【愛情實況系列】才子第一次約女仔就去行山,能唔能夠結束三十幾年青頭生涯?

 

(圖文不符)

 

才子配佳人,套用偉大強國嘅口頭禪,就係「自古以來」,即係話從古至今,女仔多數會覺得,自己最好能夠配倒一個才子。雖然話而家「嫁個有錢人」先至係主流思想,但就我所見,做得才子,始終都係喺愛情路上有多啲優勢,我就見過身邊朋友之中有絕世才子配倒個絕世佳人嘅例子。不過,世事又唔係絕對,如果才子本人對女仔完全無知,就算其他方面幾有才華,喺愛情路上都好難有運行。

我識得一位仁兄,古今中外天文地理政治社會經濟民生各種知識,讀得又通又透,絕對係一級才子。雖然佢唔算靚仔有型亦唔係有錢仲衰多樣口賤,但心地好有義氣,學問同性格都好得,係一個值得女仔考慮嘅對象。

但係唔知點解,佢嘅女人緣就唔係幾好,三十幾歲人,都未拍過拖,仲係毒撚一條。不過我後來先知,原來佢都曾經嘗試過約女仔出嚟,而個女仔亦答應出嚟,嗰次應該係佢最接近拍拖嘅機會,但可惜俾佢自己一手攪彎。

話說呢位從未拍過拖嘅毒撚才子,喺一次非常輕鬆容易嘅集體行山活動中,識咗一個女仔。個女仔亦未有男朋友,兩個人一路行一路傾,都幾投契。活動完咗之後,佢兩個仍然有聯絡,仲約咗一齊行山──只得佢兩個人。即係話,個女仔亦對才子有啲意思,只要兩個人第一次嘅約會係OK嘅話,一段感情就可以正式開始。

如果話好嘅開始係成功嘅一半,咁壞嘅開始就一定係失敗嘅全部。所以第一次約會真係好重要。才子有一個唔知邊度嚟嘅根深柢固觀念──香港啲女仔體能好勁,而且一定好叻行山。我都有行山,亦見過體能好勁行山好叻嘅女仔,但一定唔係所有女仔都係神奇女俠。所以,如果我搞行山活動,事前一定會估計參加者尤其女仔嘅體能狀況係咪真係可以應付。可惜才子唔係咁諗。

同才子第一次單獨出嚟嘅,體能上就偏偏係一個弱質女子。呢位弱質女子,輕鬆容易嘅山路,當然冇問題,但佢平時冇行山亦冇運動,上次非常輕鬆容易嘅集體行山,已經唔知係幾多年嚟第一次,如果山路嘅難度同體力要求稍為高啲,都會頂唔順。不過才子竟然完全唔識諗呢啲,一開波就嚟猛料。

我唔知才子帶弱質女子行邊條山路,弱質女子事前事後亦唔知行過乜嘢路,證明才子條友由頭到尾都冇向個女仔講清楚條路係點,更加冇評估適唔適合好少行山兼體能唔多好嘅女仔。聽弱質女子事後同我講翻:「條路主要係睇瀑布,有啲地方好難行,好多石級要上,行到我好辛苦。」我心諗,大鑊,條友梗係一開波就有理冇理,帶個女仔行梧桐寨瀑布。

梧桐寨瀑布位於大帽山南面,有四個主要瀑布,另外仲有一啲比較隱蔽嘅瀑布,成為一組瀑布景觀,又叫「帽山飛瀑」,係香港四大自然奇景之一。梧桐寨瀑布嘅路只有幾公里,唔算長,但頭半段就要不斷上斜路上石級,有啲路段仲會比較崎嶇濕滑;尾半段又要落好多石級,小腿好受力,絕對唔係輕鬆落樓梯嗰種。行慣山體能應付倒當然冇所謂,但好似弱質女子呢類,就絕對唔應該帶佢去。

更弊嘅係,「行到我好辛苦」唔係弱質女子嘅唯一嘅負面感受,聽完之後連我呢個一向不解溫柔嘅麻甩佬都覺得頂唔順。

「行到我好辛苦」係第一個攞命。第二個攞命係:「佢唔理我自己行,我要喺佢後面追。」JESUS!才子條友第一次單獨帶女仔行好辛苦嘅山路,一路上唔係關心照顧,而係唔理個女仔自己行,要個女仔喺佢後面追,有冇攪錯呀?

第三個攞命係:「佢喺難行嘅路就唔理我,但係喺易行嘅路就話幫手扶我。」即係話,條衰公根本唔知應該喺乜嘢時候展現男人應有嘅風度同體貼,反而喺唔適當嘅時候做,攪到個女仔唔知佢想點!

