有信仰嘅人最幸福

 

最近成日發怪夢,又係啲關於生生死死嘅問題,於是諗起一位基督徒,佢生cancer,而面對死亡前佢係完全冇表現到恐懼。

高中時深受左翼式唯物主義影響,會覺得世界一切嘅宗教都係迷信,或者係某種形式建制維穩嘅手段。但往往呢種偏見係基於我本身對宗教嘅無知同自信理性嘅中二心態。

近幾年嚟人大左,自不然要見證生生死死。凡存在必合理呢句,越嚟越解釋到以前我唔明,甚至可以講白啲話係冇能力及資格明白嘅事情。曾經有個基督徒鼓勵我去尋找自己嘅信仰,仲好犯規咁話唔係基督教都冇問題,最緊要你真係誠心接受同抱住信念,因為「冇信仰嘅人好慘,死左就乜都冇,肉體隨著腐爛而毀滅之後就一無所有,精神亦會隨住他人記憶嘅衰退而慢慢消失」。

我唔敢話佢對於自我太過執著,因為我開始明白到,生前死後,可能只係唔同嘅存在方式。一個無神論者嘅人生就可能只存在於肉體尚存嘅時候,但人死即如燈滅,精神上嘅存在可能唔存在。

另外又諗起有人曾道,西方宗教相信人帶原罪,故人性本惡,所以要以地獄刑罰去阻嚇作罪;相比起嚟,相信人性本善,以美德風骨去鼓勵行善嘅東方哲學事實比較進步。

當然,東方哲學都有提倡人性本惡嘅思想流派,但我反而想知嘅係,一個無神論者,亦相信人性本惡嘅話,到底又係有咩野可以阻止到人行惡?法律總有鞭長莫及之處,何以止惡?相信人性本善嘅話,又係咩嘢去推動人類行善嘅堅持?信念嘅根基從何而嚟?

時常感到氣餒、力有不逮嘅我,開始漸漸明白到為何幾百年前嘅哲學家指控無神論令人墮落。我諗爭議點唔係人性本善或惡,而係人性本弱,缺乏精神上嘅支撐引導,精神萎靡同墮落只會係必然嘅結果。「有信仰嘅人最幸福」,我開始明白呢句話背後嘅原因。以唔理性嘅力量去保護理性,可能咁先係最理性嘅做法。大概,呢啲就係叫智慧,唔同聰明、醒目、學識廣博。

 

作者:亂臣賊子

亂臣賊子

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 185425
Date: 2018-09-25 05:20:47
Generated at: 2020-03-29 20:52:11
Permalink: https://www.vjmedia.com.hk/articles/2018/09/25/185425/有信仰嘅人最幸福