大家好又係我乒僮呀，早排工作比較繁忙，成日都要捱杯麵，但喺你又有冇諗過，一個我哋平時見而厭之嘅杯麵，會係中產區小朋友趨之若鶩嘅珍品。
話說我仲係中產區教波果陣，大部分學生都有返啲家底（當然，無返咁上下家底都好難去果間搶錢嘅Center學波)，我自幼屋企都唔算富裕，所以有陣時同呢班小朋友傾計，就會發現即使大家係同一個香港成長，唔同背景嘅人嘅成長歷程都會有好大嘅差別。
由於中產區間Center 附近無嘢食，而我嗰陣又住緊Hall，所以有時我會係Hall 拎兩個杯麵去教波，咁就輕輕鬆鬆可以解決咗個午餐，爭取時間休息。而咁啱有一日，我係食完飯之後就要教個好有錢嘅小朋友，果個小朋友係我去果間Center 教波之前已經係度學波，加上個人又比較百厭，有時會自己衝咗入職員休息室，咁啱果次佢撞入嚟，就比佢見到我食緊個杯麵。
果一下，佢隻眼簡直好似識發光咁。
「阿Sir，你呢個係咪杯麵嚟架！！咩味嚟架？好唔好味架？」個學生一路O嘴一路講。
「吓，呢個咪出前丁丁囉，麻油味丫嘛。」我揸住個杯面，一臉不以為然，反正我以為佢只係唔認得啲杯麵樣。
「唉阿Sir 你就好啦，我從來都無食過杯麵架。媽咪話要大個先可以食杯麵。」學生仲係眼甘甘咁望住我個杯麵。
一陣Cultural Shock 又係我個腦入面出現，呢個學生平時已經食得好健康，咁家長想小朋友食得健康啲都好正常，但係你話即食麵都未食過？我又覺得好似真係有啲過份。
「咁你鐘唔鐘意食麥當奴呀？」我又再問個小朋友
「鍾意呀，但係媽咪話一年最多食兩次。」
我當時心諗，麥當勞同埋出前一丁明明就係我小學時期最想食嘅嘢，因為基本上無小學生唔鍾意煎炸嘢同味精。有時我同同學仔講下麥當勞新包都可以講一個下晝。你知啦，小學生講啲話題，多數都係啲小朋友覺得唔正經嘅嘢嚟架嘛，你唔食麥當勞，唔睇卡通片，又邊度有得笑呢。但係，係呢個中產嘅世界，呢班小朋友就正正受到屋企人嘅嚴密監控。放學唔俾去公園玩，食嘢一定要三低一高，睇嘅嘢一定要係有教育意義，打打殺殺呢啲庸俗嘢唔好比我個靚仔掂，聽嘅嘢最好就中世紀交響曲，更加唔好話打機呀果啲啦。
咁問題就出現啦，我覺得家長著緊小朋友嘅飲食係絕對正確嘅，但又有無必要吹毛求疵到一年三百六十五日，一千零九十五餐都要Monitor 得咁緊要呢？同時，小朋友得到咗健康，但係將自己小朋友嘅生活體驗完全咁同其他小朋友隔離，會唔會令到佢哋係同同齡嘅人Social 嘅時候會顯得奇怪，甚至乎會俾人覺得係一個怪人呢？試想像佢哋上到中學，如果佢哋話俾同學仔聽，佢哋唔食得蝦片薯條公仔麵，啲同學仔會點樣諗呢個人？有時童言無忌，小朋友係比人當咗做怪人幾次之後，就會慢慢咁喪失自信心，咁又係咪真係可以令小朋友全面健康咁發展呢？
同時，正所謂「大人越係禁止嘅嘢，小朋友就越鍾意」，有啲小朋友就係因為細個比父母禁制得太犀利，令到佢係長大咗，有自主權之後就變得不懂收斂，為嘅，就係補返果份童年嘅回憶。咁樣留低一個陰影，對小朋友又係咪真係好呢？ 呢啲可能只係我呢啲屋村仔嘅一面之詞，我知道有時家長護子心切，但係發展係講求均衡，與其將子女變得過份嘅特立獨行，點解又唔俾佢哋玩下，試下，令到佢哋係認識朋友嘅時候有多啲嘢傾，咁先叫真正圓滿嘅發展呢？
為何今天好像剩下Mirror 一個偶團？
我去到2021年先唔再睇TVB——正向聯想 (Positive Association)
分手咪分手囉，三口六面講清楚好難咩？
【遊戲介紹】做個中世紀領主 《Going Medieval》極多玩法暗藏食人肉滿足饑餓度
薛定諤人生最尷尬的恥笑——薛定諤的貓實驗
寫於與舊單位分手之前——習慣化 (Habituation)
2018年10月4日
