就承認係戴偉浚呢件事上，香港係咩都做唔到

喺香港，點樣可以最快速將一個人從天堂火速拉落地獄 ？首先佢係一個香港人，然後佢同中國扯上關係，甚至有跡象/已經承認自己係一個中國人。而香港足球小將（應該仲係吧）戴偉浚今晚就完美示範。

話說，香港隊新帥加利韋特上月宣佈嘅第一份港隊初選名單，有一個港人等咗好耐嘅名字 — 戴偉浚。一個喺英甲闖蕩嘅19歲港將，被香港球迷寄予厚望嘅年輕人。然後，決選時，戴偉浚並無入選，韋特指因為浚仔剛傷癒，所以先無入選。不過佢旋即被效力球會牛津聯踢爆，話佢將會參與中國U21國家隊10月8日至20日嘅荷蘭集訓營。

一個人，就係咁因天堂跌落地獄，而一粒香脆嘅花生就咁樣誕生咗。其後浚仔個人ig被港人洗版，然後連登「死全家」、「斷腳」、「屌老母」聲不斷。

呢件事有幾個蹺蹊位，第一，雖然下星期係國際賽周，但英甲賽事如常，咁點解浚仔可以去集訓營，而唔係候命呢？換句話說，一係就係佢已經被牛津聯通知咗佢唔使出場；一係就係一早有代表隊徵召咗佢，牛津聯要放人。第二，加利韋特話佢剛傷癒所以無選，咁到底係韋特唔選？定係浚仔自己決定唔踢？定係有其他原因令佢踢唔到？第三，即便係剛傷癒，點解操嘅地方唔係自己球會牛津聯，而係中國U21集訓營？

最重要一點，中國u21之所以發出邀請，唔同喺咁啱知道浚仔傷癒，又咁啱知道香港唔選，又咁啱知道牛津聯放人，所以就好似踢街場咁打電話畀浚仔「不如你聽日嚟阿姆斯特丹同我哋中國U21一齊練波呀好唔好？」唔好玩喇大佬！

明買明賣，呢件事擺明係有組織有目的，有預謀嘅。問題係，咁又點？戴偉浚真係拒絕港隊邀請，而去荷蘭會合中國U21咁又點？有乜問題？

簡單嚟講，下一次中國U21教練希丁克選人，強行徵召戴偉浚，你有奈得佢咩何？當呢個國家需要你嘅時候，就算你係乜撚嘢人，佢都一定有方法令你可以變成中國人。而你足總班辣殺梁孔德之流又夠膽同中國足協bargain咩？又敢同佢哋爭人咩？你敢出聲，即係唔承認香港人係中國人呀？然後咪又出嚟做小丑話只要解決法律問題，香港球員絕對可以成為中國球員，跟住幾個球圈老屎忽就話咁樣仲開闊咗香港球員嘅出路添！

問題係，你香港憑咩留到人地？當可以登上中國呢個大舞台，香港有乜嘢值得人地留戀先？成龍話齋，無咗香港電影九世架喇，依家只有中國電影。成龍都姑且係香港成長都有一番咁嘅見解，戴偉俊十幾歲就去咗英國，仲同你講本土講感情？

更重要係，大把香港人都覺得如果佢入到中國隊，對佢生涯係百利無一害，比起返嚟踢呢啲辣殺波，跟下希丁克操仲好。更甚如果佢拎咗中國護照，就可以拎正牌係中國球員喺中超搵食，仲享受埋依家必須要派U23球員上陣嘅政策，令到個身價同人工更加水漲船高，個啲先係大茶飯呀。

係呀，係大石砸死蟹，但仲有大把香港人幫手推舊石落嚟，你有咩可以做啫？

作者：阿享

一個戒緊牛肉，但打邊爐仍然會忍唔住既耶青。

閱讀後覺得好，請多多讚好及分享～：）