【愛情實況系列】嫁個又有錢又錫老婆嘅老公,係咪一定幸福?

 

 

家陣成日都聽倒「嫁個有錢人」呢句話,反映好多女仔嘅夢想。梗係啦,邊個唔想結婚之後享受人生做少奶奶唔使捱喎?當然,如果個老公恃住有錢周圍滾,又係另一回事。不過,嫁個又有錢又錫老婆嘅老公,又係咪一定幸福呢?以下呢個故事,大家睇完可以自己諗諗。

我識得一個中女,今年都四張幾嘢。佢後生嗰陣,雖然唔算靚,但都過得去。佢係一個都算幾虔誠嘅耶教徒,經常參加教會活動。年近四十嗰陣,佢同好多教會姊妹一樣,面對一個嚴重嘅問題──仍然冇拖拍。咁梗係啦,教會一向女多男少,扣除已婚太老太嫩嘅,可選擇嘅男人就更少。佢仲要係做護理專業,同事又係女人佔絕大多數。咁嘅環境,想識翻個嫁得過嘅男人,真係要上天保佑。

或者可能真係祈禱祈得多,終於皇天不負寂寞心,俾佢識倒個單身鑽石男。個男人做生意,有錢,屋企三千呎,車就更加唔使講。我唔知個男嘅幾多歲,不過單睇外表,最少大過中女十幾廿年,而且唔係耶教徒。不過唔緊要啦,最緊要大家都情投意合嘛。當年中女知自己四張嘢都嚟緊,唔等得,即使教會成日教人「信與不信不可同負一軛」,都唔理得咁多,有得嫁就嫁咗先。好快,佢哋就結咗婚。

佢又真係冇嫁錯,個老公雖然有錢,又喺大陸做生意,但好鍚自己老婆,冇話去滾。嫁咗之後,中女即刻辭工做少奶奶,住三千呎豪宅,仲有兩個外傭服侍,做人做到咁有福氣,仲想點?

可惜,世事有時又真係好難咁完美,結婚之後,問題先至嚟。原來佢老公對自己屋企人好好,又勁孝順。佢老公個阿媽,即係中女嘅奶奶,年紀都大,老公為盡孝道,結婚後就接埋阿媽一齊住。而更唔好彩嘅係,老公有一個阿哥精神有啲問題,做細佬嘅,就索性接埋阿哥入屋一齊住。

咁嘅情況,當然令中女勁唔開心。因為平日老公都喺大陸做嘢,聚少離多。每日喺屋企,就要照顧住個奶奶同老公阿哥,真係似私家看護多過似老婆。最慘嘅係佢唔知有精神問題嘅老公阿哥會唔會突然做出啲傷害人嘅事,真係越住越驚,搞到中女好多時唔敢留喺老公間屋而要翻娘家。

另一方面,老公長期一個人喺大陸做生意,作為香港老婆嘅中女,即使明知老公唔爛滾,點都會擔心。想上大陸搵老公咩?但老公想佢留喺香港照顧奶奶同大伯,又唔可以唔理。咁搞法,真係幾多錢使幾大間屋都冇用。中女唔知點算好,只好翻教會向教友訴苦。

不過上天真係對中女好好,俾佢一個好老公。中女不斷向老公表示自己嘅不滿,佢老公知道再咁落去唔係辦法,最後終於另外安置同照顧阿媽阿哥。中女唔使再做私家看護,當然勁開心。美中不足嘅係,中女可能因為年紀大,雖然好想但一直冇辦法生仔。

自己年紀越嚟越大,應該都冇可能有細路,老公又咁有錢,仲成日喺大陸做嘢,中女於是表現得冇乜安全感。佢可能想自己睇落靚啲後生啲,化妝越嚟越濃,有一次佢見倒我,同我打招呼,我認唔出係佢,因為佢個妝化得好犀利。

平日,佢跟住老公上大陸,無微不至咁服侍。例如佢會袋住老公鍾意嘅茶葉,無論去邊度食飯,都會用滾水即沖。好明顯,佢係要時刻睇實個老公同綁實老公個心。由於佢要不離老公一步,連教會都唔返。睇見佢咁樣做富婆法,可以話係幸福,但冇安全感嘅感覺又真係幾辛苦。

唔講唔知,除咗將老公擺第一位之外,原來中女仲好關心政治。佢係標準「愛国」藍絲,得閒無聊嗰陣,就會好正義咁喺網上鬧人佔中、鬧所謂港獨、鬧何韻詩等等。如果見倒朋友鬧高官禍港,佢會為咗維護高官而好正義咁鬧朋友無知。至於見倒「厲害了,我的國」拆教堂、燒十架、打教徒,呢位虔誠嘅中女教徒就從來冇出一句聲。又有錢又正義又虔誠,都真係勁幸福嘅人先至可以達到呢個境界。

嫁個又有錢又錫老婆嘅老公,係咪一定幸福?我答唔倒呢個問題,不過我會同雲英未嫁嘅女仔講:「如果識倒個又有錢又錫你嘅男朋友,唔好諗咁多,快啲嫁。」

 

【愛情實況系列】

老夫少妻?公司總有個八婆會幫你棒打鴛鴦……
姐弟戀,你 / 妳接受到相差幾多歲?
如果女人要俾帽你戴,買埋層樓俾佢都無用!
一對閨密好姊妹,同時鍾意一個男神,點收科?
寂寞妹妹主動搵大叔,真係會有好結果咩?
曬靚樣又曬富二代男友,會有乜結果?
大叔戀上學生妹,結果係?
咁嘅CHEAP 男都有女神死心塌地!呢個世界公平咩?
想由異性知己變情人,情關闖唔闖得過?
同從未見過面嘅人發展電話情緣,純情乖乖女會有乜結果?

 

作者:問世間

問世間
不善談情,但求懂愛;不作失實,但求寫實。

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 185361
Date: 2018-09-23 06:04:14
Generated at: 2020-07-09 16:18:45
Permalink: https://www.vjmedia.com.hk/articles/2018/09/23/185361/【愛情實況系列】嫁個又有錢又錫老婆嘅老公,係