話說我有個親戚，即管叫住佢做姑婆先，佢份人咩都怕蝕底，有著數就第一個仆到去，仲要拎多幾份，有時都幾為人側目，其實佢呢種性格又衰唔晒，因為佢咁樣真係慳唔少，有時佢拎多咗仲會分埋畀其他親戚，唔係自己獨食，不過如果同佢去食放題就會奶晒嘢。
「快啲同我出去拎炒飯！唔係一陣畀人拎晒！」姑婆說。
「唔使㗎，我哋畫紙仔，想食咩就叫咩啦。」我說，你知啦放題係行責任制㗎嘛，邊個拎邊個要食晒。
「叫你幫下手都推嚟推去！無鬼用！淨係坐喺度等食！」姑婆說。
「放題真係坐喺度等食㗎喎姑婆。。。」我說，但係佢未聽完我講就已經出咗去，仲帶咗兩碟炒飯返嚟，大家都呆咗。
「同我一齊裝啲蘋果汁畀大家飲啦！我得一對手點拎得晒！」姑婆說。
「唔使啦出面大把嘢飲未必個個都想飲蘋果汁㗎。」我說。
「即係你叫我自己一個老人家出去走幾轉？」姑婆說。
「唉，好啦，等等我。」我說，然後同姑婆拎咗成盤蘋果汁返嚟，結果係點？無人飲囉！我同男友阿Mike都唔知隊咗幾多杯。
唔知係咪因為姑婆經歷過日本仔時期，嗰陣無乜嘢食，得蘿蔔同樹皮，所以佢到而家對嘢食都大為緊張，就算之後畫紙仔都死，明明食完一碟天婦羅又有一碟，樣樣嘢都double，甚至triple，為咗要清咗姑婆叫嗰啲，唔想咁浪費，個個都無得叫自己鍾意食嘅嘢，簡直係一個惡夢。
除此之外，佢成日都會去拎著數，例如去拎米、麵包、飲品、文具等等，其實如果有需要嘅話，去拎呢啲真係無問題，問題係佢拎完又拎，拎N咁多次，搞到真正有需要嘅人反而拎唔到，我哋唔係無話過佢，但係你知啦老人家係唔會聽人講嘢，分分鐘話返你轉頭，對住佢，我真係無晒符。
其實姑婆份人平時真係無乜嘢，仲好熱心幫人，雖然佢無諗過人哋想唔想，同埋方式啱唔啱，不過佢姑終都係老人家，盡量都唔想同佢嘈，有時畀佢鬧都忍咗佢算，唉，唯有之後盡量唔再同佢去食放題啦。
為何今天好像剩下Mirror 一個偶團？
我去到2021年先唔再睇TVB——正向聯想 (Positive Association)
分手咪分手囉，三口六面講清楚好難咩？
【遊戲介紹】做個中世紀領主 《Going Medieval》極多玩法暗藏食人肉滿足饑餓度
薛定諤人生最尷尬的恥笑——薛定諤的貓實驗
寫於與舊單位分手之前——習慣化 (Habituation)
2018年10月12日
