【愛情實況系列】虔誠耶女想同非耶教男友同負一軛，耶撚教會逼佢斬情絲

講起耶撚教會（唔係所有教會），真係火都嚟。先唔講其他，單係戀愛方面，要所有信徒堅守「信與不信不可同負一軛」，信徒絕對唔可以同非信徒相愛，就好唔合理。近年社會上同教會入面都多咗討論呢個話題，我都為呢樣嘢寫過評論文章，又上過網台評論。不過今次我要寫嘅，唔係評論，而係講一個同「信與不信不可同負一軛」有關嘅故事。

香港教會嘅傳教方式，令到信徒女多男少，情況仲越嚟越嚴重。後生女信徒要搵拍拖對象，亦都越嚟越難。教會一早知道有呢個問題，近十幾年來大力推動男性事工，希望吸引多啲男生加入，可惜都係冇乜成果。但同時，適婚而又單身嘅主內姊妹又越嚟越多，點算好？教會只好退而求其次，搞多啲「牧養單身姊妹」嘅事工，強調「獨身是神的恩賜」，再加上「神一定有預備」之類嘅教導。之但係，教導還教導，始終人非草木，現實上大多數姊妹都想搵個理想對象，唔覺得獨身係一種享受。至於神點樣預備就唔知，只知道無言地等，女仔嘅寶貴青春流失得好快，每年一到生日，個心都離一離。所以，一遇到好嘅男仔，自然會珍惜。

我識得唔少教會中人，其中一個耶女，由細到大都喺同一間教會成長。佢好乖好聽話好委身，全情投入教會嘅生活，而且家庭觀念好重，係一個好虔誠嘅耶女，行為上靈性上，都好得教會認同。如果一路咁樣定格落嚟，當然冇問題。但係，人會長大，一長大，自然需要戀愛，需要戀愛，問題就嚟嘞。

當呢位虔誠耶女踏入適婚年紀，都想搵個好男仔，但教會冇。佢後來喺外面識倒個男仔，人品好，對佢亦好好，兩個人好快就拍拖。拍拖係好事，亦係私事，但教會對信徒，尤其女信徒嘅戀愛生活，似乎比任何事都著緊同敏感。好快，當教會知道虔誠耶女有個非耶教男朋友之後，即時如臨大敵，先係搬出「信與不信不可同負一軛」，再強調係「魔鬼試探」，會令人「跌倒」等等，將呢段好純潔嘅愛情講到好邪惡。成堆耶撚，見面又好、電話又好，不斷向虔誠耶女疲勞轟炸，套用共產黨嘅術語，就係「做思想工作」。

面對咁嘅環境，虔誠耶女非常痛苦。佢自細喺呢間教會大，所有社交、朋友，都離唔開教會。同時，教會代表咗道德，當教會入面成班人日日夜夜話佢同非信徒拍拖係犯罪嘅時候，就令佢產生好大罪咎感，覺得自己真係犯咗大罪。另一方面，男朋友又真係個好人，對佢好好，大家都好愛對方，根本冇理由就咁分手。而如果一定要喺埋一齊，就一定要同培育自己成長嘅教會決裂。點算好？佢當時內心嘅痛苦同掙扎，真係不足為外人道。

到咗呢個地步，擺喺虔誠耶女面前嘅，只有兩條路：一係要男朋友；一係要教會。兩樣都要得唔得？唔得。教會喺「信與不信不可同負一軛」嘅教條上，堅決寸步不讓。

終於，虔誠耶女做咗一個可能係佢一生人最重要嘅抉擇，亦係好痛苦嘅抉擇：離開自己成長嘅教會。至於俾教會指責「通過唔倒試探」、「跌倒」等等，都唔理得咁多。之後冇幾耐，佢就同男朋友拉埋天窗。

結婚冇幾耐之後，佢哋生咗個好可愛嘅BB女。虔誠耶女索性辭咗份工，全職相夫教女。佢老公係個標準好老公同好老豆，非常愛錫妻女，仲好勤力做嘢養家，一家三口樂也融融，完全符合教會成日講嘅家庭價值。

有一次，我哋一班朋友上佢哋屋企探訪。虔誠耶女唔係叫外賣招呼就算，而係親手下廚煮俾我哋食。佢煮嘅都係普通家常便飯，但係就非常好食。而佢由煮飯到食飯，都保持住笑容，係好自然、好簡單、好純樸嘅發自內心笑容。我當時先至體會到，原來咁樣先至係幸福、先至係神嘅真正恩賜。

食完飯離開佢哋個幸福嘅屋企之後，我就喺度諗一個問題：「如果當年虔誠耶女選擇聽教會話，同男朋友即係而家嘅老公分手，家下會係點呢？」

【愛情實況系列】

老夫少妻？公司總有個八婆會幫你棒打鴛鴦……
姐弟戀，你 / 妳接受到相差幾多歲？
如果女人要俾帽你戴，買埋層樓俾佢都無用！
一對閨密好姊妹，同時鍾意一個男神，點收科？
寂寞妹妹主動搵大叔，真係會有好結果咩？
曬靚樣又曬富二代男友，會有乜結果？
大叔戀上學生妹，結果係？
咁嘅CHEAP 男都有女神死心塌地！呢個世界公平咩？
想由異性知己變情人，情關闖唔闖得過？
同從未見過面嘅人發展電話情緣，純情乖乖女會有乜結果？
嫁個又有錢又錫老婆嘅老公，係咪一定幸福？
才子第一次約女仔就去行山，能唔能夠結束三十幾年青頭生涯？

作者：問世間

不善談情，但求懂愛；不作失實，但求寫實。

閱讀後覺得好，請多多讚好及分享～：）