唔好再做一隻等畀人劏嘅港豬

 

 

我承認以前我都係一隻港豬,平日努力工作賺錢,放假就去食好西,煲下劇,生活都過得幾開心,至於你問我政治係乜?我覺得係好覆雜,我唔會明嘅嘢,而且都唔關我事㗎啦,我又唔係啲咩議員。直至佔中出現,我先至突然醒覺其實政治真係同自己息息相關,然後我開始睇多咗新聞、社評,當時有好多插畫家都會畫一啲諷刺時幣嘅插畫,亦有人會做懶人包,令到大家容易啲明白社會上嘅議題。

點解去急症室排咁耐都睇唔到醫生?想睇專科又要等幾多年?點解愈來愈多醫療事故?點解出街食飯愈來愈貴?加租幅度完全唔合理,好多店舖都要倒閉,捱得住嘅唯有加價,最後都係轉移去市民大眾度。點解香港人排唔到公屋?因為每日有150個單程證落嚟搶晒你嘅嘢。我努力做嘢但永遠都唔會畀得起首期,因為樓價升到癲咗,政府係有責任去控制,但所謂嘅辣招一啲用都無。我交嘅稅其實政府拎嚟做乜?大白象工程一個接一個,倒錢落海,今年施政報告竟然係無提過醫療同教育。

我去咗遊行,聽咗幾個市民講嘅嘢,呢幾日亦上網睇咗好多文章,我歸納咗其中一啲,希望等多啲人知道點解要反對填海起1700公頃嘅東大嶼人工島,如有講錯請指出,歡迎理性討論。

 

一. 先棕地後綠藍

要解決土地問題,其實唔一定要填海。棕地係指新界一啲荒廢咗嘅農地,部分已改作其他用途如貨櫃場、汽車維修工場等,約有1200公頃,只要係為公眾利益,政府係有權收回棕地再發展,跟據以往紀錄,打官司政府每次都係勝數。除此之外,仲可以發展粉嶺高爾夫球場同其他閒置土地,加加埋埋都已經係填海土地數量,根本唔使拎過千億,甚至萬億出嚟,但係點解政府都唔收?因為唔可以得罪某啲人,呢啲人有權有勢,最重要係有票。另外明明話有諮詢,但係個報告都未出施政報告就話落實,好明顯諮詢只係做樣,我都未話個諮詢根本唔公平,有十八個土地選項,但都無提過造價。

 

二. 破壞海洋生態

唔使講都知填海對生態有好大影響,填海好似落咗一個大水閘咁,海水會愈來愈混濁,植物、海洋生物如白海豚都會相繼死亡,可能人係自私,覺得白海豚絕種好過我無屋住啦,但我想講全球增溫已經好嚴重,極端氣候增加,天災頻密,天鴿同山竹嘅威力大家都唔係無感受過,大自然嘅惡果人類一定會受返,可能你而家係無事嘅,但係你嘅下一代又逃唔逃得過?加上人工島係喺海中心,我唔信打風會無事囉,好喇如果你話科技發達再起高啲囉,又唔知用多幾多億,咁又值唔值得?杜拜人工島已經係個例子,而家仲不斷沉降緊。

 

三. 掏空香港儲備

人工島估算需若一萬億,二千五億係填海造地,三千億係交通,包括四條過海行車隧道及四條鐵路,四千五百億係基建及公共措施。香港每年都有幾百億盈餘,但呢個人工島係要起十幾廿年,就算每年拎你一千億,終有一日都會唔夠畀,財政司已經講可能要發債向市民籌旗,到時還唔到咁點?加稅囉。大家都唔係唔知政府啲工程係一定會超支,一但洗濕咗個頭,就無得停,要繼續倒錢落海。而且賣地賺到嘅錢只會放喺起基建嗰度,係唔會放落醫療教育嗰邊。

 

四. 供應需求失衡

香港人口預計喺2043年達到822萬高峰,而發展東大嶼後可容納超過900萬人口,供應遠超於需求,又或者係因為要容納嗰每日150個嘅單程證啦(廿幾年加埋啱啱好七十幾萬),起咁多屋,唔擔保香港市民有得住㗎喎,公屋唔合資格排,私樓又貴到買唔起,高不成低不就嘅大有人在,同埋你真係唔知佢幾時先起好有得住,睇你長唔長命啦。林鄭話就話將有七成土地係做公屋,但係到時又係咪真?而家其實未有咩實際嘅規劃,而且佢鍾意點改都得,因為佢從來無聽過民意,佢係好大膽,佢夠膽恰幾百萬小市民,但係對住有票嘅1200人咪又係跪晒地。

