炒賣的世代之爭——年輕人炒高門票，老一輩炒高樓價

（photo via cc Flickr user Ioan Sameli）

香港炒風盛行，有實力嘅港人炒賣住屋以及車位已經唔係新鮮事，股票市場亦然，可惜嘅係呢幾個市場入門門檻較高，一般年輕人如果唔靠父幹，想單靠買賣呢類型資產維生都比較困難。所以往往賺最多嘅都只會係原本已經擁有豐厚本錢嘅上一輩人士居多。

但其實炒賣行列絕非有錢人專屬嘅遊戲；貧苦大眾，尤其係年輕人，一樣有機會一齊參與。近年最流行莫過於炒賣波鞋、黃牛、iPhone等等。而炒賣呢幾類產品嘅門檻，往往最大困難並不在於本錢，而係應用電腦嘅技術。以波鞋為例，近年大多數熱炒嘅款式皆需要喺網上搶買，幾分鐘內已經一掃而空。得到最多貨嘅亦通常係熟悉電腦編程嘅年輕人，佢哋能夠利用一啲早已編寫完成嘅機械人（Bot）去控制電腦自動搶購，引致一般人難以用人手對比拼，更莫論不太熟習使用電腦嘅上一輩。

更有趣嘅係，年輕人炒賣不止步於潮流玩意。華仔於年尾嘅演唱會大賣，當中絕大部份能以原價買飛都係年輕人，皆因今次係只限網上購票，水位亦高達一倍有多！而迫住食炒價嘅買家則係老一輩嘅華仔fans。所以不論炒賣對與否，今次無疑係年輕人向上一代人手中奪回資源，實屬世代之爭。

筆者作為一個有道德嘅年輕人，每日眼見老一輩港人炒高樓價，今次認真不知應該站在何方了。

作者：憤世貧人

憤世嫉俗，憎人富貴厭人貧，唯利是圖

閱讀後覺得好，請多多讚好及分享～：）