第四個攞命,聽到我唔知好嬲定好笑。女仔話:「佢又約我下次去游水,我唔係佢想得咁隨便嘅女仔。」OH MY GOD!咁樣追女仔點得架?我所認識嘅呢個女仔,比較保守,好難接受同一個識咗冇幾耐嘅男仔出嚟游水。個女仔冇講明,但我意識到,佢覺得才子唔多正經,識咗冇耐就想睇佢水着。

我聽到呢度,都唔知點講,只能夠同個女仔話:「我同呢個男仔好熟,佢係個好人嚟嘅。」女仔呢個時候先知我同才子係相熟朋友,就冇再講落去。而之前佢一輪咀猛咁訴苦,真係好反映倒佢同才子第一次約會經歷係幾咁唔開心!

佢哋兩個最終有冇去游水?當然冇啦。因為第一次約會,就已經成為最後一次,之後亦再冇聯絡。

而家,個女仔已經結咗婚,老公好鍚佢,好幸福。另一邊廂,才子嘅學問就繼續增長,但就仍舊係青頭仔一個。才子唔識得憐香惜玉之餘,對於男女愛情之道更加係遲鈍到不得了,莫講話完全冇進步,最弊嘅仲係越嚟越衰。再咁落去,真係好大機會一世做毒撚。

男人有學問當然係好事,但點都要識得點樣對女仔好。應知道,男女戀愛之道係一種人生學問,男仔完全唔識寫「女仔」呢兩個字,係唔得架!

 

【愛情實況系列】

老夫少妻?公司總有個八婆會幫你棒打鴛鴦……
姐弟戀,你 / 妳接受到相差幾多歲?
如果女人要俾帽你戴,買埋層樓俾佢都無用!
一對閨密好姊妹,同時鍾意一個男神,點收科?
寂寞妹妹主動搵大叔,真係會有好結果咩?
曬靚樣又曬富二代男友,會有乜結果?
大叔戀上學生妹,結果係?
咁嘅CHEAP 男都有女神死心塌地!呢個世界公平咩?
想由異性知己變情人,情關闖唔闖得過?
同從未見過面嘅人發展電話情緣,純情乖乖女會有乜結果?
嫁個又有錢又錫老婆嘅老公,係咪一定幸福?

 

作者:問世間

問世間
不善談情,但求懂愛;不作失實,但求寫實。

閱讀後覺得好,請多多讚好及分享~:)

其他熱門文章

  • Client 問我點解自己係「仆街磁石」(上) by Professor Chan
    佢自從中學由女校畢業之後就無試過單身⋯⋯連一個月都無。每次同一個男仔分手,佢好快就會同另一個人一齊,佢話佢已經唔記得單身係咩感覺。…
  • Client 問我點解自己係「仆街磁石」(下) by Professor Chan
    依家,你重新行一次,你由出世到依家呢廿五年嘅經歷。好似一段Video咁,由過去,由開始播放,播放到依家呢一刻⋯⋯你可以由得唔同嘅片段喺你個腦入面播放,唔需要去控制佢,一路播一路同我講你見到咩。」我講。…
  • 香港人就係純樸到連日本人都可以喺度橫行霸道 by 白木乩
    就算係日本老母來到香港,無左其他日本人嘅目光,無左其他日本人文化監察,無左其他日本人鬧佢「打咩」、「巴加丫囉」、「渣媽」,出名桎梏出名壓抑嘅大和民族,都係會個性解放,係「個性」解放。…
  • 【遊戲新聞】NS糞級新作引起熱潮 《Final Sword》挑戰任記的可疑作品 by 五木
    以前超任、PS 年代因為資訊不流通,但係「買」Game 又極平嘅關係,所以成日玩到糞作。隨住資訊變得流通,今時 […]…
  • 由林美戀談起——藝人基督徒,係咪好好撈? by 殷琦
    無論16 年背夫偷食單野又好、現時與非基林作拍拖都好(雖然個人而言基與非基我是ok既...~)、「High Profile處理感情生活、信主後感情生活仍然混亂」是我覺得對你算中肯的評價。但這其實都超出一般教會的接納程度了吧?既然是藝人,言行…
  • 吃子的文化 by 健吾
    我有時會想,是不是真的有人會覺得「考得唔好唔緊要」,是一句安慰語。我考得好,所以我沒有辦法說什麼。對考得不好的同學,我也不能說「你考得不好不好意思」。更甚者,我有學生因為考得不好,進不了醫科而感覺遺憾終生,幸好他是一個鍥而不捨的人,讀完一個…
歡迎讚好我們的facebook page,免費資訊源源送上。

文章資訊

ID: 185560
Date: 2018-09-29 06:23:56
Generated at: 2020-07-08 12:38:42
Permalink: https://www.vjmedia.com.hk/articles/2018/09/29/185560/【愛情實況系列】才子第一次約女仔就去行山,能