

心的距離,到底能算上多少厘米?

閱讀後覺得好,請多多讚好及分享~:)

我有回應

則留言

其他熱門文章

歡迎讚好我們的facebook page,免費資訊源源送上。