話說小妹都量咗一排地（裸辭咗），開始有少少淆底，不斷支出但無收入其實係一件好得人驚嘅事，就算我哩埋喺屋企做宅女，唔買嘢唔食好西，都仲要睇中醫同物理治療，唔係都唔知幾時先可以搵返嘢做。我知長命功夫長命做，但係睇住男友呀Mike日日做到夜深我就大食懶咁喺屋企度hea真係好過意唔去，跟住咁啱就有人問我會唔會做全職作家/KOL。
上年小妹有幸出過一本書，入面寫咗幾萬字，老老實實真係嘔心瀝血，然後大家都以為你好風光，賺好多，實情係賺到食兩餐好西嘅價錢，可以寫多兩篇食評，最慘係而家有N咁多本賣唔出嘅書放喺倉度無人理，其實好唔環保，我諗我下世投胎做樹都唔掂，所以就算之後有出版商搵過我出書都拒絕咗。講真，而家仲邊有人會買書？有嘅，好少囉。
唔好計要拎錢出嚟買書，其實Facebook專頁開咗幾年，就算係免費，只要一有廣告文已經會引起某啲人反感（就算已經標明係廣告），然後寫食評又畀人話係打手，問我收咗幾多錢，其實真係好無奈，所以如果我靠全職寫嘢搵錢真係一早餓死街頭。
然而當你有份正職，朝九晚六，未計加班，剩返嘅時間其實有幾多？大家心裡有數，影相、寫野、構思，例如標題點先會吸引，開首同結尾點寫好？一篇文或者食評其實唔係大家想像中咁容易誕生。
最近有朋友問我有無興趣開返條YouTube channel，我同佢講我唔出樣㗎喎，無樣唔會有人睇，通常啲KOL都係靚靚女女/仔仔咁喺度介紹啲嘢食，而且我唔識拍片剪片，又唔識講嘢，我淨係識寫嘢同影相㗎咋，然後朋友提議我用變聲器就得。
最後諗諗下我都係放棄咗，因為始終拍片唔係我專長，但係佢嘅提議令我諗起不如開返個Patreon，我知都係一啲吃力不討好嘅事，賺唔到錢之餘可能又畀人鬧爆，但係試下唔使死掛，還掂而家量地有時間，雖然付出同成果未必成正比，但無付出就一定無成果，因為呢個世界只有「多勞無獲」，而無「不勞而獲」。
為何今天好像剩下Mirror 一個偶團？
我去到2021年先唔再睇TVB——正向聯想 (Positive Association)
分手咪分手囉，三口六面講清楚好難咩？
【遊戲介紹】做個中世紀領主 《Going Medieval》極多玩法暗藏食人肉滿足饑餓度
薛定諤人生最尷尬的恥笑——薛定諤的貓實驗
寫於與舊單位分手之前——習慣化 (Habituation)
2018年10月19日
