六蚊一個橙

今日做完野，心情麻麻打算去七仔買杯雪糕。拎住個雪糕去到收銀排隊，有一個伯伯排係最前，摷緊散紙打算買一個橙同蘋果。香港有好多人都鐘意臨收錢先係散紙包死摷爛摷，依個伯伯都係。個伯伯摷左成分鐘。然後佢就開口話：

「剩係買左個橙先。」

收銀員話一個橙六蚊，伯伯聽完又係到摷散紙。個刻我知道佢唔係想摷散紙，佢其實係無錢俾。伯伯希望自己只係摷得唔清楚，而最後佢會摷到多一個一蚊夠錢買到個橙。

依個時候，企係我前面有兩個廿幾歲嘅年輕人同個收銀。佢地見到個伯伯無錢比，開始黑口黑面好唔耐煩。有幾分鐘，成間鋪就只有個伯伯係到摷散紙既聲。最後個收銀頂唔順，開多部機收錢。企我前面嘅人俾左錢就揚長而去。而個伯伯繼續係到死摷爛摷。

輪到我嘅時候，我幫伯伯俾埋錢。佢同我講自己只係差幾毫。然後將佢個堆散紙俾左我。我同佢講，唔駛，我唔係想幫你俾。我只係唔想要散紙，我想買一個蘋果食，又唔想要散紙同個橙，所以幫你買埋個橙。最後我買左一個雪糕，一個蘋果同一個橙。個收銀找返錢俾我，我將找左嘅散紙俾埋個伯伯。臨走前個伯伯講左句

「乜⋯⋯咁客氣呀？」

見到依個畫面我好撚心噏。

我對人類其實無乜同情心，我信可憐之人必有可恨之處。

但我都係好心噏。

我覺得個世界唔應該係咁樣。

唔應該一個橙要買六蚊

唔應該買一個六蚊橙但佢好似一個柑咁細

唔應該一個人買唔起一個橙同蘋果

唔應該見到一個買唔起橙同蘋果嘅伯伯，然後大家會係到西口西面擺出一個無錢就過主嘅撚樣

唔應該一個特首扔一萬億落海，但都無錢俾人買橙。

大家博命搵咁多錢唔應該令到依個世界係咁。

第二日，個蘋果俾我老豆食左。佢食食下講左一句。

「個蘋果你買架？頂﹗好睇唔好食嘅﹗」

作者：林飛

電影圈總編 http://www.vjfilmdom.com/

閱讀後覺得好，請多多讚好及分享～：）