唔理係讀緊書做 Group Project，抑或出黎做野時喺職場打滾，遇到好拍檔，真係三生有幸，因為相信無論你我，都仲會遇過唔同種類嘅奇怪同事。老屎忽唔算難頂，涼薄阿姐都可能未至於最慘，最辛苦嘅，應該莫過於日常最經常同你交集嘅 Teammate 入面，有老鼠屎。
Sean，做 Production，公司最近請左個剛剛畢業嘅大學生黎做助手。姑且稱呼佢做阿芬。
小芬女黎面試嗰日，Sean 都在場，阿妹講到自己對拍片呀廣告呀有幾熱誠幾有 Heart，仲話自己經驗不足，但願意努力學習云云，打動現場三位同事，咁就請左佢啦。
試用期三個月，點知小芬女第三日就喺公司喊，事緣係佢唔識打 Email 比客，隔離位同事好心提佢啲格式，Send 左份 Template 比佢參考，小芬女就開始喊啦。
「我話哂都大學畢業，阿邊個教我寫 Email，我覺得佢睇我唔起。」小芬女當住個好心同事對 Sean 咁講，仲無禮貌地稱呼前輩同事做「阿邊個」，大家原本心諗做乜勁，不過諗住算啦，而家啲後生係咁，比啲時間小芬女，之後可能會好啲。
無錯，睇到呢度，你同我諗嘅一樣，就係「你們太天真了」。
小芬女跟大隊落場去準備一啲拍攝工作，原本講好有啲瑣碎野由佢負責，去到現場小芬女對住啲場地工作人員已經唔知做乜擺起個款，大大聲同人地講自己做 Production 都算，到要佢拎啲道具出黎時，佢先話自己無帶。
同事震怒，「出黎之前咪提左你幾十次囉？點解可以唔帶架？」
小芬女面都紅哂，「我黎做 Production 架，唔係黎拎野架。」
聽到呢度，未，未到我白眼嘅位置，雖然 Sean 已經超級無奈咁爆左兩句粗，但係好多小朋友剛剛出黎做野就剛復自用，覺得自己懷才不遇，你估我見得少咩，呢啲程度嚇我唔到嘅！
點知，戲肉黎喇。小芬女眼見另一位同自己職級一樣嘅人，聽到自己比人話，居然冷笑左一聲，即刻覺得好唔受尊重同好無面，將手上面嘅文件丟落地下，將自己反鎖喺廁所入面發脾氣。重申，當時大家仲喺個客嘅場度，唔係喺公司！
一班同事嚇到唔知比咩反應好，好彩個客嘅對頭塞車未到，但係場地啲 Staff 已經打哂眼色，千言萬語盡在不言中呀。
大家黎做野嘅，小芬女發脾氣，大家都諗住返到公司就切左佢架啦；點知小芬女喺廁所途中，仲擺左張全黑 IG 打左千字文話自己覺得生活困苦、盡力做事無人重視之類嘅叫春 Post；同時出左張 Story 顯示自己喺廁所入面「Freezing」。
正當一班同事睇到呢啲 Notification 嘅時候，Sean 收到小芬女短訊。
「Why still no one come and cheer me up? I am so depressed 😂😂」
Sean 比完個短訊我睇之後，我輸左了，要反白眼了，反到哥斯達黎加了，Roar，搞乜野呀女你？叫你做大事你又唔夠料，唔比野你做你又話唔尊重你，比輕鬆野你又話睇你唔起，咁好難同你共事噃！
「啱呀，所以我地無人搵佢，淨係同佢講佢可以提早返屋企先。第二日我地即刻叫佢收皮啦。」
Sean 見過鬼怕黑，今次佢黎搵我，係想知道三位求職者入面請邊一個比較妥當。副牌就 Ok 嘅，三位入面各自有辣有唔辣，結果佢請左我話「觀察力細微，幫到手，不過有時份人會好跳」嘅一個後生仔，聽佢講返左個半月工好像表現唔錯，真好。
至於小芬女⋯⋯
「佢走嗰時我有諗過比你卡片佢架！」Sean 有啲奸咁笑一笑，「湊女你叻啲吖嘛！」
我笑。我講野咁直接，我驚佢頂唔順，一陣又匿入廁所就唔好啦。
你話想生仔我咪唔避孕囉，我家下有咗你就叫我落？
名校老師婚外情的故事
女人就黎三十歲仲係 A0 係咪就叫有問題？
中女不諱言「我有 SP，但我唔會同我老公離婚」
老師的成功要訣：識人、埋堆，攀附權貴；作育英才已經行唔通。
邊個講出「分手」兩個字，邊個就係萬劫不復嘅千古罪人
女性客戶開口埋口「我認為」，咁你有無理過對方點諗先？
我以為個客擔心病母健康，原來佢只係想快啲分身家
分左手後一方面當前男友係兵，一方面上網開 Post 唱對方，咁樣做真係好咩？
為何今天好像剩下Mirror 一個偶團？
我去到2021年先唔再睇TVB——正向聯想 (Positive Association)
分手咪分手囉，三口六面講清楚好難咩？
【遊戲介紹】做個中世紀領主 《Going Medieval》極多玩法暗藏食人肉滿足饑餓度
薛定諤人生最尷尬的恥笑——薛定諤的貓實驗
寫於與舊單位分手之前——習慣化 (Habituation)
2018年9月15日
