同性戀和情緒病一樣,都係無得揀

文教 / 最新文章綜覽

 

 

係飛機上,睇咗《抱抱我的初戀》,其實一早知係一個高中男生點面對公開自己係同性戀者,只係好想睇佢嘅過程係點。當中有講其中有個同學一早公開,都會被一啲無品嘅同學嘲笑。又提及到異性戀無須去表明自己,但同性戀就要,仲要面對親友及朋友可能性嘅負面反應。

然後我就會想,其實同性戀和情緒病一樣,都係無得揀,但係情緒病患者得到嘅對待更不公平。到咗現在文明嘅時代,啲人係仲會對情緒病有好多膠誤,嫌棄及恐懼係一般唔認識嘅人會有嘅負面反應。由以前讀書,到現在返工,甚至係其他場合認識嘅朋友,都會有同性戀者。女同性戀者比較幸運,啲人始終無咁反感,活得如常人一樣。男同性戀者就待遇差一啲,會有人攞哩一點嚟講下笑,玩下咁,起碼都無被嫌棄到被拒絕接近嘅地步。但換咗係情緒病患者呢?除咗網上見到相關資訊會有人公開,現實中呢?有無人會係學校、公司理直氣壯咁公開?

知道有大學生同學校講有情緒病而申請唔到宿舍,學校覺得醫生紙唔夠詳盡,認為該學生未必適應同其他同學相處,又懷疑病者唔能夠住無人照顧嘅宿舍。亦都知道有人見工前講明有情緒病,間食店係接受一啲有案底、曾經入獄嘅更生人士,但一聽到對方係情緒病患者就唔請。哩兩個例子話你知,好多情緒病患者選擇隱藏,都唔會公開,公開病情只會換到好多拒絕、遠離、嫌棄、恐懼。一個好需要靠關心嚟醫治嘅病,怕面對哩啲負面反應,甚至怕影響應有嘅正常生活,所以扮作正常,抑壓自己,將自己情緒推向深谷,就係為咗維持表面嘅「正常生活」。

情緒病唔代表失常,唔會無啦啦斬人,我地有自理能力,扮到正常、懂得抑壓,即係代表我地都會好識克制自己,只不過有時會病發,需要一點時間、需要一點關心,有的需要時便去食藥。就如食錯嘢,要花點時間去厠所嘔,然後睇醫生食藥;又或者發燒要睇醫生、食藥、休息一樣。你地睇AT17嘅ELLEN,佢出事前都一樣去做《全民造星》評判,過程中佢仍然會去安慰參賽者同司儀,給予佢地信心同力量,唔出事都唔知佢病發緊。

世界仲未文明到,公開情緒病如同講自己感冒一樣,如果情緒病和同性戀能夠公開咗,啲人反應只會「噢,係呀」,當常事一般對待,咁個世界先係真正文明啦~無咩我都係繼續隱藏身份,除咗身邊一啲好友外,真係唔可以亂俾人知。情緒病哩個炸彈咁嘅嘢,攞出嚟就嚇到人,收埋又唔知幾時自爆,隱藏又唔係、公開又唔係。世界無公平,返工搵食最重要。

 

作者:紫玥

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 185771
Date: 2018-10-05 06:40:44
Generated at: 2019-06-24 20:54:21
Permalink: https://www.vjmedia.com.hk/articles/2018/10/05/185771/同性戀和情緒病一樣,都係無得揀