狗眼看人低嘅例子永遠周圍都有，但係兜口兜面見到，就真係特別令人火滾。
今次呢位化名阿瓊嘅女性客人，就咁睇無咩特別，二十幾歲，無讀大學，中學畢業就喺啲中小企業度做文員。佢黎到嘅時候都咪話唔醒神的，因為佢身上面嘅打扮，絕對係你上淘寶打「歐美小香名媛風」呢種字眼會出現嘅衫，簡單黎講，就係你點扮個款，都睇得出你 Made In China Sold From Taobao 嘅衣服。
咁無野嘅，而家網購又好淘寶都好，早就蔚然成風，至少喺中港文化交流融合上面擔任住極重要嘅先鋒角色，我又唔會因為咁就對個客有 Bias，唔好玩啦，我身上面都係著住某連鎖店特價貨，分分鐘平過阿瓊套仿小香風套裝。
之但係阿瓊一開口，就有一陣煙味飄出黎，我皺一皺眉，無理由當住個客面拎枝空氣清新劑出黎噴架？但係，佢個口真係好臭。Sorry。於是我藉口話好焗，由得舖頭度門打開。
度門打開左，問題就黎喇。阿瓊講野好多懶音，好多「errrr、呢、姐係、我巧驚」，而佢嘅聲量都頗大，所以當隔離舖店主行過，向我點頭微笑時，佢臉上可憐我嘅笑容，令我非常唔好意思；嘈親人地就唔好啦。
咁阿瓊黎問咩呢？佢話佢份人好簡單，無咩上進心，有份工就得，我望一望佢手上面個手袋，Balenciaga Classic City 款，話貴唔貴，但以阿瓊每個月嘅人工黎講，要一筆過嘔萬六蚊出黎，我諗佢月尾張卡數單都幾和味，可能屋企有個錢卦。
阿瓊話自己好耐無拍拖，成日遇著啲衰男人咁話，「食完飯就無左下文，短訊又唔覆」云云，都係一啲我聽到耳仔識反轉嘅香港地男女 Dating 生態，簡單黎講，要有下文嘅，搵食者，可以即晚食完飯已經有下文；如果係正經嘅下文，起碼都會約下一餐飯幾時食呀、會 send 個 whatsapp 話「多謝你今晚陪我，下次見」之類。
食完飯，無哂聲氣，好簡單，人地無意思囉。
「我幾時先搵到我如意郎君？」
「有無意欲參加活動，進修，Friends gathering，轉工，興趣班，玩交友 Apps？」我都係嗰句，「如果現有生活模式固定，好難有人突然 Pop 出黎同你講『我找到了』架，無咁浪漫架。」
「我有玩交友 Apps 架，都多人搵我，但係好 cheap 呀你睇下呢個，做 salon 都想識我做文職。」
我打左個突。Come on，唔係呀？2018 年都仲有「藍領白領」嘅分別呀？做 Salon 好失禮你呀？我有個識左好多年嘅朋友，喺世貿中心對面開樓上 Salon，做到風山水起，客如輪轉呀，洗頭仔都比我朋友鼓勵到而家獨當一面做大師父呀！咩野做 Salon 你做文職呀？
我好婉轉咁同阿瓊講，其實做邊行唔係真係咁重要，除非我好憎榴槤，但對方做榴槤生意，咁我就真係無下次；呢啲係喜好問題，做乜要分階級。
「咁但係我斯文人…」呀唔係，用返阿瓊個 Tone，應該係「貢打係我係 C 聞人」，然後阿瓊開始講自己眼界幾 broad，識嘅野幾多等等。
「啲人讀唔成書先做呢啲。」
我聽到反哂白眼，是但，嬲到無氣，唔反咁遠，今次反去荔枝角算，點解係荔枝角？荔枝上火呀！同我心情一樣！喂阿姐你家下咪又係中學畢業就出黎做野？你係咪要玩階級呀？文職，啱呀，我有啲做跨國公司 DM 嘅客呀，人地都文職呀，係咪咁講呀？
即係咁，今時今日仲自命不凡、用自己嘅眼光喺自己嘅圈子打自己飛機嘅，無問題，你開心咪得囉！但係，你唔可能要求其他人都接受你呢一套架嘛！阿瓊姐，你生活又唔算被動吖，做運動去飲野玩 apps 你樣樣做齊，點解連檸檬都無得你食呢？有無諗過自己有少少問題呢？
你拎住個 Balenciaga 袋唔代表你好 elegant 好 grand，人地叫巴黎世家啫，唔代表你用左就有陣巴黎味；等於澳門有威尼斯人有巴黎人，係咪你去完兩間酒店就等於去完意大利法國呀？唔係咁計架嘛！淨睇外表計 Package 嘅話，你彈人鐘時，人地同樣地彈返你鐘架咋。
檢視下自己先啦，一黎就歧視人地。無咁多痴線富二代會突然深愛你走黎壁咚你架。
你話想生仔我咪唔避孕囉，我家下有咗你就叫我落？
名校老師婚外情的故事
女人就黎三十歲仲係 A0 係咪就叫有問題？
中女不諱言「我有 SP，但我唔會同我老公離婚」
老師的成功要訣：識人、埋堆，攀附權貴；作育英才已經行唔通。
邊個講出「分手」兩個字，邊個就係萬劫不復嘅千古罪人
女性客戶開口埋口「我認為」，咁你有無理過對方點諗先？
我以為個客擔心病母健康，原來佢只係想快啲分身家
其實人地會覆你短訊可以係出於禮貌，唔代表人地鍾意你⋯
為何今天好像剩下Mirror 一個偶團？
我去到2021年先唔再睇TVB——正向聯想 (Positive Association)
分手咪分手囉，三口六面講清楚好難咩？
【遊戲介紹】做個中世紀領主 《Going Medieval》極多玩法暗藏食人肉滿足饑餓度
薛定諤人生最尷尬的恥笑——薛定諤的貓實驗
寫於與舊單位分手之前——習慣化 (Habituation)
2018年10月2日
