黎耀輝,不如我地從頭嚟過

 

早幾日,有朋友見我面書講起《春光乍洩》呢套電影,話佢睇極都唔明白講乜,覺得好深,以下係我地嘅對話:

 

我:你覺得你有乜地方唔明?

佢:無啊,我只係覺得係咪齋講一對Gay佬拍拖嘅劇情?

我:嗯……不如咁講,你有無鍾意過一啲人,覺得佢好似風一樣,永遠都捉唔緊,但你又好鍾意佢?

佢:有啊!但好辛苦囉,因為佢根本唔定性,我唔知佢玩乜。

我:其實呢套電影都係講緊呢個話題。係我自己嚟講,愛情世界只係分左兩種人,一種叫水,一種叫風,呢兩種人好唔夾,但愛情奇妙嘅地方,就係呢兩種人經常都會走埋一齊,好想擁有對方,但又覺得好辛苦。你抽離咗佢兩個都係Gay嘅身份,其實都只不過講一段風同水撈埋一齊會點嘅關係,呢樣野每一日都係地球發生。

佢:咁但係,邊個風邊個水先?

我:張國榮就好似風一樣,周圍好多男朋友,想去邊就去邊,佢當梁朝偉其實好似一件玩具,鍾意就埋牙執一劑,唔鍾意就一腳伸開佢;而梁朝偉好似水一樣,想盡辦法綁實呢個男人,收埋佢本護照啦,買一堆煙放屋企,廢事佢搵藉口落街,總之想收埋呢個男人。最後梁朝偉都頂唔順呢種風一樣嘅性格,所以離開張國榮;當張國榮發現梁朝偉突然離開之後,先開始發現自己習慣咗佢,所以梁朝偉一離開阿根廷,有一場戲就講佢抱頭痛哭。

佢:好似風呢種人真係好賤其實!

我:唔可以咁講,風呢種人其實佢想要開心,你令佢開心,佢就會留係你身邊;水呢種人需要安全感,只要你令佢有安全感,佢就會跟你一世。

佢:好難姐!其實學你咁講,呢個世界嘅愛情觀得呢兩種,咁好難Match到囉?

我:唔一定,其實風同水係可以按百分比去調節,每個人可能五五波,或者六四、七三、八二之類,而《春光乍洩》其實講緊絕對的風vs絕對的水係會產生咩化學作用。而好多時嘅情況,都係水不停煩住風,令佢喘不過氣,最後先分手。點樣令風嘅人留係你身邊?就係放風箏。佢對你一時一樣,你要比佢更五時花六時變,咁佢就會覺得你好神秘,覺得你好有趣,想一步一步了解你。其實愛情應該咁處理,所謂「保持新鮮感」就係一個風嘅人估唔到你。

我:明!

 

呢期新股無咩好推介,因為港股都跌到喊,一堆人轉曬去玩美股,但剛剛先上市嘅創陞控股(2680)可以留意下,1.8招股價,派貨派到落9毫幾子,雖然我損小小手,但預料可能派多幾日,裝一裝個彈弓再飛上去,可以小注炒炒波幅咁。

 

 

作者:庵念慈

庵念慈
娛樂圈的後生老海鮮,日日被容總追稿的追夢人。現為文化研究碩士學生。

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 185137
Date: 2018-09-15 05:47:48
Generated at: 2019-10-20 23:26:10
Permalink: https://www.vjmedia.com.hk/articles/2018/09/15/185137/黎耀輝,不如我地從頭嚟過