【三十零歲大悲咒】友情

 

細個嗰陣,老師上堂有叫過大家將親情、友情、愛情排一個次序,小學撚知咩叫愛情咩,自然係最尾,亦都唔算太鍾意屋企,友情自然係第一位。然後隨著日子,人會發覺生命中有更多野要排序:學業、興趣、事業、健康乜乜柒柒。踏入 三十歲嘅人生,愛情同親情早就成為同一樣野,其他野好多都放棄左唔再在乎。

唯獨友情,點都放唔低,長駐最後一位,變成心入面嘅刺。

三十零歲嘅友情,就係無咩時間可以理友情。除非你有返下教堂做下義工,又或者咁睇唔開去搞政治。 如果唔係一個月根本無咩機會見到所謂嘅朋友。友情對於開始踏入半中年嘅一個佬,就好似食西餐果陣俾對筷子你,想用都唔知點用。 

記得廿幾歲嘅時候,友情就係比較,讀邊間U、係邊做野。朋友開始分做兩種:一係你睇唔起,一係睇你唔起。 月入五萬同萬五之間嘅鴻溝愈黎愈明顯,記得有次成班朋友去啲濕鳩任食邊爐,阿明只係食左幾嚿就話有事走左,阿強仲好似十幾歲咁不停嗌蟹柳同丸。其他幾條友都係食少少收工,大家都過左要勁食填飽自己嘅年紀,眼前呢個甜甜地又有陣怪味嘅沙嗲湯,明明AL果陣都食得落口,而家居然食都食唔落。果晚阿強食足全程無停過,其他人打機嘅打機,飲酒嘅飲酒,果個又多油又唔健康嘅沙嗲湯底同呢班中學兄弟,都隨住呢餐飯消失係我嘅人生。我好記得果日完左係我第一次食一蘭,寧願坐係個自閉位食,都唔想成班人焗住一齊。

去到人愈大,見識愈多,睇唔起嘅唔再係朋友,而係自己。當自己可以去蘇浩鋸扒果陣,身邊會見到堆人食法國菜。當自己柒下柒下終於試到tasting menu ,人地走左去食米芝蓮三星。另一邊又會有朋友繼續日日譚仔。人外有人,天外有天,而家打開ig見到啲有錢女廿歲未夠就環遊世界,先明白自己同當初睇唔順眼嘅阿強根本無分别。係真正有權有錢嘅世界,阿明、阿強、我同埋班兄弟都係一撚樣。

三十零歲,係友情上面應該已經體會過足夠嘅背叛同冷待,足夠到學識唔去在乎,又或者呃自己唔在乎。

直到一日。

嗰一日只係好普通嘅一日,照返工、食飯、扑野。突然收到一個電話,電話入面果把聲係好耐無見嘅兄弟,佢同你講:「喂,阿強過左身。」 簡單講過咩事之後約個食飯就繼續開工。 放工之後我買左包蟹柳同幾粒丸,整左碗丁麵。係老婆返到屋企之前,一路食一路諗下以前以班人嘅痴線野。原來嗰陣真係好開心。嗰晚,我係花灑嘅保護之下,靜靜地喊左五分鐘。

兩三個月之後,我地成班兄弟係喪禮之前去睇下阿強,雖然佢個樣化左個硬膠妝,但都叫認得佢,其中一個兄弟突然話:「柒強,你個樣好撚膠」又有另一個做左老師嘅兄弟話:「都叫撚左你唔好食咁多丸!」 我地係阿強遺體果前有講有笑。外人睇一定以為呢班友係喪心病狂,但我知,我地用最好嘅方法去同佢講再見。

之後我地有無見多左,好似以前咁friend? 梗係無,大家都要繼續生存,每個人都要繼續錯失太易,愛得太遲(呢首歌係咪無人識???以前周街都係播呢首) 呢個係必然,人只能珍惜好少野,能夠講到再見就好幸福。

朋友會過身,未過身又唔得閒理。當生活註定要你去冷待去放低,三十零歲嘅友情,就係一句無咩機會講岀口嘅道歉。

Sorry囉,兄弟。

 

作者:法印

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 185673
Date: 2018-10-03 06:23:37
Generated at: 2019-11-12 19:50:18
Permalink: https://www.vjmedia.com.hk/articles/2018/10/03/185673/【三十零歲大悲咒】友情