 

五. 利益輸送工具

填海要用大量海砂,海砂市場已經畀中國壟斷咗,到時真係加幾多都要繼續買,而且因為星加玻大規模填海,令到周邊國家唔再賣海砂,北京亦已經叫停大灣區五個填海工程,要有中國批文先買得,分分鐘搵唔到海砂又要延期,又要再加錢,惡性循環。林鄭話政府每年開支超過5,500億,當中1,000億是係基建開支,基建係會隨時完成,故政府要經常諗下一批嘅基建。點解每年要有1,000億基建?工程公司、材料公司要keep住有得賺嘛。仲有今次填海講得好聽就係公私合營,其實咪又係畀發展商同地產商搵大錢。

仲有好多好多唔應該填海造人工島嘅原因,大家可以再上網睇。唔做港豬嘅第一步係先要了解而家社會發生緊咩事,政府做緊啲咩,第二步就係宣揚開去,令多啲人知道,第三步係行動,例如去遊行,表達不滿,第四步其實我到而家都未知可以點做,大家嘅無力感可能都好重,覺得做乜都無用,但係千其唔好因為咁而放棄,香港其實仲有得救!

 

P.S. 平時寫開打工仔二三事、愛情嘢同食評,無啦啦寫篇政治嘢真係勁攰lol

 

 

作者:小盛女

小盛女
80後中環打工妹,誓要追求work life balance的生活,並當一個幸福的食家。FB PAGE:https://www.facebook.com/littlevibrantgirl

閱讀後覺得好,請多多讚好及分享~:)

其他熱門文章

  • 審計雞 by FAKE 文青
    呢個情境每日都上演,你已經分唔清楚你嘅正職係一個auditor,定係一隻雞…
  • 【真人真事】嗰日,朋友扑咗個黑警… by 都市女子日常
    情侶情到濃時緊係扑嘢啦,點知呀警察叔叔第一次淨係硬到一下,之後都軟過軟雪糕,搞咗好耐,連個套都鬆埋出嚟。…
  • 孟晚舟被定罪,比美國不給香港待遇更中中國要害 by Terence Yun
    大家要清楚明白中共決定將國安法入基本法當中,其風險必然會計算美國這一著,計算之內,意味著中共絕對可以承受到這個傷害,包括香港沒有國際地位,金融生意直線下滑,外資大幅離港等等。但中共可以承受得到,因為今天美國不是上世紀八十年代的美國,中國也不…
  • 陳法拉呢種女人,蘭桂坊無一萬都幾千 by 庵念慈
    陳法拉就是那種中國出生、家裡略有關係二代,去外國走一轉再回流到香港,口裡的普通話和英文都是有難聽的捲舌音,住在美國卻罵美國總統的甚麼不是。…
  • 老蘭嘅初夜 by SAZI
    我記得第一次去蘭桂坊係喺2011年,已經係九年前嘅事。仲好記得第一晚去蘭桂坊時候嘅衣著,藍色書包杏色闊腳褲藍色花紋T裇,總之唔係可以稱為「戰鬥格」嘅裝束,好似白癡咁鑽入威靈頓街間T字頭O字尾嘅酒吧入面,入到去全部都大過當時嘅我至少十年,全部…
  • 「廢青」之煉成 by 金仔
    「係喔,就到六點,你要走啦呵?」。那位妹妹不知天真還是「串」,「係呀,就夠鐘。」朋友無言。到了六點,那個妹妹準時離開會議室。朋友第二天跟她照肺,想知道她每天準時下班會不會有什麽特殊理由,會不會需要上課或家裏有什麽事等等。只見那妹妹很鎮定的回…
歡迎讚好我們的facebook page,免費資訊源源送上。

文章資訊

ID: 186132
Date: 2018-10-16 06:40:53
Generated at: 2020-05-30 03:00:25
Permalink: https://www.vjmedia.com.hk/articles/2018/10/16/186132/唔好再做一隻等畀人劏嘅港豬