山竹遠去，但挑戰才剛開始。相信今日最大的爭議，莫過於要返工的打工仔，包括我都是一路媽媽聲一路返工。但根據湯渣所言，「在一個自由、資本主義的社會，便是特首也沒有權命令全港放假一天，更沒有能力負上社會停止運作一天的經濟損失」。而林鄭自己就話，停工「對香港並不適合」，一切一切，到底是否所言非虛？
首先，一個政府應該要有能力宣佈，因為政府起一個社會suppose就是要做一個協調的角色。湯渣此言一出，廣、深、澳分別宣佈停工、停業、停市、停課，唯獨香港只是停課，兜口兜面賞了湯渣兩巴掌。喂，你當你老細死架？即係大陸唔係行資本主義？點解我地的祖國就停得，我地就唔得呢（前題是我地確切有呢個需要）？有人謂「好難界定邊D工種可以停喎」，其實我覺得，就同打八號波一樣的停就可以啦，又有幾難呢？？而，如果放一日，鼓勵市民同心合力一齊整頓市容，亦是發揮互助精神的好時候呀！成日話團結香港，咁就真係團結到啦！另外，典解既典解既典解既典解既典解既？典解唔適合？唔該解釋下好喎！！！！！
政府以為將呢個燙手山芋一拋拋俾一個個僱主決定，卻完全顯出政府背後的涼薄和不願意承擔的勇氣。打工仔不嬲無籌碼同奸商Bargin，僱主點會理咩交通需要，剝削你就有份；將呢個波推俾老細決定，簡直就是癡人說夢話，仲話「絕對有信心」僱主會體恤僱員的困難－說到底，特首根本就是無呢個政治勇氣，去得罪果D「放你一日工都無左幾十億」的商家，或者接受「停多一日市」呢個經濟損失－說到底，她的目光，都是睇住D商家，一眼都無睇過我地呢D蟻民。
但，雖則政府抵鬧，但身為蟻民的我們呢？雖然我媽媽聲都要返工，因為事實是我返工的路段無損壞。但如果我身處新界北，我敢寫包單我一定唔會返（而事實是本人公司有住粉嶺者真係無返，大家都唔會覺得有問題），因為返唔到，呢個是一個確切的事實。但是，真係唔好意思都要講句，香港人有無奴性咁重呀？！你身處路段真係返唔到工，你都有自由意志選擇打俾僱主話，「喂我真係車都搭唔到喎」，唔通你老細會為左咁而炒你？！如果佢咁都炒你，你講句多謝添啦，D咁既老細！香港人，真係無咩叻，叻在睇得多「延禧攻略」，以為皇上是老細，而奴才、就是自己。
而，大批議員譴責，又是得個鬧字。夠膽，就提出「放番兩日假」俾打工仔：一日是星期日（成個星期日都無得出街）、一日是風假呀！！真係夠膽咁提出，我未來立會選舉果票就是你既！
為何今天好像剩下Mirror 一個偶團？
我去到2021年先唔再睇TVB——正向聯想 (Positive Association)
分手咪分手囉，三口六面講清楚好難咩？
【遊戲介紹】做個中世紀領主 《Going Medieval》極多玩法暗藏食人肉滿足饑餓度
薛定諤人生最尷尬的恥笑——薛定諤的貓實驗
寫於與舊單位分手之前——習慣化 (Habituation)
2018年9月17日
