我有個好朋友叫Crystal，佢一向好善解人意，份人細心又識照顧人，入得廚房出得廳堂，唔會夜蒲係個乖乖女，我以前成日都講笑話邊個娶咗佢就發達，可惜自從佢拍咗拖之後就染上咗公主病，180度轉變，要個個就晒佢，小小事就發脾氣，搞到大家都敬而遠之。舉個簡單例子就係佢永遠都唔肯諗食咩，話就話無所謂，但係你話食燒肉佢就話熱氣，食齋又話太清淡，食中菜又嫌遠。好喇既然佢ban晒啲提議就問返佢想食咩啦，佢就話：「無所謂呀，我諗唔到，你哋話事啦。」
你一定估唔到佢最後竟然提議去九龍城食泰菜，心水清嘅讀者就會問：「吓？又話唔食熱氣嘢嘅？」佢話唔通成世都唔食咩，久唔久都想食下，我即刻諗起家英哥張圖「真係好難捉摸呀！」以為咁就完咗？你太睇少佢喇，決定咗食咩之後佢就會吩咐其他人打電話去book位，每次都係咁，有次我哋幾個朋友夾埋一齊唔book位，佢竟然話咁改去食吉野家打邊爐，因為唔使book位。
我知打電話去book位其實好簡單，平時都係我做多，但係可唔可以唔好咁老鳳？我book 五次你都可以book返一次掛，你可以話你忙緊，唔得閒book住，但唔係吩咐我去book囉，平時返工仲畀腦細點唔夠呀？我唔係你呀四呀，我知你平時可能畀男朋友寵慣，當你公主咁，但我唔係你你男朋友呀，朋友係對等，無話一定要就晒你，都係嗰句啦， 做好人只會畀人恰，如果大家覺得我最近冷漠咗唔使擔心，我只係想做返個正常人，唔係爛好人。
最慘係有佢講無你講，總之佢講嘅就係真理，你唔聽佢講，就會話你吃虧在眼前，第時實後悔，其中一樣係逼我搵工，我父母都未催我啦，我自己嘅事，我自己會負責。意見當然可以畀，但係唔好逼人一定要受你嗰套，咁樣會令人好辛苦，唔想再同你講嘢。其實我有諗緊好無爆佢一鑊呢？呢個人值唔值得我去鬧醒佢呢，定係由佢一路做佢嘅公主呢？我選擇咗後者，就等佢繼續過幸福快樂嘅生活啦。
人大咗已經無乜意慾再去識新朋友，難得仲會約出嚟見面嘅都係識咗好多年嘅真心朋友，因為慢慢會開始發覺時間有限，無必要嘅應酬都盡量減少。人大咗係會變，至於變好定變壞真係無人知，而家我只係想好好珍惜身邊愛我嘅家人同朋友，每日開心快樂咁過，「活在當下」呢四個字老土得嚟其實幾啱聽。
我去到2021年先唔再睇TVB——正向聯想 (Positive Association)
香港濕熱世界第一！？談散熱和濕度的關係
【職業安全】英國警花分享：防刺背心唔係咁著. . .
【遊戲評測】《血咒之城：暗夜儀式》新生惡魔城 四年等待完全值得
分手咪分手囉，三口六面講清楚好難咩？
薛定諤人生最尷尬的恥笑——薛定諤的貓實驗
2018年10月8日
