你會唔會同菲傭同檯食飯?食飯時間仲會計埋工錢俾佢?

 

 

之前我同細佬都會請鐘點賓嬸星期日嚟幫手做家務。

明知佢地一個禮拜得嗰一日抖,係辛苦錢,所以我同細佬嘅共識就係佢開幾錢就幾錢,合理就照殺。

起初賓嬸嚟到,我地買埋佢飯。佢婉拒,話食左。細佬醒水,同佢講:「唔使俾返我地架,我地買埋送俾你食架!」賓嬸有啲驚訝,先話其實自己未食。

我同細佬執檯,檯面擺低三杯水,三份餐具。佢重複問我地使唔使分開食。我同細佬眼望望,唔明點解佢會咁問。原來,賓嬸做左十幾年野,屋企規矩係「主人食完工人先可以食餸尾」,而且賓賓唔準喺食飯檯食,要自己喺廚房行張矮摺檯食。

見佢食到就哽死咁,我同佢講,食飯時間都計,唔好急。其實唔係我特別好人大方,香港人自己食飯唔計鐘都覺得唔人道啦,更何況人地都有阿媽生,割開佢皮肉都係會流血,自己係打工仔就對其他打工仔好啲啦。

賓嬸做左兩個鐘,細佬沖左杯咖啡俾佢同烘左塊多士,叫佢抖。賓嬸話,佢喺香港做野,冇一個老闆喺「工作時間」以內叫佢休息過。我地返工返學都會自己小息,但原來喺大部分嘅香港人眼中,工人係唔使小息嘅。

之前有份報告話香港係世界最中一個人口販賣最嚴重嘅國家,好多人都唔信,抱質疑態度。我想講,人口販賣唔止係你睇戲老笠綁你上貨Van 大飛,大把人都係自願,借一大筆錢俾蛇頭,然後無償打工一年去還錢。

可能你都唔知,香港地係大把工人星期一至六工作日係〔禁止〕外出。即係關你嚟公司六日唔俾行出門口半步。夜晚佢地可能只係喺廚房訓帆布床,十二點訓,五點半起身。

係啊,佢地係有「大拿拿」四千幾五千蚊人工收啊,返去佢地國家係好好使啊。俾你賺份好好使嘅人工但做奴隸你制唔制?

每逢Facebook 一出關於外傭嘅新聞,留言欄就會出現一班口臭到仆街嘅死八婆喺到加鹽加醋。唔俾開冷氣:「俾錢佢過嚟做野架,你估俾錢佢嚟嘆世界啊?」;平日甚至連放假都唔俾佢出街:「佢出街容乜易識啲壞人教佢偷懶架?我唔會俾賓賓同其他賓賓傾計!」;做錯野扣錢:「嘩佢做錯野我要執屎架!好公平啫!」;要佢叫屋企人做Sir/Madam,細路都要叫 baby mam/ baby sir,唔係就罰。

以上啲謬論係咪好熟口面啊?咪就係電影嗰啲仆街老細先會講得出嘅對白囉。但你依家去Babykingdom 啊外傭新聞留言到,個個振振有詞大聲夾惡面不改容講出嚟,尤其嗰啲生左幾個仔有仔萬事足嘅女人,真係生左仔女就唔怕生仔冇屎忽架,當中唔少分分鐘係高學歷架。

另,呢個世界唔一定係你對人好人地就對你好,賓妹都有大把仆街。但對人好唔好就正正反映你嘅修養。你唔俾對人當上賓,你食咩,人地食咩,當返人地係人就已經夠。當日禮待實嬸,賓嬸就以100%嘅工作效率回報返俾我。你自己都係打工仔,梗知人工奀你會點蛇法架。

 

關於作者:清風

清風

閱讀後覺得好,請多多讚好及分享~:)

我有回應

則留言

其他熱門文章

歡迎讚好我們的facebook page,免費資訊源源送上。