Assassin’s Creed Odyssey:亂到咁嘅game 就推出來俾人玩?一開機真係心諗做乜鳩. . . . .

 

 

刺客教條(Assassin’s Creed)自2007 年推出第一集,已經十年有多,呢隻野啱啱出嘅時候,玩法係劃時代嘅,嗰陣潮流興一種玩意叫「跑酷」,即係喺樓梯屋頂跑來跑去,每一集嘅刺客亦都係強調呢種爬高爬低跑來跑去嘅玩法。

刺客另一個吸引人嘅地方,就係佢將虛構嘅故事,擺左入一個曾經存在過嘅歷史時空當中,外國嘅學校教師亦對呢隻遊戲推崇備至,認為佢係令好多年輕人寓打機於學歷史。遊戲入面嘅地點、建築、人物、事件等等,好多地方都可以睇得出製作團隊係特別包含左熟識歷史嘅人。

不過玩得多都會悶,特別係同一個玩法,經歷第三次十字軍東征(Assassin’s Creed)、義大利文藝復興(Assassin’s Creed II、Brotherhood、Revelations)、美國獨立戰爭(Assassin’s Creed III、Black Flag)、法國大革命(Assassin’s Creed Unity)、英國維多利亞時代(Assassin’s Creed Syndicate),嗰種爬高爬低,跟住地圖icon 跑去附近,捕住啲人點走然後逐個埋佢後面吉死,去到最尾原來可以反擊技無雙嘅玩法,已經帶唔到驚喜俾玩家。

經歷左上一集嘅Origin,睇得出製作團隊好想衝出呢個死胡同,結果亦話俾fans 知道,換湯唔換藥咁多年,製作團隊唔係食老本直至世界末日,完成左出來嘅遊戲,亦好合理咁利用「前傳」嘅鋪排,去返古埃及時代,刺客組織仲未成形,所以玩法亦無需要跟從前人嘅「刺客」習慣,多左騎馬,可以換武器,更大嘅世界可以走來走去。

 

去到呢一集奧德賽,故事時代上面去得更早,係古希臘伯羅奔尼撒戰爭時期(431-404 BC),故此刺客系列嘅所有「包袱」佢都可以變:無袖劍、可以著重裝甲、無刺客組織、無神殿騎士團。

特別要講嘅係,連玩法都大變了。呢個大變,亦係我最欣賞今集嘅野。

 

盡量唔劇透啦,但點都有少少

 

刺客奧德賽嘅主角,繼Syndicate 嘅兩姐弟不同特性輪流用,呢次係一開始可以揀做男定女,玩落去同埋故事上無咩大影響,鑑於全程多數都係望住個角色後面,有男玩家可能認為揀女仔會適合啲。但係我打機鍾意代入感,所以都係揀左做哥哥,咁女角即係阿妹就會出現去左敵人嗰邊。

同所有冒險遊戲一樣,主角身世唔係有段故,或者唔係遭逢巨變,又點會有故仔繼續俾你玩丫,而今集特別嘅係,一開始無屬於一個組織,主角只係記得自己跌左落山,只係記得老母訓練左自己一身好本領,然後流落左去個島仔,過住啲餐搵餐食餐餐清嘅日子,只不過係突然間有個神秘人出手闊桌,就走上左做「傭兵」嘅路。

主角真正認清發生緊咩事,係做完呢個神秘人嘅任務之後,發現條友呃鳩佢,然後就令主角發誓要搗破呢個詐騙壞蛋集團,殺曬班仆街,咁個故仔先至叫做正式開始咁。

 

奧德賽嘅玩法,其實係好完美咁配合左呢個佈局。

 

以前嘅刺客,接左任務之後,啲提示就會喺個地圖度,玩家就咁走埋去就得,但呢一集當個主角打聽完啲消息,只係會略略知道個大方向,然後呢,你就要睇地圖,估自己要去咩位置附近,當然啦,顧及遊戲體驗,去到百零米附近,隻鷹(唔係drone)就會提醒你,就到喇,咁。

 

 

仲有一個係遊戲結構上嘅變化,就係任務已經無左「主線」「支線」嘅分別。以前嘅刺客,遊戲大體上都係有一條主線,玩家鍾意可以衝主線直接玩到結局,亦可以見到得意野就做多啲,玩盡佢。呢一集呢,唔好意思,基本上玩家只係知道,係呀我係要搗破個壞蛋集團,但嗰幾十個壞蛋喺邊呢?地圖係完。全。無。提。示。!

不過咁,個壞蛋集團有話你知,佢哋係滲透曬呢個社會嗰政治經濟文化軍事各個範疇,哇,即係咩?即係行行下見到感歎號有人要傭兵大大閣下幫手,你唔係唔幫丫嘛?幫幫下,竟然發現個幕後黑手就係其中一個壞蛋!

 

我係非常咁鍾意呢種鋪排手法。

 

明明主角就係連自己都唔知自己要去邊要做咩要殺邊個,打機嘅玩家無理由次次都上帝視角喺地圖mark 曬俾你埋去吉一刀收工架嘛,呢一集嘅任務鋪排,好明顯睇得出製作團隊嘅誠意,一個路邊貧苦婦孺嘅求助,做完再喺隔離接個相關任務,再做完先發現背後隱藏嘅人物事件,個敘事係好順理成章。

如果玩家一開始覺得好亂,唔知去邊,滿頭問號咁質疑點解地圖無顯示,我一開始都有呢個感覺,但玩落去就發現,呢個「唔知做乜鳩」嘅感覺,就正正係製作團隊想俾玩家切身處地體驗到主角嘅感受。

而越玩落去就會越習慣越明白自己要做乜。主角有得升LV,玩家亦有得成長。

 

 

如果話上一集Origin 係嘗試突破,呢一集就係鞏固而且擴大左個突破效果,無論係玩法、故仔、任務種類都係咁出色,未出DLC 都已經感受到佢完成度好高,六百幾蚊買黃金版絕對係抵玩。

 

 

作者:白木乩

白木乩
聽聞係總編分身,專用來出D 與總編身份不符既膠文

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 185958
Date: 2018-10-10 10:30:40
Generated at: 2020-02-29 12:33:41
Permalink: https://www.vjmedia.com.hk/articles/2018/10/10/185958/assassins-creed-odyssey:亂到咁嘅game-就推出來俾人玩?一開機真係