近排睇咗本書，原版標題叫Influence: The Psychology of Persuasion，中文譯名叫《影響力》，初頭仲以為又係乜乜成功心理學果類鳩嗡當祕笈之流，點知睇完又覺得幾受用。
火雞老母生完火雞仔之後，聽到火雞仔吱吱聲咁叫就會沖埋去餵佢，就算見到天敵黃鼠狼，只要隻黃鼠狼吱吱聲（研究人員塞舊錄音機入黃鼠狼標本裡面），火雞老母都會當咗佢係火雞仔走去餵佢；但一聽唔到吱吱聲就伯當佢仇人咁啄。即係話，火雞老母其實唔認仔，係認啲吱吱聲。
聽落火雞老母真係好on9。完全唔識分邊啲先係火雞仔邊啲唔係，淨係聽到吱吱聲就餵、聽唔到就當唔係，好似一啲成日講「總之ＸＸＸ就係唔啱」、一見特價貨就搶、一聽到人地話鹽防輻射就掃貨，好似部（badly programmed）機器咁，乜都係靠（錯嘅）本能反應，好似無腦咁。
一定係啲人無腦啦，正常人有理性邊係咁架！
但其實你都可能有類似嘅行為，只不過trigger到你本能嘅機制可能複雜少少。
「佢上次幫過我喎，我唔幫佢咪好似好衰咁……」然後你就好唔情願咁借咗一千蚊比人，但明明人地之前只係幫過你好少嘅事，你同對方交情未必肯借一千蚊比人。
「我本身應承咗話拍架嘛，家下走數好似變咗我唔啱咁……雖然本身無話要除衫拍嘅，但聽佢講好似正常拍呢啲片真係要……又唔係除曬，無辨法啦頂住先啦」然後無知少女就落咗踏。
「心甘情願」被人呃嘅時候，就係被人用啲好似火雞仔嘅「吱吱聲」利用緊你。人會傾向言行一致，即使行緊去條錯嘅路都唔會返轉頭，而係會話「啱架喇，呢條路都通架肯定！」（aka. 死撐）；人會從眾，所以見多人排隊嘅餐廳就跟住排埋一份；人會覺得「物以罕為貴」，所以一聽到限量發售ＸＸＸ份／期間限定就沖住去送錢比人；人會傾向順從（疑似）權威，所以咁撚多「磚家」昆到人。
呢啲都係比人入嘅位，有時就算你feel到好似比人呃緊、好似蝕底咗，都會大腦短路，傻下傻下就做咗錯誤決定。呢啲行為本質上同火雞老母或者無腦蟻民其實無乜分別，只不過trigger到嘅位唔一樣啫。
既然呢啲本能咁易被人利用，咁我地係咪要訓練到自己完全唔受呢啲本能影響呢？咁又唔係。首先我諗人性呢家野真係無乜可能完全斷絕，江山易改，本性難移，好多人連一啲好普通嘅壞習慣都改唔到啦；何況呢啲本能有時又真係有啲用，例如從眾咁，好多人情世故、社會規範都係從眾學返嚟。又，所謂入鄉隨俗，咪又係唔知頭唔知路果時就望下人地係點做。所以呢啲會比人利用嘅人性係錯唔曬，亦唔可以完全斷絕，就好似衰鹹濕會比人捉黃腳雞都唔代表要去出家做和尚或者閹咗自己佢啫。
唔想被人利用，第一樣野就係要學識留意自己，到底被人用呢啲招數對付嘅時候有咩反應。作者就話佢瀨野果時會胃痛，我就會feel到個頭慶慶地麻木咗咁，生理反應呢啲野因人而異，但當你留意到自己出意呢啲反應嘅時候，就要提醒自己，唔好盲中中做錯決定，要褪後一步冷靜啲先做決定。
留意到自己可能中伏（而仲未真係中）之後，就要搞清楚自己底線同目的係乜野，例如比人氹你比多啲錢買多啲野，你就要諗返當初你budget係幾多（底線）、到底果件貨人你有無用。必要時仲可以大聲講返對方嘅意圖同手法出嚟：「哇西利喎，讚我兩句再扮曬好人咁提我點樣買會抵啲，等我信任你同對你有好感之後再氹我比多啲錢，呢招掂喎，我差啲就應承咗你喇，哈哈哈。」然後揚長而去。（好似好odd。所以咪要揚長而去囉。lol）
本書唔係好厚，都係兩百零頁。仲有好多大開眼界嘅例子（base on讀者人生閱歷啦），真係出乎意料地值得睇。
我去到2021年先唔再睇TVB——正向聯想 (Positive Association)
香港濕熱世界第一！？談散熱和濕度的關係
【職業安全】英國警花分享：防刺背心唔係咁著. . .
【遊戲評測】《血咒之城：暗夜儀式》新生惡魔城 四年等待完全值得
分手咪分手囉，三口六面講清楚好難咩？
薛定諤人生最尷尬的恥笑——薛定諤的貓實驗
2018年10月25日
