【外賣西客實錄】「你搞到啲狗糧臭曬，我隻狗點食呀？」

（圖文不符）

有日放假，我去做完自己嘢，見冇乜嘢做，接咗張即時速遞單做，張速遞單唔係一張食物外賣嘅訂單，而係一張本地4小時速遞貨物嘅訂單。

呢一張單做嘅係速遞貨物，本身我哋理應視作張單要運送嘅嘢係貨物啦。張單所送嘅係一個商戶新鮮煮好嘅狗糧，但係基於係速遞單而唔係食物外賣單，而呢個速遞服務係無低溫嘅速遞呢個服務，任何嘢都只會視作普通貨物咁送，而且係唔會有額外嘅保護嘅。所以商戶一早已經急凍好晒啲狗糧，跟住連埋啲乾冰放入保溫袋去搵我哋送，咁本身嗰呢個服務係會響出單後4 小時內送到俾嗰客嘅，我哋當普通貨物運輸都ok，啲狗糧應該都唔會點熔嘅。

嗰送貨地址係一間診所，咁就一定會有人收貨啦，就算收貨人唔響度，點都會有個姑娘響度做登記嘅，交俾佢都ok嘅，如果佢肯代收嘅話，哈哈。

做速遞去送貨物唔同送食物，我哋嘅責任係安全地送到件貨物去嗰目的地就得，就算好似今次送急凍狗糧咁，只需要確保啲狗糧無穿無爛就ok 架啦，但係狗糧嘅溫度變化就唔係我哋需要關心嘅一環，即係啲狗糧熔晒導致到臭哂我哋都唔會有任何嘅責任嘅，咁畢竟係普通貨物速遞服務而唔係低溫貨物速遞服務。

咁送到去診所到，由我入到去到出返嚟都係同診所講緊話我嚟係送普通貨物，當時我係將件貨交俾登記處嗰位姑娘。因為見到診所都比較忙，咁我確認咗嗰收件人真係響診所到返工之後收件人就簽好名，然後我就走咗啦，過程入面從來收件人無意識到件嘢唔可以暴露響室溫咁耐嘅。

到咗第二日，我收到嗰電話

我：「喂 ～？」
客：「你好呀，你琴日係咪送過狗糧嚟啊？」
我：「係呀，咩事？」
（我心諗，呢張單會有咩事啊，大鑊到要搵返我？）

客：（好嬲咁講）「我啲狗糧臭咗喎，點解你琴日送貨嗰陣唔幫我擺落雪櫃啊？」

我係速遞員嚟架喎，唔係你工人喎

我：（好溫柔咁講）「啊小姐啊，我負責送貨架，咁又無任何備註響張單到話要放落雪櫃，我點知啊」

客：（繼續好嬲咁講）「咁而家臭晒叫我隻狗點食啊？」

我：（開始不耐煩咁講）「啊小姐，我係一個速遞員嚟，你件貨我送完之後事後要點做唔關我事，我無義務去了解架」

客：（繼續好嬲咁講）「咁但係而家臭晒叫我隻狗點食啊？」
客：（繼續好嬲咁講）「同埋我琴日冇返工，你仲乜送過嚟姐，搞到我啲狗糧臭晒，叫我隻狗點食啊？」

我：「啊小姐，我係一個速遞員嚟，有貨我就送，咁嗰備註又乜都冇寫，點知你咁多嘢」
.
.
.
.
.

以上嘅對話重複咗幾次之後，佢收咗我線

啊小姐，你又唔交帶落你啲同事放啲狗糧入雪櫃，你又唔返診所處理你啲狗糧，咁出事關我哋咩事呢？況且今次出事本身係唔關我哋事添，我哋無需要保障貨物溫度。

作者：外賣仔

閱讀後覺得好，請多多讚好及分享～：）