【唔方便嘅真相】八九六四交過悔過書俾中共嘅李卓人,贏面點都比小麗老母勝一籌

政治 / 最新文章綜覽

 

正所謂薑越老越辣,一班傘兵,輸嘅輸,DQ 嘅DQ,連區議員都無咩幾多個,過埋2019都唔知有無剩,而家反對派仲喺香港政壇追緊鹿仔嘅,都仲係講緊馮檢基呀李卓人呀呢啲元老級人馬。

 

我諗呢個時候,最唔滿意選舉主任DQ 劉小麗嘅,應該係陳凱欣。

 

建制派反對派嘅格局,選舉動員操作係唔同玩法,陳凱欣呢啲點解可以拿住條疑似陽具崇拜圖騰咁樣嘅鹹魚影相擺FB?因為佢今次補選有幾多票,係靠各個建制派嘅山頭,睇下民建聯工聯會同埋啲乜嘢西九新動力幫佢動員幾多樁腳call 幾多人投票。上次個鄭泳舜,係民建聯親生仔,梗係總動員啦。

但今次陳凱欣報稱獨立,連鄧家彪嗰種工聯會民建聯雙重黨籍都無,啲老牌建制政黨肯出幾多力,我會打個問號,因為我真係唔知。

又但係,陳凱欣本來應該無咁拗底,大佬對面原本嗰個係小麗老母,除左販賣自己係教副學士嘅老師、自稱有人話佢似Stephy 鄧麗欣同埋小確幸之外都無咩令人深刻嘅嘢,老母喺反對派陣營爭取到幾多票本身都唔知打幾多折。大家參考下姚松炎上次點輸法?阿姚叔叔都仲話有個專業形象,佢追打啲工程嘢都叫令人記得佢,咁小麗老母呢?嘿。

 

唔知選舉主任是咪寧左勿右,甚至是咪打左燈搏乜,唔知啦,唔深究啦,總之個客觀效果,就係竟然幫反對派除去左一個競爭力咁低嘅候選人,令工黨改派元老級人馬李卓人。

李卓人自從八九民運嗰陣偷運港人捐款返大陸,被充公後扣留,為左留住有用之軀,佢寫左悔過書俾中共,多年來忍辱負重咁委身香港嘅民主運動,實在係令人欽敬。

一個喺香港政壇咁多年,無論政績、誠信、人脈、形象都咁頂尖嘅反對派大將,你話反對派選民,會投邊個多啲呀?小麗老母定係人哥?

 

所以話,陳凱欣得票打下折,反對派家陣派返啲老黃忠出來,總好過美其名俾機會後生,但其實啲後生又信唔過丫?

 

作者:白木乩

白木乩
聽聞係總編分身,專用來出D 與總編身份不符既膠文

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 186041
Date: 2018-10-13 21:27:35
Generated at: 2020-02-21 08:08:22
Permalink: https://www.vjmedia.com.hk/articles/2018/10/13/186041/【唔方便嘅真相】八九六四交過悔過書俾中共嘅李