偽毒——呢啲人扮毒溝女又attention seeking 真係好討厭

 

 

大家身邊總有一個半個偽毒既friend。唔知大家對偽毒撚有啲乜野感覺?小弟自己就唔太欣賞。

點解?簡單,因為偽毒撚比真·毒撚更加似一個pussy。

不過首先,請容許小弟喺到講解下我對真·毒撚既impression係乜。

首先講真·毒撚既外表先啦,真·毒撚by definition一定唔會係靚仔又或者身型好,你有無見過一個好似碧咸咁靚仔,身型又似C朗既毒撚?靚仔既話佢地就叫靚仔,就唔會比人叫毒撚啦。

佢地通常大部份時間都係到打機,睇動漫,又或者用哂自己副身家去買figure ,通常都係嗰啲某某出名動漫既大波女角,一隻半隻figure 都算,佢地係會成個系列咁買,幾千蚊至幾皮野一定走唔甩,但真·毒撚表示大波妹figure唔買真係對唔住自己。如非必要,真·毒撚係唔會出街,困住自己係房,對住自己用血汗錢買番黎既限量figure,朝見口晚見面日日對住佢地打丁。

真·毒撚既朋友圈子入面,大多數都會存在住其他真·毒撚,物已類聚,開口埋口既topic 都係打機、動漫等等。佢地食飯既時候都常會去啲無乜人既area 戴住個earphone一路聽住啲動漫OP 或ED,唔想同世人接觸。

真·毒撚對fashion一啲興趣都無,著衫對佢地黎講只不過係要用黎遮住重要部份。大多數既真·毒撚都係無女朋友,但係二次元既老婆,屋企閒閒地幾十隻陪佢地。

雖然上面既描述好似好負面咁,但係我唔覺得「毒撚」依個term帶有任何侮辱既成份,佢只不個係形容緊做以上行為既人為叫「毒撚」,so what?鐘意動漫又點?身型唔好睇又點?唔鐘意fashion 咁又點?下下都應該要迎合「正常人」對「正常」既睇法?

反而我覺得值得一讚既係,真·毒撚從來都唔介意其他人既目光,亦都唔介意人地叫佢做毒撚。

 

咁偽·毒撚呢?對小弟黎講,其實同真·毒撚最大既分別在於偽·毒撚既行為同真·毒撚應有既性格係好唔吻合。

首先,偽·毒撚都唔會靚仔嫁啦,真係唔好諗太多。

我頭先都提到,真·毒撚係好enjoy 活係自己個世界入面,就算無人同佢地講野,佢地都唔會覺得有問題,自自然然佢地亦到唔會有social network(例如: FB或ig)(唔計個啲同人交流動漫心得既討論)。試問一個唔鐘意同人social 既人點會鐘意係social media 到同人update 近況呢?根本唔make sense。但係相反地,偽·毒撚係好常係FB/IG到update 自己既近況,去旅行又要upload 相,然後加番句乜野「自己一個人去旅行其實都幾爽丫丫」,自己一個過聖誕又要up 幾句「又要Lonely Christmas」之後hashtag 加啲「#這些機會」「#毒撚一名」「#其實自己一個更開心」等等。

偽·毒撚既社交能力其實極高,不時去唔同既event 識下朋友吹下水咁。其實一切一切都係到博緊身邊朋友既注意,根本就係一個attention seeker。而佢地最concern 既一個area 就係佢地溝唔溝到女。一問到佢地有無溝女,佢地即刻阿源上身,用一個自嘲既方式、耍手擰頭話「唉,真係這些機會,我依啲毒撚點會溝到女呀。」但轉個頭又係到去埋啲social event識人,講到尾其實心底入面根本就想去識人,企圖用「偽·毒撚」依個term 去減低啲自己既攻擊性,希望啲女對佢地戒心低左,然後乘虛而入。

好啦,到自己溝女失敗左,又會即刻用番佢地既金句,「唉,算啦,我地依啲毒撚無人要嫁啦」做擋箭牌,去掩飾自己溝唔到女依個事實。我明既,認左自己係毒撚好似無論做左啲乜野失敗左都可以話自己係毒撚所以點點點,柒左好似係應份咁。係真係咁,定係驚比人笑輸唔起呀?

想買figure 咪買figure 囉,想整到自己間房成個秋葉原咪整囉,啲錢你自己嫁嗎。想溝女咪去馬囉,點解唔可以大大方方咁去認左佢?喺人一開始溝女都淆嫁啦,溝唔到依個咪下次再試過囉。唔通你身邊個啲friend 天生就有女嫁?

吓,你話你樣衰驚無人要?我真係建議你去google search 下 「梅愛偲」,睇下佢個樣再睇埋一啲關於佢既報導之後再睇下自己個樣。我敢講你成個人既自信會即刻番哂黎!你也可以的!!!(普通話腔)

記住,你試過、失敗左係一回事,你唔做然後賴係另一回事。

 

最後,我想正面啲同一班中左以上我對偽·毒撚睇法既朋友仔講:Please grow a pair !請你為自己長一雙蛋啦!

 

作者:鑄墨

一個看透世事既閒人。

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 185182
Date: 2018-09-17 04:53:07
Generated at: 2020-02-26 18:17:25
Permalink: https://www.vjmedia.com.hk/articles/2018/09/17/185182/偽毒-呢啲人扮毒溝女又attention-seeking-真係好討厭