香港人嘅價值咪就係比你返工半價囉。

政治 / 最新文章綜覽

 

港鐵仆街,原本見怪不怪,不過一死就死四條,全香港打工仔又重新經歷山竹翌日嘅返工慘況。

香港人勁唔勁揪?我覺得好勁架。唔理係打風打到癱瘓哂所有嘢又好,港鐵出事搞到其它交通工具都超出載客量又好,佢地都有一種堅定不移嘅理念:我要準時返工。港鐵知道自己試新系統搞到香港打工仔冇得「舒舒服服」噉返工當然後悔,話會搵返日搭車半價,答謝市民體諒。

香港人嘅價值只係得返一程車費。半程加半程,我冇錯吖。

送成萬億比中共同高官權貴,香港人唔會理;樓價上到二萬蚊呎,香港人會照買;周街普通話一街屎尿,香港人都唔會出聲。唯獨你阻到香港人返工,佢先會同你死過。對住咁鍾意返工嘅香港人,你又點可以怪港鐵比個咁恥辱性嘅補償就算數?就算佢唔比,香港人夠吉士罷搭去表達不滿咩?

噉樣會阻住返工,不了。

好耐之前我寫過篇文,話香港人會為咗一杯45蚊嘅雪糕買一送一而排兩三個鐘隊,然後不滿個優惠輪唔到排隊尾嘅自己。而家?香港人價值又跌啦,特別係唔洗過海,返工車費唔洗廿蚊嗰班,你嘅價值已經連十蚊都冇,一個老麥魚柳飽都比你值錢。

點解會噉?因為每次被打壓嗰陣香港人都唔會企出嚟,每次都話要返工,甚至話企出嚟班人阻住哂條路。自己價值自己地方都唔捍衛,你又點怪得人當你係垃圾,當你奴性係仲重過中國人嘅最低層?

或者,我地都應該慶幸港鐵仲肯比個半價香港人。唔理佢係真心定做樣,起碼香港人暫時都仲有值得佢去做樣嘅價值。只係香港人再係噉事不關己,討厭政治落去,終有一日就算搶埋你身家,收咗你層樓,佢可以理由都廢事諗比你。

難以想像?除咗太古城等有999年長嘅舊契之外,香港大部份地方嘅地契只係維持到2047年。2047之後會發生咩事,邊個知?今日或者你仲值幾蚊,但到時嘅香港人,可能每個都係負數,政府有咩事仲要你比返錢轉頭。

好好珍惜依個半價補償,或者依個就係香港人有嘅最後價值。

 

 

作者:毛言地

毛言地
你有多久沒去找自己的理想?搏殺一天,回到家,倒頭就睡。 無言,只因生存太累。談理想?妄想; 毛言仍言,只因理想,本就是「理應去想」 http://www.facebook.com/MaoYanDe

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 186159
Date: 2018-10-17 06:34:16
Generated at: 2021-05-13 17:16:57
Permalink: https://www.vjmedia.com.hk/articles/2018/10/17/186159/香港人嘅價值咪就係比你返工半價囉。