交友 Apps 絕對係時下忙碌都市人嘗試認識新朋友嘅熱門渠道，不過如果有客黎到問「我用唔用交友 Apps 好？」嘅時候，我都唔會一味推薦的。有啲人適合用，有啲人或者寂寞已久，比較易信人，就好易遇上啲借機賣美容療程、保險等等嘅人士，更甚者更會遇到不懷好意嘅人。
美芬今年就黎三十歲，咁多年黎都係單身，或者因為從小讀女校、出黎做野職場又係一堆女人嘅關係，佢非常唔擅長同異性相處，加上外表唔算突出，性格又靜態，「我係咪要會無人要？」，佢咁樣同我講。
單身點樣突破自己嘅文章，我好多篇文都寫過，今次就唔喺度著墨太多；同埋我都想強調一樣野，就算身邊好多男士，都唔代表你一定會「有好多選擇」，即係我男女客戶比例係四男六女，都算多男士吖係咪？咁係咪代表我有一 log 貨先？唔好玩啦，好多時公還公私還私架，兩個人是否能夠走在一起，要睇好多野嘅。
美芬經交友 Apps 識左位男士，對方高大有肌肉，剪一個飛機頭，聲稱身高 180 cm，外國長大，條件極好，差在唔知有無高登仔咁叻會考有 10 條 A。
對方同美芬相識後，三日之內，已經不斷稱讚美芬「Pretty」同埋「Elegant」，仲有「你同我以前遇過嘅女性唔同，佢地都係睇上我嘅家境」等等我一聽就想反白眼嘅對白。奈何，美芬還是有一顆相信愛的少女心，佢睇瓊瑤，佢信一見鍾情，佢信緣份；因此，佢對呢位化名大力嘅男子一秒傾心。
對方聲稱自己身在英國，黎緊想搞國際電子貿易生意，「經大陸轉口歐洲有好大生意潛力」，美芬不虞有詐，加上對方話「如果你願意同我一齊努力，你願唔願意黎英國同我一齊試下新生活」。美芬頓覺三十年人生終見光明，心中甚至見到自己身穿 Vera Wang 婚紗，與大力慢步於 London Eye 之下嘅畫面。
帶美芬黎搵我嘅，係我另一個客人 Grace。Grace 一聽就覺得美芬比人呃，所以希望我用一個第三者身份，「幫我狠狠地鬧醒佢啦」。
咁當然，咩都要開左牌先講，而呢篇文出街嘅時候，呢件事亦早就落幕已久了。美芬獨自黎搵我之時，我先知事情比 Grace 形容嘅要嚴重更多。
「你過左幾多錢比大力？」我小心翼翼地問。
「……前前後後……xx 萬。。」美芬面有難色，「其中有一部份係我問兩間銀行借……」
呢個時候嘅美芬，終於聞到件事有燶味，終於懷疑自己或者好似是咪比人呃；因為，大力先後以投資生意、身份問題出唔到境等原因，從美芬身上得到半舊首期。係，我講緊半舊首期。
但係，大力始終無出現過喺美芬面前。
「點解你會信佢？咩身份問題？佢走私架？」我有少少耐不住氣，因為成件事太天荒夜談！
「佢話佢以前做過愛爾蘭共和軍，美國唔比佢入境，扣留左佢……」
「愛爾蘭共和軍？！」
我雙眼一反，眼光一轉，成個魂魄飛到去泰吾士河。即係咁，就算無 Common Sense 或者 Historical Sense 都唔緊要，呢個世界有樣野叫維基，you can google it。
愛爾蘭共和軍呀！咁大個大話你都信？古人 Play 呀？我當你係 Provisional Irish Republican Army 好未？就算係咁，一個今年先三十歲嘅男人絕對無可能做過呢啲野囉！
「我聽到軍，我咪以為佢係伊拉克嗰啲勁野……」
我唔出聲。突然，我覺得眼前嘅美芬好慘。你有幾寂寞，幾想拍拖，人生幾空虛，先會一野就比呢啲以愛之名行兇嘅大名，呃到欠銀行錢呢？
開牌出黎，唔駛多講，大力對美芬根本就無愛情啦，甚至「大力」呢個人係咪真，我都好懷疑，但係反正，美芬比左出去嘅錢，就一定拎唔返架喇。
「佢真係無鍾意過我？」美芬個樣好可憐，但係我只能堅決地搖搖頭。
當然，我手頭上有唔少客人，因為交友 Apps 而遇到另一半，有人結左婚，有人生左仔，啲紅色炸彈我扮見唔到，餅卡就老實不客氣咁收埋左 LOL
但係，帶眼識人，唔理係面對面抑或網上面，都係應該無時無刻 Bear in mind 嘅想法呀。
無咁多童話架，2018 年啦，呢個爾虞我詐嘅年代，黑心嘅人，永遠比好心嘅人多呀。
你話想生仔我咪唔避孕囉，我家下有咗你就叫我落？
名校老師婚外情的故事
女人就黎三十歲仲係 A0 係咪就叫有問題？
中女不諱言「我有 SP，但我唔會同我老公離婚」
老師的成功要訣：識人、埋堆，攀附權貴；作育英才已經行唔通。
女性客戶開口埋口「我認為」，咁你有無理過對方點諗先？
我以為個客擔心病母健康，原來佢只係想快啲分身家
其實人地會覆你短訊可以係出於禮貌，唔代表人地鍾意你⋯
喂阿姐，你唔好以為自己拎住個 Balenciaga 就以為自己特別高尚啦好嗎？
為何今天好像剩下Mirror 一個偶團？
我去到2021年先唔再睇TVB——正向聯想 (Positive Association)
分手咪分手囉，三口六面講清楚好難咩？
【遊戲介紹】做個中世紀領主 《Going Medieval》極多玩法暗藏食人肉滿足饑餓度
薛定諤人生最尷尬的恥笑——薛定諤的貓實驗
寫於與舊單位分手之前——習慣化 (Habituation)
2018年10月5日
