【外賣仔日記】袋鼠宣布試行逐單計——加減人工都唔知,你敢唔敢試?

圖片來源:deliveroo 網站

 

琴日(10月8號)香港 deliveroo 宣布試行逐單計算人工(自願性),價錢同之前我收到嘅無乜點變,但係詳細嘅細節完全係可以導致你人工大減,因為單錢計算方法有好大問題,雖然有最低單錢保證,但係計算方法完全不透明,絕對會有機會因此被壓低單錢,最嚴重嘅情況係會令到每一單都係只會攞到最低單錢保證,如果每單都係最低單錢保證,同大幅度削減人工無分別,雖然而家就話會同舊有人工計算方法作比較,如果比舊有嘅低會補貼,但係試用期完之後無話會再作出補貼。

香港 deliveroo 宣布試行逐單計算人工(自願性計劃),每張單以送遞距離加上取餐費以及送餐費計算人工,車手保證最少有 $50一張單,而步兵最少有 $35一張單,但係實際上我就咁睇現時公司公佈嘅資料,公司完全係可以做到每一張單都係貼住最低單錢保證嚟出。10月11號開始可以報名參加呢個自願性計劃,但係報名之前請諗清楚,雖然是很計劃期間公司會同時用現有方法計算你嘅人工,然後邊個高啲出邊個,但係冇講話有好多情況發生咗之後,會繼續執行現有方法去計算你人工。即係話,參加咗嗰新嘅試行計劃,有嗰安全網,都唔代表你嘅人工唔會減少咗。

根據公司現時嘅政策,如果你唔接受派俾你嘅單,每小時訂單保證係會失效,而家公佈嘅呢個新制度係容許唔接單,雖然公司承諾唔會影響報更數據,但係冇話唔會影響響現有人工方法計算,如果你參加咗呢個計劃,但係你有單唔接,又或任何理由踢單(尤其是響新計劃下公司建議如果等餐廳出餐等得太耐要主動提出踢單),而且全日所送嘅訂單唔過本身為保證嘅單數,佢用沒有保證單數咁計你,你都吹佢唔脹。

公司回應:如果你參與新計劃,你唔接單又或者踢單,仍然會喪失每小時保證單數,補貼會按照沒有保證單數計算

新嘅接單制度係同現有嘅制度有好大衝突,有可能因為咁引發大量嘅爭拗。而且係曾經有好多人試過接單率太低而被終止合約,如果你做得少單,或者係咁唔接單,公司補貼得太勁,跟住話你接單率太低而終止合約,咁就無啦。

公司回應:接單率太低唔會被終止合約(呢個我唔係幾信)

仲有,因為公司冇公開講過每公里人工,佢絕對可以響試用期為咗氹你班友落搭係咁加錢落每公里到,而完咗之後就有咁低得咁低甚至只係俾最低距離費用保證你都得,你都絕對係吹佢唔脹,因為冇公開過,真係佢話乜就乜。

但按照之前袋鼠步兵轉用電腦派單嘅試用計劃嗰陣時,曾經加咗每小時保證單數俾步兵,但係當試用計劃一完就變返一般每小時保證單數,即係每小時保證一單,雖然而家就話會同舊有人工比較而作出補貼,但係預計試用期完之後會取消補貼。

公司回應:12月6號之後唔會再作補貼,

而且如果你唔鍾意新制度,12月6號前唔email公司,話想變返原來本身嘅計算方法嘅話,公司係會默認你轉新制度,而且係不可事後再講返話想還原返做原本計算方法,唔記得email你就大鑊。

(我覺得佢扮12月6號前收唔到email都得)

而逐單計算人工響大部份情況下都會小過現有人工計算方法,咁既然執行新制度都係要用返現有人工去計算,咁點解要去試嗰新計劃呢?因為如果有好多人參與呢個試行嘅計劃,公司就可以話多人參即係好多人支持,佢哋就會正式強制全世界執行逐單計算人工,到時又無比較去作出補貼,人工又被大幅度削減,咁樣真係好?所以係咪真係參加呢個試行計劃,去俾數據袋鼠去研究或者作為支持強制全面執行呢個計劃嘅借口?我就唔會啦。

另外想講下呢個計劃嘅缺點,係真正全面執行逐單計,而且沒有同舊有人工比較而作出差額補貼嘅情況下會點。

根據公佈嘅資料話,單錢係佢認為你前往餐廳以及顧客嘅最佳距離(有最低距離費用保證),加上一個固定嘅取餐費以及送餐費計算。但係每公里嘅距離費用係完全無公佈過,即係話公司可以隨時任意修改每公里嘅距離費,再簡單講嘅就係,每一單嗰價係可以任佢講,而如果你事後質疑張單嘅價錢,公司會有個非常萬用嘅擋箭牌,話計算方法正確,因為佢都無公開過每公里費用,真係佢話ok就真係ok架啦喎,到時每單嘅人工係最低單錢保證都得。

公司回應:連佢哋都唔知實際公里數係點計,但係只有1% 嘅單係貼著最低單價保證
(呢個我都唔係幾信,尤其某啲區經常有好多單專門送隔離街/大廈,留下商場送樓上寫字樓,超近,但係因為寫字樓要超耐嘅上樓時間,預計都係出最低單錢保證)
(同埋,每一單高過最低保證$ 0.01都係高阿)

公司話嗰個距離係計顧客pin 嗰一點,如果嗰一點同實際地址唔同,之後無得事後改返價錢

 

圖片來源:deliveroo 網站

 

同埋孖單響新嘅制度下唔係計兩單單錢,嗰計法係由嗰人去到餐廳以及顧客 A 同埋顧客B 嘅最佳距離,咁都係嗰句啦,佢話嘅最佳距離,佢話嗰個就係嗰個,另外有一次嘅取餐費,加埋兩次送餐費,以及孖單額外獎金,如果佢話嗰兩張單個最佳距離費用係最低距離費用保證嗰個數,咁每張單會賺到嘅會急跌,步兵每張單會變咗$25,而車手會變咗$32.5,送多咗單,人工反而跌咗咁多,咁你嗰計畫唔係伏係咩阿?

另外,如果你online嘅時候係一單都無,你絕對係一蚊人工都唔會收到架,現時好多細區本身都冇乜單做,咁嗰計劃係咪真係會提高咗嗰人工?我完全感受唔到囉

所以參與試行計劃都弊大于利,咁正式推行嘅情況下都一定唔會好得去邊

另外,試行計劃係預設參與,如果唔想參與,必須要主動響10月11號響Rider app入面撳制選擇不參加逐單計試行計劃
仲有,你如果想試行計劃後轉返原來嘅計算方法必須要主動響12月6號前emal 公司,否則會默認你入全新計算方法。

我就一定唔會參加架啦,我響度呼籲大家參加前都要好好諗下。

專題:【外賣仔日記】

 

 

作者:外賣仔

外賣仔

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 185917
Date: 2018-10-09 06:35:34
Generated at: 2022-08-17 18:43:06
Permalink: https://www.vjmedia.com.hk/articles/2018/10/09/185917/【外賣仔日記】袋鼠宣布試行逐單計-加減人工