有人想做一份簡簡單單 Office 工，準時返工，唔準時放工，定期出糧等升職；亦都有一啲人想做某啲行業，一講出口，身邊嘅朋友可能就會回你一句「吓，你唔好傻啦」或者「你認真？」咁樣，或者把口話「好呀你一定得架」然後即刻 Text 其他 Common Friend 準備食花生。
我遇過唔少呢方面嘅客人。想做模特兒，想做歌手，想做演員，想做 KOL。當中，我不諱言，真係有部份似乎好高騖遠咗少少，亦有一啲人黎搵我之前，其實已經做咗好多事前功夫，甚至已經有超過一個經理人公司 Approach，佢只係黎搵我問簽邊間公司好咁樣。
我見過有客人追夢成功……又或者咁講，佢成功開到佢嘅第一步，你知我講緊你的，真心祝福你（笑）
但係，亦都有一啲人，一味得個「想」字，例如二十出頭嘅 Ben。Ben 戴住黑超黎到我舖頭，復古的烏蠅鏡，只是鏡片再大，也難掩他一臉稚氣。
Ben 黎問前途。唔少學生喺畢業前夕都會黎問牌，有時讀嗰科未必想做嗰科，又或者讀完嗰科根本唔知出到黎可以搞邊科；面對準畢業生對前路的疑惑，我也是見慣了，畢竟我也是過來人。
不過，當阿 Ben 開口講自己嘅 Dream Job 嘅時候，我真係不得不反一個白眼。
「我唔甘心於 Normal Life。」Ben 一路拎住佢副黑超，一路講到眉飛聲舞，「你頭先問我唔鍾意做啲咩，well honestly 我會答你，我，相信自己，咩都適合做。I mean it. 」
我面露微笑，但不期然地瞇起雙眼，「Sure.」我開始洗牌，「既然你咁有 Target（呢個位我有強調個 R 音），你到底有咩目標呢？」
「我想做 DJ，同時做 KOL，然後識人，然後轉做主持，演員，多方面發展；之後搞生意，you know，我雖然未出黎做過野，但係我都明白識人嘅重要性。成左名，做咩都易啲。Maybe 之後搞間 Bar。」
Ben 講出呢番說話嘅時候相當順口，似乎喺佢心中，已經將呢條「鯉躍龍門名成利就之路」嘅未來暗想了千百遍，諗到未做都以為自己已經做左。
咁，OK 嘅，人有夢想係可以嘅，呢個香港彈丸之地，都仲係高人輩出嘅。不過，你要行呢條路線，咁你有咩過人之處先？做 DJ？做 KOL？喂阿哥，你憑咩先？憑你可以玩你副黑超玩到出神入化？
「做 DJ 無問題，但係你知道呢條路唔易行架噃，由低做起架噃，好花精神架噃。」我笑笑口，「你又話想做 KOL，咁你開左個人 Page 未？」
「未。因為我未搵到我邊樣性格最特別，我好難取捨。」
我笑容有啲僵，但係呢度都未係最爆，重點係下一句。
「但係做 DJ 我有信心，我有大學畢業，相信可以一黎就開到台。」
「Sorry 你認真？」我有少少黎料，「你知唔知 DJ 點入行架細佬？」
「我未搵。」Ben 神色自若，「都係喺 JobsDB 架啦？斷估唔會喺勞工處啩？」
我個腦，如果係一個火山，相信呢一刻，就好似深藏喺地底唔知幾多年嘅火山一下子爆發咁樣。
我有少少頭痛。
「其實有夢想、有目標係好嘅，但係我都建議你返去做少少 Research 先；電台或者任何需要個人技巧表現嘅多媒體工作呢，唔係有張大學證書就一步登天的。應該咁講，無一份工，係會一步登天的。」
我講完之後，覺得自己無發火都真係幾犀利，我原本以為 Ben 會明，點知。
「所以我咪話要做 KOL 囉！」Ben 有少少唔耐煩，「做 KOL 咪可以一步登天囉，拍下片，9 UP 吓，一開始我諗住買啲電子野呀、品牌野呀返黎扮有人 Sponsor，做開左咪會有人搵囉！」
我對眼……比我抖下得唔得。個個星期咁樣反白眼，我有朋友做眼科醫生都唔掂。
我好想同 Ben 講，你係無可能一黎就做 KOL 的，好多人係做做下網，然後先逐步變成 KOL 的；呢個係一個 Progress，唔係一個開始。但係，算。年青人氣焰盛似火，我廿幾歲女都只能夠講句「我老鳥」，我真係睇唔透點解 Ben 嘅思路可以咁樣。
不過，我睇牌做人嘅啫，遺憾地，副牌對於 Ben 嘅 DJ or KOL 大夢就持相反意見，都係建議佢不如收皮算啦，我好直接同 Ben 解釋，「如果為興趣搞個 IG ，無所謂；想成為工作又想紅？嗯，我諗你真係未夠個人特色。」
對一個想上 JobsDB 搵 DJ 工作、連點入行都唔知嘅小朋友黎講，我都講得好厚道啦？
你話想生仔我咪唔避孕囉，我家下有咗你就叫我落？
名校老師婚外情的故事
女人就黎三十歲仲係 A0 係咪就叫有問題？
中女不諱言「我有 SP，但我唔會同我老公離婚」
老師的成功要訣：識人、埋堆，攀附權貴；作育英才已經行唔通。
女性客戶開口埋口「我認為」，咁你有無理過對方點諗先？
我以為個客擔心病母健康，原來佢只係想快啲分身家
其實人地會覆你短訊可以係出於禮貌，唔代表人地鍾意你⋯
喂阿姐，你唔好以為自己拎住個 Balenciaga 就以為自己特別高尚啦好嗎？
為何今天好像剩下Mirror 一個偶團？
我去到2021年先唔再睇TVB——正向聯想 (Positive Association)
分手咪分手囉，三口六面講清楚好難咩？
【遊戲介紹】做個中世紀領主 《Going Medieval》極多玩法暗藏食人肉滿足饑餓度
薛定諤人生最尷尬的恥笑——薛定諤的貓實驗
寫於與舊單位分手之前——習慣化 (Habituation)
2018年10月14日
