守護自己的小孩,由守護你孩子的吃食開始!

 

(某著名飯盒供應商網站圖片,相片經過處理)

 

《金瓶梅》作者蘭陵笑笑生在他的序文中說:「讀《金瓶梅》而生憐憫心者,菩薩也;生畏懼心者,君子也;生歡喜心者,小人也;生效法心者,乃禽獸耳。」

一本書,有幾多個解讀?蘭陵笑笑生1530年出生,比羅蘭巴特更早提出「作者已死」論吧?

所以,當我寫出《東京美食博覽》的時候,有些人第一個反應就是,食店的質素如何,那是第一層次的讀者。那很好,直截了當,所有前半部的文字都不看,只對吃食有興趣。是很典型的香港人,也只覺得消費吃得好就可以。

但直至昨天,終於都有讀者找上門,說我的文字,有另一種解讀。

 

 

我感動得在地鐵有點抽泣。尤其是今天完成了14公里的長跑課。身體最疲累,又有點panic attack 的情況下,收到知音,實為高興。

於是,今天,我在節目中,詢問了大家:

如果有一日,我地發現,原來自己既細路食緊既野好難食,你會點呢?

今個星期,因為教育局宣佈停課既關係,所以有好多個飯盒剩左,於是呢,就有好多人話,不如去拎左佢啦,等啲野唔好嘥左。

而又有朋友真係拎左黎食。食左兩啖,之後佢就話:「屌,而家學生食緊既野係幾咁難食。」

朋友話,佢地其實有諗過,呢啲係有人暗中建構既社會工程(social engineeering),等啲細路從小到大都食難食既野,畀佢地覺得飲食唔係快樂,亦都冇原因向上流動,人生係冇希望既。因為,你既人生,就係有人安排你,日日都係食化合物製作既汁同埋一啲冇肉味既肉。

之後到你面對咩大事,咩無奈既時候,都要「咕」一聲吞左佢。

之後我睇住朋友,同佢講,不如我地講下我地之前間餐廳而家點丫?

之後,網友A就話:「啲午飯難食某程度係因為啲學生飯盒有好多限制,教育局,原來係有超過2頁指引,例如話,飯菜肉比例係有規定既,一個月餐單內,唔可以有太多加工類食物,火腿香腸唔得、臘腸糯米雞唔得,菜要烚嘅。你諗下全世界小學一齊食飯,個廚房要煮幾耐?個飯盒pack好送貨到學校到班房又要幾耐?唔好話好食,擺得落口已經好犀利㗎喇。」

係呢一點,又出現左一個「焦點錯置」的問題:定規矩既人,又會唔會在乎,啲野係咪真係做到呢?

更重要既係,有好多人,都對啲午餐,有好多意見。

網友b就話:「中學時食左中一半年,下學期寧願揹飯壺帶飯。到中二學識叫外賣到學校後門外拎,後來其他同學發現work爭相仿效,每逢lunch time學校後門勁旺,而校內飯盒供應商接近拍烏蠅XDD。」

網友c就咁講啦:「我而家真係唔中意食菜,只不過係,我由細到大,食既菜,都係又苦又臭既。直至我去到日本之後,我先知原來菜係咁既味既。
更可怕既係,飯盒又多不能食用嘅異物,我親眼見過,同學係飯盒食過鐵粒、煙頭、蟑螂、鏍絲等等……
就算冇垃圾,飯盒本身味道又差,學校仲硬性規定食三年。
而且午膳供應商係點選出黎?家長有冇理過?從來都無人知又無規管。
然而香港教育出黎既,最多嘅就係順民。想轉供應商?想出去食?
你逆權你提出意見就係你錯。
學生可以點?
唔好忘記,8、90後嘅孩子父母幾咁可愛,老師講句學生唔乖同學生提出學校嘅不是,被體罰嘅都係學生。香港人無味蕾?痛苦回憶係點造成?咪就係香港嘅教育同家長造成架囉!」

而又有人又跳出黎問啦,咁你可以帶飯架嘛。邊個叫你唔帶飯返學呢?

網友d就話:「係可以帶飯,不過當你炎炎夏日拎住個保溫飯盒,入面係你或啊媽朝朝起身煮嘅飯,帶到返學校有機會變酸,仲要倒汗水浸到啲飯發脹哂。點解唔帶飯返去叮?Sorry啊,學生無權用微波爐。而且比著你係啊媽,又要起身煮飯又要趕返工,同每個月比幾百蚊去換返每朝幾十分鐘自由時間。你點揀?你話日日有日本全職媽媽用黎同其他全職媽媽鬥靚鬥心思鬥擺上fb、ig多like嘅飯盒當然好啦,但呢度係香港,煮中餐簡單一道菜都有菜汁。而每日呢,都浪費勁大量食物,基本佢小一到小六個量係無大分別。係個飯可能會分下:小一食唔晒、小六唔夠食。營養?唔好玩啦,冇異物你都當好彩,日日都係對住一大堆汁同黃晒既菜,有得食美式快餐店就已經開心到痴線。你話呢啲香港人,幾易管?」

營養午餐,就係香港飲食質素低落的開端:因為他們接觸的食物質素低,相對期望和要求就會下降。但這是共業,一方面家長太忙,無法準備午餐,但選飯商就要便宜。當外面午餐要四五十蚊一份,學生午餐都只是十多二十元,咁想點?反過來說,如果飯商收四五十蚊一餐,但水準比得上快餐店茶餐廳,又有幾多人願意俾?所以根本無得講。

原來,對好多小朋友黎講,午飯既記憶係咩?

網友e話:「童年陰影就係打開個藍色膠飯箱,幾十盒地獄飯加膠嗰陣熱味湧出嚟………而飯係臭既,菜都係酸既。」

一講到呢度,心都酸埋。我就覺得呢個世界既細路真係好可憐。父母唔雙職供唔起樓,唔幫小朋友準備午飯佢地就要食垃圾。

 

~~~~~~~~~~~~~~~~~~~~

 

有些人以為我搞patreon 只是為了宣揚日本有幾好。我只想實在的告訴大家,我還是對「味道」有一點堅持。我知道我身邊有些人,對吃食什麼是沒所謂的。因為他的層次,就只在「吃食=裹腹」的層次,人家說好食就好食。對人不對事。而且,很多時候都是「朋友在做的就叫好食」、「朋友介紹的就是好食」。好不好食,他們沒有資格也沒有能力分清楚。

我真的不能也不可以怪他們。因為,這是業。一代人連吃食都沒有要求,你能想像他們對「自身追求」可以有多認真?連吃食這麼直接的事情,都可以馬虎了事,他們會對「自身文化」有多少的執著與堅持?

將來會會報的。

 

 

作者:健吾

健吾
專欄作家、記者、編輯……商業電台節目《903國民教育》、《光明頂》主持,香港中文大學日本研究學系講師。著書超過40本。email:[email protected] |Facebook: facebook.com/kengopage |微博:t.sina.com.cn/kengowrites

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 185373
Date: 2018-09-23 21:08:12
Generated at: 2020-03-29 19:50:00
Permalink: https://www.vjmedia.com.hk/articles/2018/09/23/185373/守護自己的小孩,由守護你孩子的吃食開始!